Ol Miting i Save Helpim Ol Pikinini Bilong Yumi
1 God i tokim lain Israel olsem: “Singautim olgeta man wantaim meri na pikinini . . . bai olgeta i ken kam na harim dispela tok.” (Lo 31:12) Em nau, taim ol Israel i mekim miting bilong lotuim God, olgeta pikinini, na ol liklik tu, ol i mas bung na harim tok. Na olsem tasol, ol miting bilong ol Witnes Bilong Jehova long nau ol i bilong helpim ol pikinini tu.—Sng 148:1, 12.
2 Tasol kain kain samting inap pulim nabaut ai na tingting bilong ol pikinini na bai ol i no harim gut tok. Olsem na papamama i mas lainim ol long putim gut yau. Na papamama i mas helpim ol long kisim gut as bilong sampela tok i kamap long miting. Nau bai mipela i stori long sampela samting yu ken mekim na bai ol tok bilong miting inap helpim ol pikinini bilong yu.
REDI LONG OL MITING
3 Sapos papamama i lainim gut ol pikinini taim ol i stap long haus, dispela bai helpim ol long save olsem pasin bilong bung wantaim ol narapela na lotuim Jehova em wanpela gutpela samting tru. Papamama i mas lainim ol pikinini olsem Jehova i laik bai ol i bung wantaim long miting, na sapos ol i bihainim dispela tok bilong Jehova dispela samting bai helpim ol. Na papamama inap lainim ol liklik pikinini tu bambai ol i save, ol miting inap helpim ol tu.—Sng 133:1; Ais 48:17; Mt 19:14.
4 Sapos pikinini yet i redim ol tok bilong miting, bai em i amamas long i go long miting na harim tok. Gutpela sapos ol pikinini i gat Baibel na buk singsing na ol narapela buk bilong ol yet, na taim ol i go long miting bai ol inap mekim wok long dispela. Ol papamama i mas helpim ol liklik pikinini long redim sampela tok bilong olgeta wan wan miting na bai ol i ken bekim sampela tok. (Hi 10:23) Taim papamama i mekim olsem ol i mas tingim krismas na save bilong pikinini. Olgeta man na meri na ol pikinini tu, ol i mas makim taim bilong redim ol tok bilong miting.—Hi 13:15.
5 Sampela pikinini i amamas sapos papamama i givim liklik wok long ol, em ol i mas mekim long taim bilong miting. Olsem: Ol pikinini i liklik tru, ol inap amamas long putim mak long pepa taim ol i harim nem bilong God, o Kingdom, o taim brata i stori planti long wanpela tok bilong Baibel. Pikinini i bikpela liklik em i ken raitim sapta na ves bilong ol tok bilong Baibel em brata i kaunim o kolim. Maski wanem wok papamama i givim long pikinini, sapos papamama i tokim pikinini em i mekim gutpela wok, dispela bai helpim pikinini. Ating taim ol i go bek long haus, papamama i ken kirapim pikinini long stori long sampela samting em i bin kisim save long en long taim bilong miting.
6 Sapos pikinini inap kaunim buk, gutpela sapos yu kirapim em na helpim em long makim taim bilong em yet i ken kaunim ol buk na nius bilong Sosaiti. Yu ken tingim krismas bilong pikinini na em inap kaunim gut tok o nogat, na yu ken kirapim em long kaunim buk Baibel Stori o buk Bikpela Tisa o buk Nambawan Man o buk Yangpela, na sampela tok i kamap long ol Wastaua na Kirap! Sapos pikinini i mekim olsem, dispela bai helpim em long kaunim ol nupela buk na nius bilong Sosaiti em yumi save kisim long olgeta taim.
PASIM GUTPELA KLOS NA BIHAINIM GUTPELA PASIN
7 Planti man, taim ol i kam long miting long namba wan taim, ol i kirap nogut long lukim ol pikinini i bilas gut. Taim pikinini i bilas gut bilong go long miting, dispela i helpim em long amamas long i go long miting, na long bihainim gutpela pasin taim em i stap long miting. Taim ol brata sista na ol pikinini tu i laik i go lukim brens-ofis, ol i mas bilas gut olsem ol i save bilas bilong i go long miting.
8 Sapos pikinini i bihainim gutpela pasin taim em i stap long miting, dispela samting i save litimapim nem bilong Jehova. Olsem na ol papamama i mas save i bikpela samting long ol i mas bosim gut pikinini long taim bilong miting. Ol papamama i tingim gut pikinini bilong ol, bai ol i sindaunim ol pikinini klostu long ol bambai ol inap was long ol na kirapim ol long sindaun gut na bihainim gutpela pasin. Sapos papamama i hatwok long bosim pikinini bilong ol, ol i ken toktok wantaim sampela papamama em pikinini bilong ol i save sindaun gut long miting, na tokim ol long stori long ol samting ol i mekim bilong helpim pikinini bilong ol long sindaun gut.
9 Yumi laik bai ol pikinini i ken insait long ol samting bilong miting bambai ol inap ‘kirapim ol narapela long laikim ol narapela na mekim gutpela pasin.’ (Hi 10:24) Jehova i putim ol miting bilong helpim ol pikinini tu.
[Ol Askim]
1. (a) Olsem Lo 31:12 i tok, husat i mas i go long ol miting? (b) Olsem Buk Song 148:1, 12 i tok, husat i mas litimapim nem bilong Jehova? Olsem wanem ol inap bihainim dispela tok long ol miting?
2. Kain kain samting inap pulim nabaut tingting bilong ol pikinini, olsem na papamama i ken mekim wanem bilong helpim ol?
3. (a) Long wanem taim na long wanem hap papamama i mas lainim ol pikinini olsem ol miting i bikpela samting? (b) God i laik bai ol pikinini i mekim wanem?
4. (a) Olsem Hibru 13:15 i tok, ol papa na mama na pikinini i mas mekim wanem? Wanem taim i gutpela bilong mekim olsem? (b) Olgeta pikinini i mas i gat wanem samting bilong ol yet bambai ol miting inap helpim ol?
5, 6. Ol pikinini i ken mekim wanem na papamama i ken tokim ol, ol i mekim gutpela wok?
7. Sapos pikinini bilong yumi i bilas gut bilong i go long miting, dispela i mekim wanem long em?
8, 9. Long taim bilong miting, ol papamama i mas tingim wanem bikpela samting? Bilong wanem i gutpela sapos olgeta long famili i sindaun wantaim long miting?