Bilong Wanem Yumi Mas Bung Wantaim?

MAN bilong Christine i lusim em bihain long ol i bin marit inap 20 yia. Nau Christine i stap wanpis bilong mekim bikpela long 7-pela pikinini man na wanpela pikinini meri bilong em. Ol pikinini i gat 7 i go inap 18 krismas. Em i tok: “Nau mi yet i mas mekim ol bikpela disisen. Dispela wok i daunim mi stret na mi laik tru long kisim helpim na tok bilong stiaim mi.” Em i painim we dispela helpim?

Christine i tok: “Ol miting Kristen i bikpela samting tru bilong helpim mi na famili bilong mi. Long ol miting mipela i kisim helpim long ol pren na ol tok bilong stiaim mipela i kam long Baibel. Pasin bilong go oltaim long ol miting i helpim tru mipela long olgeta bikpela samting bilong famili.”

Long dispela taim bilong “planti hevi nogut tru,” yumi olgeta i mas karim kain kain hevi. (2 Timoti 3:1) Olsem Christine, yu inap tingim ol miting bilong ol Witnes Bilong Jehova i bikpela samting tru bilong strongim bilip bilong yu, em i wanpela bikpela hap bilong pasin bilong yu long lotuim Jehova. Tru tumas, ol 5-pela miting bilong kongrigesen i save kamap long olgeta wik i strongim pasin bilong yu long laikim tru God, wetim gutpela samting bai kamap bihain, na i givim yu ol gutpela stiatok bilong Baibel long olsem wanem yu inap karim ol hevi.

Tasol i gat sampela lain ol i ting i hatwok long go oltaim long ol miting. Long pinis bilong de, ol i pilim olsem skin i taiet olgeta, na taim ol i tingim olsem ol i mas bilas gut na painim rot bilong i go long ol miting, dispela i mekim na ol i ting em i hatwok tumas. Sampela i pilim olsem planti taim wok skin i pasim ol long i go long ol miting. Bilong i go long olgeta miting, ol i mas lusim hap taim bilong wok na dispela inap mekim na bos i katim pe bilong ol o pinisim ol long wok. Na ating sampela i no go long ol miting, long wanem, ol i pilim olsem sampela amamas inap givim nupela strong long ol, winim pasin bilong bung wantaim kongrigesen.

Olsem na wanem ol bikpela samting i mas kirapim yu long go long ol miting Kristen? Yu inap mekim wanem na bai ol dispela bung i ken givim nupela strong long yu yet? Bilong bekim ol dispela askim, yumi ken skelim gutpela singaut bilong Jisas i stap long Matyu 11:​28-​30. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”

“Kam Long Mi”

Jisas i tok: “Kam long mi.” Wanpela rot bilong bihainim dispela singaut em long rot bilong i go oltaim long ol miting. I gat as na yumi mas go long ol miting, olsem Jisas i kamapim long narapela taim: “Sapos tupela o tripela man i kam bung long nem bilong mi, orait mi yet mi stap namel long ol.”​—Matyu 18:20.

Long taim bilong ol aposel, Jisas yet i singautim sampela man long bihainim em. Dispela i opim rot long ol inap pas gut wantaim em. Sampela i kirap wantu tasol long bihainim em. (Matyu 4:​18-​22) Sampela i larim laik bilong ol long kisim planti samting bilong skin i pasim ol long bihainim dispela singaut. (Mak 10:​21, 22; Luk 9:​57-​62) Long ol lain i bihainim em, Jisas i mekim gutpela tok olsem: “Yupela i no bin makim mi bilong i stap wantaim yupela. Nogat. Mi makim yupela bilong i stap ol lain bilong mi.”​—Jon 15:16.

Bihain long Krais i dai na kirap bek, em i no stap moa wantaim ol disaipel bilong em long graun. Tasol em i stap yet wantaim ol long rot bilong stiaim wok bilong ol na lukim pasin bilong ol long bihainim tok bilong em. Olsem, inap 70 yia bihain long Jisas i kirap bek, em i givim tok bilong skulim na strongim 7-pela kongrigesen long Esia Maina. Ol tok em i kamapim i soim olsem em i save gut long ol gutpela pasin na ol pasin kranki bilong olgeta wan wan insait long ol dispela kongrigesen.​—KTH 2:1–3:22.

Jisas i wok yet long tingim tru olgeta wan wan disaipel bilong em. Em i mekim tok promis olsem: “Harim. Mi save stap wantaim yupela olgeta de, i go inap long dispela taim i pinis.” (Matyu 28:20) Nau yumi stap long taim bilong pinis, olsem na yumi mas mekim ol samting bilong bihainim singaut bilong Jisas long bihainim em. Bilong mekim olsem, wanpela samting yumi mas mekim em yumi mas go oltaim long ol miting. Jisas i laik yumi harim tok bilong em na kisim skul long em long rot bilong stadi long Baibel na ol tok i save kamap long ol miting. (Efesus 4:​20, 21) Olsem wanem? Yu wok long bihainim singaut bilong Jisas olsem: “Kam long mi”?

‘Ol Man i Save Hatwok Tru na Karim Ol Hevi’

Wanpela bikpela as na yumi save go long ol miting Kristen, em bilong kisim ol tok bilong strongim yumi. (Hibru 10:​24, 25) Planti bilong yumi i save “hatwok tru na i karim ol bikpela hevi.” Ating yu karim sampela hevi bilong yu yet, olsem sik samting. Long ol miting Kristen, bilip bilong ol narapela i ken strongim yu na yu ken strongim ol tu. (Rom 1:​11, 12) Olsem, bai yu harim ol tok bilong strongim bilip, ol tok i kirapim yu long tingim ol gutpela tok promis bilong Baibel, na bai yu lukim bilip bilong ol narapela husat i wok long karim ol hevi. Dispela olgeta samting inap helpim yu long karim hevi na bai yu kisim stretpela tingting long ol hevi i wok long painim yu.

Tingim stori bilong wanpela meri Kristen husat i kisim bikpela sik na dispela i putim hevi long em. Em i tok: “Sik bilong mi i mekim na mi mas lusim sampela hap taim long haus sik. Pasin bilong go long ol miting bihain long mi lusim haus sik i givim hatwok long mi, tasol dispela em i ples mi ken i stap gut long en. Gutpela pasin bilong ol bratasista na pasin laikim bilong ol i givim amamas long mi, na ol gutpela tok na stiatok i kam long Jehova na Jisas i mekim na i stap bilong mi i gat as bilong en.”

‘Plang i Isi Long Karim na Samting Mi Givim i No Hevi’

Long ol ves bilong Baibel yumi wok long skelim, Jisas i tok: “Yupela kisim save long mi.” Taim yumi kisim save long Jisas, yumi kamap disaipel bilong em, na yumi karim plang bilong em taim yumi dediket long God na kisim baptais. (Matyu 28:​19, 20) Pasin bilong go oltaim long ol miting em i bikpela samting tru bilong i stap yet olsem wanpela disaipel bilong Jisas. Bilong wanem? Long wanem, long rot bilong ol miting Kristen yumi save kisim skul long Jisas, ol tok bilong em, na pasin bilong em long skulim ol man.

Wanem dispela samting Krais i laik bai yumi karim? Em samting em yet i karim​—em dispela gutpela wok tru long mekim laik bilong God. (Jon 4:34; 15:8) Yumi mas taitim bun bilong bihainim ol lo bilong God, tasol dispela samting i no hevi tumas long karim. Ating em i hevi long karim sapos yumi traim long karim long strong bilong yumi yet. Tasol sapos yumi beten na askim long kisim holi spirit bilong God na yumi wok long kisim ol gutpela tok bilong Baibel i kamap long ol miting, bai yumi kisim “bikpela strong” i kam long God. (2 Korin 4:7) Taim yumi redim ol miting na insait long en, pasin bilong yumi long laikim tru Jehova i kamap strong moa. Na taim pasin laikim i kirapim yumi long mekim olsem, ol lo bilong God “i no givim hevi long yumi.”​—1 Jon 5:3.

Ol manmeri i save karim hevi bilong painim mani long baim kaikai samting, hevi bilong sik, na sampela narapela hevi bilong ol yet. Tasol bilong karim na winim ol dispela hevi, yumi no tingim olsem savetingting bilong ol man tasol inap helpim yumi, nogat. Ol miting bilong kongrigesen i helpim yumi long yumi “no ken tingting planti,” long wanem, Jehova i save givim yumi ol samting yumi mas kisim na em i save helpim yumi long karim ol hevi. (Matyu 6:​25-​33) Tru tumas, ol miting Kristen i kamapim klia pasin bilong God long laikim tru yumi.

‘Mi Mekim Pasin Isi na Daunim Mi Yet’

Em pasin bilong Jisas long go long haus lotu we ol i save skelim na toktok long Tok Bilong God. Long wanpela taim olsem, Jisas i kisim Buk Aisaia na i ritim olsem: “Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam long tokaut long ol man i stap long kalabus long ol i ken lusim kalabus na i go fri, na long tokaut long ol man i aipas long ol i ken lukluk gen. Em i salim mi i kam long pinisim hevi bilong ol man, ol arapela i wok long daunim na mekim nogut long ol. Na em i salim mi long tokaut olsem, taim i kamap pinis bilong Bikpela i laik mekim gut long ol manmeri bilong en.” (Luk 4:​16, 18, 19) Man! Em gutpela samting tru long harim Jisas i kamapim mining bilong dispela tok, taim em i tokaut olsem: “Dispela tok bilong buk bilong God yupela i harim pinis, nau tasol em i kamap tru”!​—Luk 4:21.

Jisas, em “Namba Wan Wasman” i gat pasin isi, na long ol samting bilong spirit em i save lukautim yet ol man i bihainim em. (1 Pita 5:​1-4) Em i stiaim “wokboi i gat gutpela tingting” na ol i makim ol man bilong mekim wok wasman insait long ol kongrigesen bilong ol Witnes Bilong Jehova long olgeta hap bilong graun. (Matyu 24:​45-​47; Taitus 1:​5-9) Ol dispela man ‘i stap wasman bilong ol sipsip bilong God’ na ol i mekim pasin isi long ol na ol i stap olsem gutpela piksa long pasin bilong go oltaim long ol miting. Yu ken soim olsem yu tenkyu long ol dispela man i olsem “presen” long rot bilong go long ol miting, na yu ken strongim ol narapela taim yu stap long ol miting na insait long en.​—Aposel 15:​30-​33; 20:28; Efesus 4:​8, 11, 12.

“Bai Yupela i Kisim Malolo”

Taim yu go long ol miting Kristen, yu ken mekim wanem na bai ol dispela miting i givim nupela strong long yu? Wanpela rot bilong mekim olsem em long bihainim tok bilong Jisas olsem: “Yupela i mas lukaut gut bai yupela i harim gut tok.” (Luk 8:18) Ol man i gat laik tru long lainim ol samting, ol i putim gut yau long tok bilong Jisas. Ol i askim em long kamapim gut insait bilong ol tok piksa bilong em, na long dispela rot ol i kisim gutpela save tru.​—Matyu 13:​10-​16.

Yu ken bihainim pasin bilong ol dispela man i gat laik tru long harim ol tok bilong God long rot bilong putim gut yau long ol tok i kamap long ol miting. (Matyu 5:​3, 6) Bilong helpim yu na bai tingting bilong yu i no ken wokabaut, tingim tingim gut ol tok brata i kamapim. Yu ken tingting long kain askim olsem: ‘Olsem wanem mi inap bihainim dispela tok long i stap bilong mi? Olsem wanem mi inap yusim dispela tok bilong helpim ol narapela? Mi inap kamapim insait bilong dispela tok olsem wanem?’ Na tu, lukim ol skripsa brata i kolim bilong sapotim ol bikpela tok bilong em. Taim yu wok long putim gut yau, ol tok bilong miting bai i wok long givim tru nupela strong long yu.

Bihain long ol miting, toktok wantaim ol narapela long ol tok i bin kamap. Toktok long olsem wanem yu inap mekim wok long ol tok i bin kamap. Ol gutpela tok yumi mekim bilong strongim narapela i save mekim ol miting i kamap samting bilong givim nupela strong.

Tru tumas, i gat as tru na yumi mas bung wantaim. Taim yu skelim pinis ol dispela gutpela samting, askim yu yet olsem, ‘Mi wok long bihainim dispela singaut bilong Jisas olsem: “Kam long mi”?’

[Ol Piksa long pes 11]

Olsem wanem? Ol narapela wok samting i pasim yu long go long ol miting?