Yu Save Mekim Wanem Kain Pasin?
1 Laspela tok Pol i raitim long pas em i salim long kongrigesen long Filipai, i olsem: “Marimari bilong Bikpela Jisas Krais em i ken i stap wantaim spirit [olsem pasin] bilong yupela wan wan.” (Fl 4:23) Pol i mekim gutpela tok amamas long ol, long wanem, ol i save givim bel tru long autim gutnius, na ol i save sori long ol narapela na wokim rot bilong helpim ol.—Fl 1:3-5; 4:15, 16.
2 Yumi tu i mas i gat laik long kamapim wankain tingting o pasin insait long kongrigesen bilong yumi. Taim olgeta long kongrigesen i givim bel long mekim wok, na helpim ol narapela, na singautim ol brata sista i kam long haus bilong ol, dispela i kamapim gutpela pasin insait long kongrigesen em ol narapela inap lukim long ples klia. Sapos yumi tingting stret long ol samting na yumi laikim tru ol narapela, dispela bai helpim kongrigesen long stap wanbel wantaim na stap strong long ol samting bilong spirit. (1 Ko 1:10) Tasol sapos yumi save tingting nogut long ol samting, dispela bai mekim ol narapela i bel hevi na ol i no givim bel long mekim wok.—KTH 3:15, 16.
3 Ol Elda i Mas Go Pas: Ol elda i gat wok long amamas na tingim ol gutpela samting bilong ol wan wan elda yet na kongrigesen bilong ol. Bilong wanem ol i mas mekim olsem? Long wanem, tingting na pasin bilong ol elda inap helpim o nogutim kongrigesen. Yumi amamas long ol elda i givim bel long wok autim tok, na taim ol i gude long yumi pes bilong ol i lait na ol i pren gut wantaim yumi, na maski ol i givim tok long yumi yet o long taim ol i sanap long pletfom, tok bilong ol i strongim bel bilong yumi.—Hi 13:7.
4 Tasol i no ol elda tasol i mas mekim wok; yumi olgeta i mas helpim kongrigesen long pren gut wantaim, na singautim ol brata sista i kam long haus bilong yumi, na givim bel long wok autim tok, na tingim ol samting bilong spirit. Yumi olgeta wan wan i mas kamapim gutpela pasin sori long ol narapela. (1 Ko 16:14) Yumi no ken tingim krismas o skin bilong ol narapela, o ol i gat bikpela save o nogat, o ol i rabis long ol samting bilong skin o nogat, na skelim ol long dispela samting. Nogat. (Skelim wantaim Efesus 2:21.) Yumi gat gutpela samting tru bilong wetim i kamap, na dispela inap kirapim yumi long kamapim pasin bilong amamas, na singautim ol brata sista i kam long haus bilong yumi, na givim bel long wok autim tok.—Ro 12:13; Kl 3:22, 23.
5 Olgeta man i bung wantaim yumi, em ol nupela tu, yumi mas amamas tru long lukim ol na bai ol i ken pilim olsem yumi laikim tru ol brata sista bilong yumi. Yumi autim tok na kamapim ol gutpela pasin Kristen, na long dispela rot yumi kamapim klia olsem kongrigesen “i olsem strongpela pos i karim tok tru.” (1 Ti 3:15) Yumi stap strong long spirit, long wanem, “bel isi God i save givim yumi” i lukautim bel na tingting bilong yumi. (Fl 4:6, 7) Gutpela sapos yumi olgeta i wok strong long mekim gutpela pasin, na bai marimari bilong Jehova i ken stap wantaim yumi long rot bilong Bikpela Krais Jisas.—2 Ti 4:22.