Redi Long Mekim Rivyu Bilong Raitim
1 Wanpela bikpela samting bilong Skul Bilong Wok Autim Tok, em rivyu bilong raitim. Dispela rivyu i save kamap 3-pela taim long olgeta yia—long pinis bilong Epril, Ogas, na Disemba. Long ol yia i go pinis, Sosaiti i save wokim pepa bilong rivyu i gat ol askim long en na hap spes bilong raitim ol bekim. Tasol nau yumi raitim ol bekim long narapela hap pepa. Na tu, yumi save kisim dispela pepa paslain long taim bilong mekim rivyu—yumi no kisim long taim stret bilong mekim rivyu.
2 Kirap long nau, bai ol i putim pepa bilong ol askim insait long Wok Kingdom Bilong Yumi bilong Epril, Ogas, na Disemba—em ol mun bilong mekim rivyu bilong raitim. Olsem na bai yumi kisim pepa bilong ol askim inap 3-pela o 4-pela wik paslain long taim bilong mekim rivyu. Taim ol brata i givim Wok Kingdom long yumi, ol i mas givim dispela pepa wantaim. Wasman bilong Skul i no ken holim ol dispela pepa inap long wik bilong mekim rivyu. Olgeta wan wan i mas lukautim gut pepa bilong ol yet, na bringim i kam long miting long taim bilong mekim rivyu.
3 Bai yumi kisim dispela pepa paslain long taim bilong mekim rivyu, olsem na yumi olgeta i gat rot bilong painim bekim bilong ol askim na redi gut. Tru, yumi mas lusim liklik hap taim long mekim olsem, tasol sapos yumi redi gut pastaim, dispela bai helpim yumi long kisim gut ol tok. Taim yumi lukim ol buk samting ol i bin kisim ol askim long en, yumi no ken raitim sampela tok long pepa bilong ol askim, long wanem, yumi bai mekim wok long dispela pepa long taim bilong mekim rivyu. Na tu, yumi mas tingim dispela samting: Long taim bilong rivyu bilong raitim, yumi ken lukim Baibel tasol—ol narapela buk o hap pepa yu bin rait long en, nogat.
4 Insait long ol minit bilong raitim ol tok bilong rivyu, yu mas holim narapela hap pepa bilong raitim ol bekim. Tasol i gat sampela askim em bekim bilong en i olsem “i stret” o “i no stret,” na i gat sampela askim em yumi mas katim wanem bekim i stret. Long kain askim olsem, yumi ken makim ol tok long pepa bilong ol askim; laik bilong wan wan. Long ol narapela kain askim, kamapim stret ol bekim, na raitim liklik tok tasol. Sapos yu redi gut pastaim, bai yu no hatwok tumas. Taim wasman bilong Skul i kamapim ol bekim, olgeta wan wan i ken stretim pepa bilong ol yet.
This article is unique to PNG.