Ol Wanples Bai Ting Olsem Wanem?

¹ Sapos yu askim ol man, ‘Pasin bilong pret long ol wanples i bosim i stap bilong yu?’ ating planti man bai bekim tok, ‘Nogat.’ Long sampela samting tok bilong ol em i stret. Ol wanples i no save bosim yu long ol samting bilong kaikai, klos, wanem kain ka yu draivim, o samting yu bilip long en, nogat.

² Tasol olsem wanem taim yu laik mekim wok long bilip bilong yu​—⁠olsem bihainim lotu bilong yu? Ating nau bikpela traim inap painim yu. Dispela samting em i tru moa yet sapos planti man long hap bilong yu ol i bilong wanpela lotu tasol. Sapos yu sem o pret long ol wanples bai ting olsem wanem o tok olsem wanem, dispela inap mekim na yu bel hevi tru.

³ Sapos man i senisim lotu bilong em, na ol man long ples ol i orait long dispela lotu o planti man long ples ol i bilong dispela lotu, ating samting dispela man i mekim bai i no bikpela samting tumas long ol. Tasol sapos man i lusim lotu bilong em na kamap wanpela Witnes Bilong Jehova, em nau, ating ol bai kros na birua long em.

⁴ Taim man i kisim stretpela save long ol lo bilong Baibel na long ol samting em i mas mekim bilong kisim laip oltaim, em i save senisim tru i stap bilong em. Tasol yu ting dispela samting i olsem gutpela as na bai ol man i ken mekim pasin birua? Ating nogat, a? Long wanem, tok i tru i save kirapim man long kamap gutpela man marit, na gutpela wokman, na i kirapim bisnisman long mekim stretpela pasin. Ol meri i kamap gutpela meri marit, na gutpela mama, na ol i kirap mekim gutpela pasin long ol man i stap klostu, na ol i stap amamas. As bilong dispela i olsem: Ol i wok long painim Kingdom pastaim wantaim stretpela pasin bilong God, na ol i stretim tru pasin bilong ol na bai i stret wantaim ol gutpela lo bilong Baibel.​—⁠Mt 6:33; Ro 12:⁠2.

⁵ Planti tausen manmeri i bin stretim pasin bilong ol na lusim ol pasin nogut olsem pasin pamuk, kisim drak, stil, na kain samting olsem, long wanem, ol i save stadi long Baibel na bung wantaim ol Witnes Bilong Jehova. Tasol ol poroman bilong ol na famili bilong ol, ol i bin birua long ol. Bilong wanem ol i bin mekim olsem? Bilong wanem ol i no amamas olsem nau dispela man i stap gut long ai bilong God na ol man?

⁶ As na Sampela i Mekim Pasin Birua: Planti taim ol man i mekim pasin birua, long wanem, ol i no gat save. Ol yet i no stadi long Baibel, olsem na ol i no save long wanem samting i kirapim man long senisim pasin na wokabaut bilong em. Ating ol i ting olsem em i givim baksait pinis long ol olpela pren bilong em. Na sampela i mekim pasin birua, long wanem, ol i bin putim yau long sampela tok giaman ol man i save mekim long ol Witnes Bilong Jehova, olsem: ol i strong tumas long bihainim lotu, ol i save toktok long Baibel tasol, ol i laik daunim gavman, ol i bel nogut long ol narapela man, ol i no bilip long Krais, na kain tok olsem. Dispela i paulim tingting bilong ol na ating taim ol i mekim pasin birua ol i ting ol i mekim gutpela wok. Sapos Kristen i sanap strong, ating dispela bai helpim ol long save long tok i tru.

⁷ Taim aposel Pita i givim tok long ol man i bin kamap Kristen, em i kamapim narapela as na ol olpela poroman bilong ol Witnes ol i birua long ol, olsem: “Nau yupela i no save mekim ol dispela kain pasin nogut wantaim ol haiden. Na ol i save kirap nogut long dispela, na ol i tok nogut long yupela. Tasol bihain ol yet i mas sanap long kot bilong bikpela Jas na tokim em bilong wanem ol i bin mekim ol dispela pasin.” (1 Pi 4:​4, 5) Tok i tru i save kamapim pasin nogut bilong ol, na ol i kros long dispela. Tasol maski man i tok nogut long ol Witnes, dispela i no gutpela as na Kristen i ken kirap bihainim gen ol pasin nogut em i lusim pinis, nogat.

⁸ Na tu, yu mas save, taim yu kisim nem bilong Jehova na yu tokim ol man long Kingdom i stap long han bilong Krais Jisas, yu save helpim wanpela gavman i narapela kain na i gat wok long bosim dispela graun​—⁠em wanpela gavman bilong heven na em bai pinisim ol pasin nogut bilong nau. (Ap 17:31; Dan 2:44) Sapos yu mekim dispela wok, ol man bai birua long yu. Jisas i tokim ol disaipel bilong em: “Olgeta lain manmeri bai ol i bel nogut tru long yupela, long wanem, nem bilong mi em i stap long yupela.” Dispela nem i no nem “Kristen,” nogat. Dispela nem em bilong Krais, olsem “King bilong olgeta king,” na Kingdom bilong em bai bosim dispela graun long stretpela pasin.​—⁠Mt 24:9; KTH 19:⁠16.

⁹ Ol Samting Bilong Tingim: Ating yu save stadi Baibel wantaim ol Witnes Bilong Jehova, o ating yu wanpela nupela man i baptais. Olsem wanem? Yu pret long ol wanples bilong yu bai ting olsem wanem, na yu save tingting: ‘Bai mi inap mekim wok bilong God i go yet o nogat?’ Yu save tingim God, na yu ken bilip, God i save tingim yu. Em i laik bai yu stap oltaim, em i no laik bai yu dai. Em i laikim yu tru na em i tingim laip bilong yu em i bikpela samting. (Lu 12:​4-7; 21:​16-19) God i tok: “Bai mi no lusim yu. Bai mi no larim yu i stap nating. Nogat tru.” (Hi 13:⁠5) Olsem na sapos yu stap gut long God na wetim em i helpim yu, orait, em bai mekim olsem. Em i bin helpim ol narapela em ol i bin sanap strong.​—⁠2 Pi 2:​7-9.

¹⁰ Na askim yu yet: Ol wanples bilong mi i save long rot bilong kisim laip oltaim? Ol inap givim wanem samting tru long mi em inap stap oltaim? Taim mi poromanim ol pastaim na bihainim wokabaut bilong ol, mi bilip na wetim wanem gutpela samting bai kamap bihain? Ol i bin helpim mi long save long ol tok bilong God na long ol samting God i laik mekim bilong helpim ol man? Mi save tok i tru i stap we, olsem na mi mas holimpas dispela tok i tru, a?​—⁠Jo 6:⁠68.

¹¹ Na tingim dispela samting tu: Wok bilong ol Kristen em bilong helpim ol narapela. (Fl 2:⁠4) Sapos yu lusim tok i tru na yu kirap bihainim olpela pasin bilong yu, ating dispela inap amamasim ol birua bilong yu na ol bai ting ol i win tru, tasol yu ting dispela bai helpim tru ol? Yu ting dispela i makim olsem yu laikim tru ol? Ol wanples bilong Jisas ol i birua nogut tru long em, na ol brata wanblut tu bilong em ol i save tok nogut long em. Tasol em i save, i gat wanpela rot tasol bilong helpim ol, olsem: Em i mas stap gut long God na mekim ol samting Jehova i bin tokim em long mekim.​—⁠Mk 6:​1-6; Jo 7:​3-5.

¹² Olsem wanem sapos Jisas i bin lusim tok i tru na kirap bihainim ol man bilong graun? Bai olgeta manmeri i no gat rot long kisim laip oltaim, a? Tasol Jisas i wok long holimpas tok i tru, long wanem, em i laikim tumas ol manmeri​—⁠na ol birua tu bilong em. Em i stap gut long Jehova na long dispela rot olgeta manmeri inap kisim planti gutpela blesing.

¹³ Na tu, tingim dispela samting: Sapos ol Witnes Bilong Jehova long Jemani i no bin klia olgeta long wok politik na ami bilong Hitler, yu ting wanem samting inap painim ol? Ating bai ol i aninit tru long gavman bilong Hitler, na planti tausen manmeri long Jemani, nau ol i mekim wok bilong God, ating bai ol i no gat rot long harim tok i tru.

¹⁴ Na tu, ol man i save laikim ol man i gat strongpela bel na ol i no pret, tasol ol i save bel nogut long man bilong pret na surik. Long Namba 2 Pait long Jemani, wan wan Witnes tasol i bin givim baksait long bilip bilong ol taim ol i stap long ol banis kalabus. Ol Witnes i bin mekim olsem, ol ofisa Natsi i sanapim ol long ai bilong ol narapela kalabusman na ol i tok bilas long ol na rabisim ol olsem ol i man bilong tupela maus na man bilong pret. Ol i askim sampela: “Yu sakim pinis God bilong yu. Nau bai yu lotu long wanem god?” Sampela man i bin sakim bilip bilong ol, ol i salim ol i go long pait na ol i bagarap long pait na dai. Sampela narapela em God i no lukautim ol long wanem ol i surik, ol i no dai long dispela taim, tasol taim ol soldia bilong Rasia i kam long Jemani, ol i dai long han bilong ol dispela soldia.

¹⁵ Sapos yu laikim tru famili bilong yu, yu no ken lusim wok bilong God na pasin bilong bung wantaim lain bilong em. Yu save pinis long tok i tru. Ating famili bilong yu, na ol wanples, nogat. Yu gat wok bilong helpim ol olsem aposel Pol i tokim Timoti: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.”​—⁠1 Ti 4:⁠16.

¹⁶ Olsem wanem? Yu laikim tumas God Jehova na Pikinini bilong em Krais Jisas? Yu pilim tru ol gutpela samting ol i bin mekim bilong helpim yu? Sapos olsem, orait, yu mas stap gut long ol. Olsem gutpela papa bai tokim pikinini bilong em olsem em i no ken bagarapim nem bilong famili, Jehova i tokim yu yet: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Snd 27:11) Sapos yu stap gut long God, dispela bai givim biknem long God na God bai orait long yu. Man i pret na surik, em i save bagarapim nem bilong Jehova. Baibel i tok: “ ‘Stretpela man bilong mi em i bilip, olsem na em bai i stap laip. Na sapos em i surik, orait bai mi no amamas long em.’ Tasol yumi no man bilong surik na lus. Nogat tru. Yumi ol manmeri bilong bilip na kisim laip.”​—⁠Hi 10:​38, 39; Lu 9:⁠62.

¹⁷ Ol Samting Yu Ken Mekim Na Bai Yu Daunim Pret: Sapos pasin bilong pret long ol wanples i pasim rot bilong yu, yu ken mekim wanem? Ol man long Jerusalem ol i save birua nogut tru long ol tok bilong Jisas na bilong ol aposel. Brata bilong Jisas, em Jems, em i stap long Jerusalem em i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi. . . . Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em.”​—⁠Je 1:​2-5.

¹⁸ Olsem Jems i tok, sapos yu sot long gutpela tingting bilong winim wanpela traim, ating bai i olsem yu no gat rot, a? Tasol sapos yu beten askim God long helpim yu, em bai amamas long givim gutpela tingting long yu na strongim yu. (Fl 4:13) Na God i no save semim yu long wanem yu no gat strong o yu bin askim em long helpim yu, nogat; em bai givim planti samting long yu bilong helpim yu. Na yu no ken ting olsem hevi bilong yu em i liklik tumas na God bai ting yu mekim pasin kranki sapos yu kamapim dispela hevi long em, nogat.

¹⁹ Wanpela gutpela rot bilong yu ken daunim pasin bilong pret, em olsem: Bung wantaim ol narapela i gat strong na i no save pret. “I no gutpela long man i stap wanpis. Sapos tupela man i stap wantaim, em i gutpela. . . . Sapos wanpela i pundaun, orait narapela i ken litimapim em gen.” (Sav 4:​9, 10) No ken lusim pasin bilong bung wantaim ol Witnes Bilong Jehova long olgeta taim. Aposel Pol, em tu em i save em i mas kisim strong long ol brata Kristen bilong em.​—⁠Kl 4:11; skelim wantaim Rom 1:​11, 12.

²⁰ Sapos yu mekim ol dispela samting, yu ken bilip olsem Jehova bai helpim yu, na bai yu sanap strong. God bai sambai long yu. Bai em i no “lusim” yu. (2 Ko 4:​8, 9) Maski ol narapela i tok bilas long yu, dispela i no inap pasim sori bilong God na em i no tingim yu moa, nogat. Aposel Pol i tok: “God i save laikim yumi tru, na mi bilip tru olsem, i no gat wanpela samting inap pasim laik bilong God i kamap long yumi. Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim laik bilong God.”​—⁠Ro 8:​38, 39.

²¹ “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Ko 10:13) God i wokim rot olsem: Em i helpim yu na bai yu no ken pret na lusim bilip. Na em i helpim yu na bai yu no ken lusim em na lusim laip bilong yu, na ating laip bilong famili bilong yu na ol wanples tu. Long dispela rot bai yu win na stap amamas. “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.” Yu mas lusim dispela umben​—⁠em pasin bilong pret long ol man​—⁠na larim pasin bilong laikim tumas God i bosim i stap bilong yu; no ken pret long ol wanples.​—⁠Snd 29:⁠25.

This article is unique to PNG.