Painim Rot Long Autim Tok
1 Sapos yu save long pasin bilong toktok wantaim man, olsem wanem dispela inap helpim yu long wok bilong autim tok? Orait, sampela taim yu bin ting, i gat wanem as na oltaim sampela Witnes i save kisim ol gutpela ekspiriens? Ating ol yet i kirap na mekim toktok, a? Baibel i tok: “Ol man i gat gutpela tingting i save givim gutpela tingting long ol manmeri.”—Snd 15:7.
2 Tru yumi save autim tok long ol haus, tasol i gat planti narapela rot tu bilong yumi ken kirapim tok wantaim ol man na tokim ol long Jehova. Olsem: Ol mama Kristen i stap long haus, sapos wanpela man i kam long haus bilong ol bilong baim samting i go long ol o wanpela wanples i kam lukim ol, ol i ken kirap autim tok long em. Ating ol pikinini i gat rot long toktok wantaim ol wanskul bilong ol long ol tok bilong Baibel taim ol i wokabaut i go long skul o wetim klas i kirap. Na long ples wok, olsem long belo samting, ating ol wokman Kristen i ken autim tok long ol wanwok bilong ol. O taim yu wokabaut long pak o sanap long wanpela lain long stua bilong baim kaikai o wetim PMV, ating bai yu gat rot long toktok wantaim ol man long sampela tok bilong strongim ol. Long sampela kantri, em gavman i tambuim wok bilong autim tok bilong Kingdom, ol brata i save autim tok long kain kain taim na ples. Yumi save em gutpela rot bilong autim tok, long wanem, lain wokman bilong trupela God long ol dispela kantri ol i go bikpela hariap.
3 Taim yu laik kirapim tok wantaim man long kain kain taim na ples, yu ken mekim liklik tok tasol, na sapos yu mekim long pasin pren, em nau, ating rot bai op long yu ken autim tok. Jisas i makim gutpela rot yumi ken bihainim. Olsem: Long 12 klok belo samting, taim Jisas i sindaun malolo klostu long wanpela hul wara long Samaria, wanpela meri i kam bilong pulimapim wara. Em i tokim meri long kisim wara i kam, em i laik dring. Ol Juda i no save toktok wantaim ol Samaria, olsem na dispela i kirapim tingting bilong meri na em i kamapim wanpela askim. Jisas i bekim tok na tokim meri em i gat wara bilong givim laip oltaim. Dispela i kirapim meri long kisim sampela save moa. Em nau, rot i op long Jisas i autim tok long em. Tasol tingim dispela samting: Taim Jisas i laik kirapim tok, em i no mekim bikpela tok tumas; em i mekim liklik tok tasol long gutpela pasin pren na nau rot i op long em long autim tok.—Jo 4:5-42.
4 Yu tu yu inap kirapim kain tok olsem bilong strongim bel bilong man. Olsem: Taim yu wetim PMV ating yu ken tokim man long wanpela stori long nius i stori long wanpela hevi i bin kamap, olsem bikpela pait o samting man i bin mekim bilong bagarapim ples. Orait nau askim olsem: “Yu ting i gat wanem as na ol dispela hevi i go nogut tru? Yu ting wanpela taim bai kamap na ol man long olgeta hap bilong graun bai kisim gutpela sindaun?” O yu ken toktok long sampela hevi ol man long hap bilong yu ol i save tingting planti long en, na nau yu ken askim olsem: “Yu ting wanem samting inap stretim dispela hevi?” Em nau, rot i op long yu ken stori long rot tru bilong stretim ol hevi, em Kingdom bilong God. Tasol yumi mas bihainim gutpela tingting. Sapos man i no laik harim tok, no ken strong long em i mas harim. Tasol sampela man bai amamas long harim tok, wankain olsem dispela meri bilong Samaria.
5 Narapela rot bilong kirapim tok bilong Baibel wantaim man, em olsem: Putim ol buk samting bilong Baibel long wanpela hap na bai ol man i no hatwok long lukim. Sapos yu mekim olsem long haus bilong yu, ating ol man i kam lukim yu bai mekim sampela liklik tok long ol dispela buk, na nau rot bai op bilong autim tok long ol. Sapos yu skulmanki na yu putim wanpela buk o magasin long tebol bilong yu long skul, ating dispela bai kirapim ol wanskul bilong yu long askim olsem: “Em wanem samting?” Orait nau yu gat rot long autim tok. O sapos yu kaunim ol buk samting bilong Baibel taim yu malolo long belo o raun long PMV samting, ating sampela i lukim ol dispela buk bai ol i laik save, em wanem samting, na nau rot i op long yu ken autim tok bilong Kingdom.
6 Taim yu stori wantaim ol wantok, dispela tu inap opim rot bilong toktok wantaim ol long ol tok i tru bilong Baibel. Ol man i save amamas long stori stori long ol samting ol i bin mekim, na ol i bin i go we, na ol i bin harim wanem tok na lukim wanem samting, na ol i laik mekim wanem. Olsem na taim yu gat rot long toktok, ating yu tu yu ken stori long ol samting yu bin mekim, a? Taim yu go long wanpela kibung sekit, sapos yu tokim wanwok o wantok bilong yu, yu bin go long dispela kibung na yu kolim nem bilong pablik-tok, ating dispela inap kirapim em long kamapim askim. Olsem ol man i save toktok long ol samting ol i bin mekim, yu tu yu ken stori liklik long ol samting yu bin kaunim long Wastaua o Kirap! Sapos ol i laik kisim sampela save moa, ol bai tokim yu olsem, na nau yu gat rot long autim sampela tok moa. Taim yu toktok wantaim man na stiaim tok i go long ol samting God i laik mekim, kain tok olsem i save strongim bel bilong man.
This article has been taken partly from sg-E ch. 16, par. 11-16.