Ol Samting Yu Inap Mekim na Bai Ol Miting i Helpim Yumi
1 Ol miting i save helpim yumi long save gut long ol lo bilong Jehova, na ol i kirapim yumi long bihainim ol dispela lo. Ol miting i helpim yumi long mekim gut wok bilong autim tok. Na ol i helpim yumi long winim mak bilong kisim laip oltaim. I gat tripela samting yumi ken mekim na bai miting i ken helpim gut yumi. Olsem:
2 Yumi mas redi gut pastaim, bekim sampela tok, na bihainim ol tok yumi kisim save long en. Sapos yumi redim gut ol tok bilong miting, bai i no hatwok long bekim tok na yumi bai amamas long mekim. Taim yumi givim bel na amamas long bekim tok, dispela i save strongim na kirapim ol man i sindaun harim. (Ef 4:29) Sapos olgeta man i kam long miting i save olsem wanem ol inap bihainim ol tok ol i harim, ating ol bai kirap mekim wok long ol dispela tok.
3 Stadi Wastaua na Buk-Stadi: Dispela tupela miting ol i bikpela samting tru, long wanem, long rot bilong en lain ‘gutpela wokboi’ i givim kaikai long ol manmeri i bilip. (Mt 24:45-47) Olsem wanem? Yu save lusim hap taim long redim ol tok bilong miting? Yu redi long bekim tok?
4 Sapos yu bin redim gut ol tok bilong miting, bai yu redi long bekim tok na kisim bikpela amamas. (Ap 20:35) Katim sampela bikpela tok bilong Wastaua o buk bilong Buk-Stadi. Sapos yu kaunim ol skripsa em Wastaua o buk i no bin kamapim tok bilong en, na tingim olsem wanem ol dispela skripsa i stret wantaim ol tok bilong paragraf, dispela bai helpim yu long save olsem wanem ol dispela skripsa i as bilong ol bekim. Olsem wanem? Yu inap bekim tok long toktok bilong yu yet, o yu save kaunim tasol ol bekim? Taim yu stadi, bel bilong yu i mas pilim gut ol tok na kirapim yu long bihainim.—Snd 2:5; 4:7, 8.
5 Skul Bilong Wok Autim Tok na Miting Bilong Wok: Taim ol i makim yu long mekim wanpela tok long Skul, yu pilim olsem Jehova yet i bin makim yu long mekim dispela tok? Na taim yu redim tok bilong yu, yu tingim Jehova na yu redim? Yu mas save gut long ol tok yu laik kamapim, na kamapim gut na bai ol brata i amamas long harim. Tasol sapos i no taim bilong yu long mekim tok, gutpela sapos yu kaunim ol hap bilong Baibel em sedyul bilong Skul i makim, na kaunim ol narapela tok bilong Skul. Yu mas mekim olsem tu long Miting Bilong Wok. Sapos yu redi gut pastaim, orait, long taim bilong miting bai yu inap putim tingting i go long ol tok brata i mekim, na yu no ken hatwok long kisim save long ol tok bilong miting. Sapos yu lukautim wanpela hap i gat ol askim na bekim, yu mas redim sampela gutpela askim i kamapim gut ol bikpela tok.
6 Pasin bilong mekim ol soim long Miting Bilong Wok na ol tok long Skul i mas stret wantaim ol samting i save kamap long hap bilong yupela. Sapos ol i makim yu long mekim wanpela tok samting, yu mas traim traim planti taim. (Wasman siaman i mas save, ol brata sista i mekim soim, ol i bin lainim gut o nogat.)
7 Papamama i mas helpim pikinini bilong ol long redi bambai ol inap bekim tok long toktok bilong ol yet. Sapos olgeta brata sista i kamap long miting paslain long taim miting i kirap, na sapos ol i redi long bekim tok, ol brata sista bai amamas long ol tok i kamap long miting na ol dispela tok bai kirapim tingting na bel bilong ol. Olsem wanem? Bai yu wok strong bambai ‘olgeta samting yu mekim i ken strongim [kongrigesen]’?—1 Ko 14:26.
This is a repeat of article in km 7/92 taken from km-E 7/90 “Your Part in Making Meetings Beneficial.”