Jehova i Skelim Yumi—Bilong Wanem Dispela Em i Gutpela Samting?
1 Olgeta man i laik bai ol i ken i stap strong long skin—no gat sik. Dispela i helpim ol long i stap amamas. Tasol maski ol man i stap strong long skin, sampela taim ol i go lukim dokta. Ol i laik save, sampela sik i wok long kamap na ol i mas stretim o nogat. Tasol bikpela samting moa, em yumi mas lukautim yumi long ol samting bilong spirit. Bilong Jehova i ken orait long yumi, yumi mas stap strong long bilip.—Ta 1:13, NW.
2 Nau em i taim stret bilong Jehova i skelim yumi, long wanem, Jehova i stap long haus holi bilong em na em i wok long skelim bel bilong olgeta man. (Sng 11:4, 5; Snd 17:3) Olsem Devit, yumi tu i laik askim Jehova long skelim gut yumi: “God, traim olgeta pasin bilong mi. Na skelim bel na tingting bilong mi.”—Sng 26:2.
3 Yumi mas was gut—sin i stap long skin bilong yumi, olsem na ol samting i stap long tingting bilong yumi em inap bagarapim yumi long spirit. Sindaun 4:23 i tok: “Gutpela tingting bilong stiaim laip bilong yu, em i save kamap long tingting bilong yu . . . Olsem na olgeta taim yu mas was gut tru long tingting bilong yu.”
4 Pasin nogut bilong graun, em yumi stap namel long en, dispela tu inap bagarapim yumi long spirit. Sapos yumi laikim sampela pasin bilong dispela graun, na yumi kirap na bihainim tingting na pasin bilong ol man bilong dispela graun, em nau, tingting bilong graun inap daunim yumi olgeta.—Ef 2:2, 3.
5 Bilong bagarapim yumi long spirit, ating Satan bai kirapim ol man long birua long yumi. Tasol planti taim Satan i mekim wok long ol amamas bilong dispela graun bilong pulim yumi. Pita i tok yumi mas “stap redi na was gut,” long wanem, Satan ‘i olsem wanpela laion i save raun bilong painim ol manmeri bilong kaikai.’ Yumi mas “stap strong long bilip na sakim em.”—1 Pi 5:8, 9.
6 Bilong stap strong long spirit, yumi mas wok long strongim bilip bilong yumi. Aposel Pol i tok, oltaim yumi mas traim bilip bilong yumi. Yumi save bihainim ol gutpela tok dokta i givim bilong helpim yumi, na olsem tasol, taim Jehova i skelim yumi long ol samting bilong spirit na samting yumi mas stretim i kamap ples klia, em nau, yumi kirap na bihainim ol tok Jehova i givim long yumi bilong stretim yumi.—2 Ko 13:5, 11, NW.
7 Tru tumas, Jehova em i nambawan Man bilong skelim yumi. Em i save tru long rot bilong helpim gut yumi. Long rot bilong Baibel na ‘gutpela wokboi’ em i givim ol gutpela kaikai bilong spirit long yumi. (Mt 24:45; 1 Ti 4:6) Sapos oltaim yumi kisim dispela gutpela kaikai, long haus na long ol miting, dispela bai helpim yumi long stap strong long spirit. Na sapos oltaim yumi autim tok na mekim ol narapela wok Kristen, dispela tu bai helpim yumi. Olsem na taim Jehova i skelim yumi, yumi amamas, long wanem, yumi bilip olsem em bai mekim olgeta samting bilong helpim yumi long stap strong long spirit.