Bihainim Tok Bilong Baibel Long Pasin Bilong Lukautim Helt
“Yupela i mas laikim God, Bikpela bilong yumi . . . long tingting bilong yupela na long strong bilong yupela.”—MK. 12:30.
1. Wanem laik bilong God long pastaim tru?
EM I no laik bilong God Jehova long ol man i kisim sik na i dai. God i putim Adam tupela Iv long gaden Iden bilong ol “i ken i stap na lukautim dispela gaden” inap oltaim oltaim, na i no bilong i stap 70 o 80 yia tasol. (Stt. 2:8, 15; Sng. 90:10) Sapos dispela namba wan man na meri i bin stap gut long Jehova na daun long wok bos bilong em, ol i no inap kisim sik, hevi bilong man i go lapun, na i dai.
2, 3. (a) Wanem ol samting i save painim ol lapun? (b) Dai yumi kisim long Adam em asua bilong husat? Olsem wanem dispela bai pinis?
2 Saveman sapta 12 i stori long “taim nogut” i save painim ol man i gat sin taim ol i kamap lapun. (Ritim Saveman 12:1-7.) Em i tok ‘gras bilong ol lapun i kamap waitpela. Lek bilong ol i no gat strong na i krungut. Ai bilong ol i nogut na ol i no inap lukluk gut. Ol i gat wan wan tit tasol i stap na ol i no inap kaikai strongpela kaikai.’
3 Ol dispela samting i painim ol man em i no laik bilong God. Nogat. Na tu, dai yumi kisim long Adam, em wanpela bilong ol “wok bilong Satan” em Pikinini Bilong God bai rausim long rot bilong Kingdom Bilong Mesaia. Aposel Jon i tok: “Pikinini Bilong God i bin kamap ples klia bilong bagarapim na rausim wok bilong Satan.”—1 Jo. 3:8.
I Stret Yumi Tingim Helt Bilong Yumi
4. Bilong wanem ol wokboi bilong Jehova i save tingim helt bilong ol? Ol i save long wanem samting?
4 Long nau, sampela wokboi bilong Jehova i karim ol hevi bilong sik na lapun em dispela samting i save painim ol man i gat sin. Olsem na taim yumi sik, i stret yumi tingim gut helt bilong yumi na dispela inap helpim yumi. Yumi laik mekim wok bilong Jehova long “strong olgeta” bilong yumi, a? (Mk. 12:30, NW) Tasol taim yumi mekim ol samting bilong lukautim helt bilong yumi, yumi mas i gat stretpela tingting na luksave olsem maski yumi mekim wanem samting, bai yumi go lapun yet na sampela sik bai painim yumi.
5. Stori bilong ol gutpela wokboi bilong God i gat sik i lainim yumi long wanem samting?
5 Planti gutpela wokboi bilong Jehova i bin karim hevi bilong sik. Epafroditus em wanpela bilong ol. (Fl. 2:25-27) Timoti, gutpela poroman bilong aposel Pol, i gat sik long bel na Pol i tokim em long “dring liklik wain” bilong kisim helpim. (1 Ti. 5:23) Pol yet i gat ‘nil i save sutim skin bilong em,’ ating em wanpela sik bilong ai o narapela sik i no gat rot bilong oraitim long dispela taim bipo. (2 Ko. 12:7; Ga. 4:15; 6:11) Pol i beten strong long Jehova long dispela ‘nil i save sutim skin bilong em.’ (Ritim 2 Korin 12:8-10.) God i no wokim mirakel na rausim dispela ‘nil i save sutim skin bilong em.’ Nogat. God i givim strong long em long karim dispela hevi. Strong bilong Jehova i kamap ples klia taim Pol i no gat strong. Olsem wanem? Dispela stori inap lainim yumi long sampela samting?
Kisim Stretpela Tingting Long Pasin Bilong Lukautim Helt
6, 7. Bilong wanem yumi no ken tingting tumas long helt bilong yumi?
6 Olsem yu save, ol Witnes Bilong Jehova i orait long planti kain marasin na pasin bilong oraitim sik. Planti taim nius Kirap! i gat ol stori long ol samting bilong helt. Na maski yumi no tok wanpela marasin o rot bilong oraitim sik i winim ol arapela, yumi amamas long helpim yumi kisim long ol dokta na nes na long pasin bilong ol long wok gut wantaim yumi. Tru, yumi save olsem long dispela taim nau yumi no inap abrusim olgeta kain sik. Olsem na yumi no ken bihainim tingting bilong ol man husat “i no wetim wanpela gutpela samting,” em ol i ting yumi bilong stap nau tasol na ol i orait long olgeta kain marasin o pasin bilong oraitim sik. (Ef. 2:2, 12, NW) Yumi no laik tru long mekim samting em Jehova i no orait long en bilong lukautim laip bilong yumi long nau. Yumi bilip olsem sapos yumi stap gut long God, bai yumi “kisim dispela laip em i laip tru,” em laip oltaim long nupela taim em i tok promis long kamapim.—1 Ti. 6:12, 19; 2 Pi. 3:13.
7 Long sampela kantri, ol man i save tingting tumas long helt bilong ol. Pasin bilong tingting tumas long helt inap mekim na man i kisim pasin bilong tingim em yet tasol. Pol i mekim tok lukaut long dispela samting taim em i tokim ol Filipai long ‘ol i no ken lukautim ol samting bilong ol tasol. Nogat. Ol i mas lukautim ol samting bilong ol arapela manmeri na helpim ol long i stap gut.’ (Fl. 2:4) Em i gutpela long yumi lukautim yumi yet, tasol sapos yumi tingim ol brata bilong yumi na ol manmeri yumi “autim dispela gutnius bilong kingdom” long ol, dispela bai mekim na yumi no tingting tumas long helt bilong yumi yet.—Mt. 24:14.
8. Pasin bilong tingting tumas long helt bilong yumi inap mekim wanem long yumi?
8 Sapos Kristen i tingting tumas long helt bilong em, dispela inap mekim na ol wok bilong Kingdom i kamap namba tu samting. Pasin bilong tingting oltaim long helt inap mekim na yumi strong long ol narapela i mas bihainim tingting bilong yumi long sampela rot bilong oraitim sik o kisim ol vaitamin o heb samting. Tingim stiatok i stap long tok bilong Pol: “Yupela inap skelim gut wanem ol samting i bikpela samting moa, na bai yupela i stap klin tru na i no pundaunim ol arapela i go inap long de bilong Krais.”—Fl. 1:10, NW.
Wanem Samting i Bikpela Samting Moa?
9. Wanem wanpela bikpela samting yumi no ken lusim? Bilong wanem yumi no ken lusim?
9 Sapos yumi tingim ol samting i bikpela samting moa, bai yumi givim bel long wok bilong helpim ol man long pas gut wantaim God. Yumi mekim dispela long rot bilong autim na skulim ol man long Tok Bilong God. Dispela gutpela wok i helpim yumi yet na ol man yumi lainim ol. (Snd. 17:22; 1 Ti. 4:15, 16) Sampela taim nius Wastaua na Kirap! i gat stori bilong ol brata na sista bilong yumi husat i gat bikpela sik. Sampela taim ol dispela stori i kamapim ol samting ol i save mekim bilong karim hevi bilong ol o lusim tingting inap liklik taim long ol hevi bilong ol yet long rot bilong helpim ol narapela long save long Jehova na ol gutpela tok promis bilong em.a
10. Bilong wanem yumi mas tingim ol rot yumi makim bilong oraitim sik?
10 Taim ol Kristen i sik, olgeta wan wan i mas ‘karim hevi bilong pasin em yet i mekim’ taim em i makim wanem kain marasin samting em bai kisim. (Ga. 6:5) Tasol yumi mas tingim olsem rot yumi makim bilong stretim sik i bikpela samting long Jehova. Ol stiatok bilong Baibel i kirapim yumi long abrusim blut, na olsem tasol pasin bilong tingim tru Tok Bilong God i mas kirapim yumi long sakim olgeta kain rot bilong oraitim sik i no stret wantaim tok bilong Baibel o i bagarapim pasin bilong yumi long pas gut wantaim Jehova. (Ap. 15:20) Sampela pasin bilong glasim na oraitim sik i wankain olsem sampela wok bilong ol spirit nogut. Jehova i no orait long ol Israel i tromoi pinis lotu i tru em ol i “mekim wok long narapela kain strong,” olsem wok bilong ol spirit nogut. Em i tok: “Yupela i no ken hatwok nating na bringim ol ofa long mi. Long wanem, mi les pinis long ol ofa bilong yupela. Na smel bilong paura yupela i save kukim i kamapim smel nogut tasol long nus bilong mi. Yupela i mekim lotu bilong nupela mun na bilong de sabat na ol narapela bung bilong lotu, tasol mi no laik lukim moa, long wanem, yupela i mekim wok long narapela kain strong.” (Ais. 1:13; NW) Taim yumi sik, dispela i no taim bilong mekim samting em inap pasim Jehova long harim beten bilong yumi na bagarapim pasin bilong yumi long pas gut wantaim God.—Kra. 3:44.
Pasin Bilong “Tingting Gut” i Bikpela Samting
11, 12. Olsem wanem pasin bilong “tingting gut” i helpim yumi long makim rot bilong oraitim sik?
11 Taim yumi sik, yumi no ken ting Jehova bai wokim mirakel na oraitim sik bilong yumi, tasol yumi ken beten askim em long givim savetingting na bai yumi ken makim marasin samting i stret long yumi. Yumi mas larim ol stiatok bilong Baibel na stretpela tingting i stiaim yumi long makim marasin samting. Sapos sik bilong yumi i bikpela, ating i gutpela long toktok wantaim tupela o tripela dokta, olsem Sindaun 15:22 i tok long en. Em i tok: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela. Sapos yu no mekim olsem, bai yu hatwok nating.” Aposel Pol i tokim ol Kristen tru long ‘tingting gut na wokabaut stret namel long ol manmeri bilong dispela graun.’—Ta. 2:12.
12 Planti manmeri long nau i gat wankain hevi olsem wanpela sikmeri long taim bilong Jisas. Long Mak 5:25, 26, Baibel i tok: “Wanpela meri i stap, em i save karim blut oltaim na i stap olsem inap long 12-pela yia. Dispela meri i bin lukim planti dokta, na ol i bin givim planti pen long em, na em i bin lusim olgeta mani bilong en bilong baim ol. Tasol sik bilong en i no orait liklik. Nogat.” Jisas i oraitim dispela meri na mekim pasin sori long em. (Mk. 5:27-34) Sampela Kristen i gat bikpela laik tru long painim rot bilong oraitim sik bilong ol, na dispela i mekim na ol i bihainim ol pasin bilong glasim o oraitim sik em ol dispela pasin i no stret wantaim ol stiatok bilong lotu i tru.
13, 14. (a) Olsem wanem Satan inap yusim rot yumi makim bilong stretim sik long bagarapim pasin bilong yumi long stap gut long God? (b) Bilong wanem yumi mas stap longwe long olgeta samting em wok bilong spirit nogut i insait long en?
13 Satan bai mekim olgeta kain samting bilong pulim tingting bilong yumi na bai yumi no tingim lotu i tru. Satan i save yusim pasin pamuk na pasin bilong laikim tumas mani kago bilong pundaunim sampela, na em i traim long bagarapim pasin bilong sampela long stap gut long God long rot bilong ol pasin bilong oraitim sik em ol wok bilong ol spirit nogut i insait long en. Yumi save beten askim Jehova long ‘kisim bek yumi long [“man,” NW] nogut’ na long olgeta kain pasin i no stret, olsem na yumi no ken larim Satan i bosim yumi na yumi insait long sampela wok bilong ol spirit nogut.—Mt. 6:13; Ta. 2:14.
14 Jehova i tambuim lain Israel long mekim pasin bilong glasman na posin marila samting. (Lo 18:10-12) Pol i tok “pasin bilong mekim olkain posin” em i wanpela “pasin bilong olpela bel.” (Ga. 5:19, 20) Na tu, “ol man i wokim posin na i yusim ol arapela kain pawa” ol bai i no inap i stap long nupela taim Jehova bai kamapim. (KTH 21:8) Tru tumas, ol samting i insait long wok bilong ol spirit nogut, maski em liklik samting tasol, em i samting nogut tru long ai bilong Jehova.
“Olgeta Man i Mas Save Olsem Yupela i Save Bihainim Gutpela Tingting”
15, 16. Bilong wanem yumi mas bihainim savetingting taim yumi makim rot bilong oraitim sik? Lain bilong bosim ol Kristen long bipo i givim wanem gutpela tok?
15 Olsem na sapos yumi gat tupela tingting long sampela pasin bilong glasim o oraitim sik, mobeta yumi sakim dispela. Sapos yumi no inap stori gut long olsem wanem wanpela rot bilong oraitim sik i wok, dispela samting tasol i no makim olsem em i samting bilong ol spirit nogut. Bilong yumi ken bihainim tok bilong Baibel long pasin bilong lukautim helt, yumi mas i gat stretpela tingting na savetingting i kam long God. Long Sindaun sapta 3, Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim. . . . Holim strong gutpela tingting na save bilong yu. Nogut yu lusim. Gutpela tingting na save bai i givim laip long yu na em bai i stap olsem gutpela bilas bilong yu.”—Snd. 3:5, 6, 21, 22.
16 Yumi laik lukautim gut helt bilong yumi, tasol yumi mas was gut, nogut God i no inap orait long yumi, long wanem, yumi bihainim sampela kain pasin bilong karim hevi bilong sik o bilong go lapun. Taim yumi lukautim helt bilong yumi na mekim ol narapela samting, yumi mas bihainim gutpela tingting na bai ‘olgeta man i save olsem yumi save bihainim gutpela tingting.’ (Fl. 4:5, NW) Long wanpela pas i gat bikpela tok, lain bilong bosim ol Kristen long bipo i bin tokim ol Kristen long abrusim pasin bilong lotuim God giaman, kisim blut, na pasin pamuk. Pas i mekim dispela gutpela tok tu: “Sapos yupela i lukaut gut na yupela i abrusim ol dispela pasin, em bai i gutpela. . . . Yupela i ken i stap gut.” (Ap. 15:28, 29) Ol i ken stap gut olsem wanem?
Lukautim Helt na Tingim Taim i No Gat Sik Moa
17. Olsem wanem pasin bilong bihainim ol stiatok bilong Baibel i bin helpim yumi long abrusim sik?
17 I gutpela sapos yumi olgeta i askim yumi yet olsem: ‘Mi luksave olsem pasin bilong mi long strong long bihainim ol stiatok bilong Baibel long sakim blut na pasin pamuk i bin helpim mi long stap gut?’ Tingim tu ol gutpela samting yumi bin kisim taim yumi wok strong long “rausim olgeta pasin doti bilong bodi na bilong spirit.” (2 Ko. 7:1) Taim yumi bihainim ol lo bilong Baibel long stap klin long skin, yumi inap abrusim planti sik. Yumi stap gut, long wanem, yumi no kisim smok na ol narapela drak i save bagarapim yumi long skin na spirit. Tingim tu olsem pasin bilong kaikai na dring inap long skel i helpim yumi long stap gut. (Ritim Sindaun 23:20; Taitus 2:2, 3.) Tru, pasin bilong malolo na eksasais inap helpim yumi long abrusim sik, tasol yumi stap gut long skin na long ol samting bilong spirit, long wanem, yumi bihainim ol lo bilong Baibel.
18. Wanem samting i mas i stap olsem nambawan samting yumi tingim? Yumi ken wetim truim bilong wanem tok profet long ol samting bilong helt?
18 Tasol nambawan bikpela samting, yumi mas lukautim yumi yet long ol samting bilong spirit na wok long strongim pasin bilong yumi long pas gut wantaim Papa bilong yumi long heven, em Man i givim ‘dispela laip nau, na laip yumi bai kisim bihain tu’ long nupela taim em bai kamapim. (1 Ti. 4:8; Sng. 36:9) Long nupela taim God bai kamapim, ofa bilong Jisas bai tekewe ol sin bilong yumi na long dispela rot bai yumi kamap orait olgeta long skin na long ol samting bilong spirit. Pikinini Sipsip Bilong God, Krais Jisas, bai bringim yumi i go long “ol hul i gat wara i kamap, em wara bilong givim laip,” na God bai mekim drai wara long ai bilong yumi. (KTH 7:14-17; 22:1, 2) Na tu, dispela gutpela tok profet bai kamap tru long yumi, em i tok: ‘I no gat man i stap bai i tok olsem, “Mi gat sik.” ’—Ais. 33:24.
19. Yumi lukautim helt bilong yumi na yumi ken bilip tru long wanem samting?
19 Yumi bilip olsem de bilong kisim bek yumi i klostu, na yumi wetim taim we Jehova bai pinisim sik na indai. Tasol long nau yumi bilip tru olsem gutpela Papa bilong yumi em bai helpim yumi long karim hevi bilong ol pen bilong yumi, long wanem, ‘em i save wari long yumi.’ (1 Pi. 5:7) Olsem na gutpela sapos yumi lukautim gut helt bilong yumi, tasol yumi mas mekim long pasin i stret wantaim ol stiatok i stap long Baibel!
[Futnot]
a Lista bilong ol kain stori olsem i stap long Wastaua bilong Septemba 1, 2003, long blok i stap long pes 17.
Sampela Askim
• Em asua bilong husat na yumi kisim sik? Husat bai rausim ol samting nogut sin i save kamapim?
• I stret yumi tingim helt bilong yumi, tasol yumi mas abrusim wanem pasin?
• Bilong wanem rot yumi makim bilong oraitim sik i bikpela samting long Jehova?
• Long sait bilong lukautim helt, olsem wanem pasin bilong bihainim ol stiatok bilong Baibel inap helpim yumi?
[Piksa long pes 23]
God i no wokim ol man bilong kisim sik na kamap lapun
[Piksa long pes 25]
Maski lain bilong Jehova i gat sik, ol i kisim amamas long wok autim tok