Karim Hevi Bilong Wanpela Sik i Kamap Wantu

Olsem wanem? Wantu yu kisim wanpela sik we i wok long go bikpela moa? Sapos olsem, ating yu save long hau hevi bilong sik inap daunim man—mekim man i tingting planti, bel i no stap isi, na em i tromoi bikpela mani long dokta na marasin. Wanem samting inap helpim yu long karim dispela hevi? Hau yu inap helpim wanpela long famili o pren husat i gat sik? Baibel i no wanpela buk bilong stori long marasin o rot bilong stretim ol hevi bilong sik, tasol em i gat ol gutpela stiatok we inap helpim yu long karim hevi long kain taim olsem.

Sampela rot bilong helpim yu long karim hevi bilong sik

• Painim gutpela dokta bilong stretim sik

  Baibel i tok: “Ol man i no gat sik ol i no save go lukim dokta, tasol ol sikman ol i save go lukim dokta.”​—Matyu 9:12.

  Rot bilong bihainim dispela tok: Painim ol dokta em ol inap helpim yu, sapos i gat wok long mekim olsem.

  Traim dispela: Painim gutpela dokta na marasin samting long hap bilong yu. Sampela taim, em i savetingting long kisim tingting bilong narapela narapela dokta. (Provep 14:15) Tokaut klia long ol dokta long sik bilong yu—yu mas kliagut long ol samting ol i toktok long en na yu mas tokim ol klia long hau yu pilim long sik bilong yu. (Provep 15:22) Kisim save gut long sik bilong yu, na tu, olgeta tritmen em yu ken makim bilong kisim. Sapos yu kliagut long wanem ol samting sik bilong yu bai kamapim, yu bai redi long karim hevi bilong bel na tingting i no stap isi na yu wokim ol gutpela disisen long wanem tritmen yu bai kisim.

• Ol samting yu ken mekim bilong lukautim gut helt

  Baibel i tok: “Eksasais i gutpela bilong bodi bilong yu.”​—1 Timoti 4:8, Contemporary English Version.

  Rot bilong bihainim dispela tok: Yu inap stap helti sapos yu lukautim gut helt bilong yu, olsem mekim eksasais long olgeta taim.

  Traim dispela: Eksasais long olgeta taim, kisim gutpela kaikai, na slip gut inap long mak stret. Ating yu wok long lain long karim ol hevi bilong sik bilong yu, tasol ol dokta i wanbel olsem sapos yu lusim taim na strong long mekim ol samting bilong lukautim helt bilong yu, dispela bai kamapim gutpela samting. Wanem wanem rot yu bihainim, yu mas tingim gut helt bilong yu na mekim, nogut em i mekim sik bilong yu i go bikpela moa.

• Kisim helpim long ol narapela

  Baibel i tok: “Trupela pren i save soim pasin laikim long olgeta taim na em i kamap olsem brata bilong yu long taim bilong hevi.”​—Provep 17:17.

  Rot bilong bihainim dispela tok: Ol pren bilong yu inap helpim yu long karim hevi bilong sik.

  Traim dispela: Toktok wantaim pren yu trastim tru we yu inap kamapim olgeta filings bilong yu long em. Taim yu mekim olsem dispela inap helpim yu long daunim hevi bilong tingting planti na yu bai stap amamas. Ol pren na famili i laik helpim yu, tasol ating ol i no inap save wanem samting ol i ken mekim. So tokim ol klia long wanem samting ol i ken mekim bilong helpim yu. Tasol holim stretpela tingting long samting yu ekspektim, na tok tenkyu long ol long helpim bilong ol. Na tu, yu mas putim sampela lo, olsem makim taim long ol pren i ken kam visitim yu na hamas aua o minit samting ol i ken stap, long dispela rot yu no pilim presa tumas long ol samting ol i mekim.

• Holim stretpela tingting

  Baibel i tok: “Bel i save stap amamas, em i gutpela marasin, tasol sapos bel na tingting bilong man i bagarap, dispela i save pinisim strong bilong em.”​—Provep 17:22.

  Rot bilong bihainim dispela tok: Pasin bilong holim stretpela tingting na bilip olsem yu bai kamap orait, dispela bai helpim yu na tingting na bel bilong yu bai stap isi na yu karim hevi bilong sik.

  Traim dispela: Taim yu wok long lain long nupela senis long sindaun bilong yu, putim tingting long samting em yu inap mekim, na i no long ol samting yu no inap mekim. No ken skelim yu yet wantaim ol narapela o no ken skelim i stap bilong yu long bipo wantaim nau taim yu kisim sik. (Galesia 6:4) Putim ol mak i stret long helt bilong yu we yu inap winim—dispela inap helpim yu long bilip olsem bihain gutpela samting bai kamap. (Provep 24:10) Mekim ol samting bilong helpim ol narapela, sapos yu inap long mekim. Amamas yu bai kisim long pasin bilong givim samting inap helpim yu na yu no tingting tumas long hevi bilong yu.​—Aposel 20:35.

Yu ting God bai helpim yumi long karim hevi bilong sik?

Baibel i tok olsem Jehova Goda inap helpim man long karim ol hevi bilong sik. God i no inap mekim mirakel na oraitim yumi, tasol ol manmeri i lotuim God ol inap kisim helpim i kam long em taim ol i bihainim ol dispela rot:

Bel isi. Jehova i inap givim “bel isi bilong God i winim tru tingting bilong man.” (Filipai 4:6, 7) Dispela bel isi, o tingting na bel i stap isi, inap helpim man long daunim ol hevi bilong wari na tingting planti. God i save givim dispela bel isi long ol manmeri husat i save prea long em na kamapim ol wari bilong ol.​—1 Pita 5:7.

Savetingting. Jehova inap givim savetingting long yumi bilong mekim ol gutpela disisen. (Jems 1:5) Man i kisim dispela kain savetingting taim em i lainim na bihainim ol stiatok bilong Baibel we inap helpim em.

Ol gutpela samting yumi wetim bai kamap bihain i strongim yumi. Jehova i tok promis long wanpela taim bai kamap bihain we “i no gat wanpela man i stap long dispela ples bai tok: ‘Mi sik.’” (Aisaia 33:24) Dispela gutpela samting yumi wetim long en i helpim planti man long holim stretpela tingting maski ol i karim ol hevi long ol bikpela sik.​—Jeremaia 29:11, 12.