Nupela Program Bilong Ol Kibung
1 Kirap long Februeri, ol kibung sekit bai i gat nem olsem “Harim na Bihainim Tok Bilong God.” Dispela nem, ol i bin kisim long Lo 31:12, 13, em i as bilong dispela program na olgeta tok bai skulim yumi long ol samting yumi mas lainim na bihainim.
2 Klostu olgeta manmeri long nau i wok long harim ol tok giaman bilong ol spirit nogut, tasol bikpela samting tru em yumi wan wan i mas harim Tok Bilong God na lain long bihainim. (Lu 11:28; 1 Ti 4:1) Olsem na ol i kamapim dispela program bilong kibung sekit bilong strongim na helpim ol pablisa, ol famili, ol elda, na ol painia. Long Sarere, bai i gat wanpela tok i gat 4-pela hap, nem bilong en, “Putim Yau Long Tok Bilong God—Dispela i Helpim Yumi Long Winim Hevi.” Na long Sande long moningtaim, bai i gat wanpela tok i gat 4-pela hap, nem bilong en, “Olsem Wanem Baibel i Skulim Yumi Long Bihainim Stretpela Pasin.” Program olgeta bai strongim yu wantaim famili bilong yu long samting bilong spirit na mipela i laik bai yupela i mas kam harim.
3 Long Sarere na Sande, bai ol i givim sampela gutpela tok long yumi bilong helpim yumi long wok autim tok, na bai i gat ol soim. Bai yumi harim sampela ekspiriens na bai ol i toktok wantaim sampela brata sista, na dispela bai skulim na strongim yumi. Sapos yumi go long kibung na yumi harim gut ol tok, long wanem, yumi tingting long bihainim ol samting yumi lainim, bai yumi inap tru long bihainim olgeta lo bilong Tok Bilong God.
4 Kirap long Februeri, program bilong ol bikpela de kibung bai i gat dispela nem, “Winim Mak Olsem Wokman Bilong Gutnius.” (Skelim wantaim 2 Korin 3:5.) Yumi lain bilong Jehova, olsem na yumi mas was gut long ol pasin yumi mekim. Bai yumi harim sampela gutpela ekspiriens bilong ol yangpela, em ol bai stori long olsem wanem ol i bin sakim ol wanlain. Ol papamama bai harim sampela gutpela tok bilong kirapim ol long lainim ol pikinini long kamap wokman bilong God. Ol tok bai helpim yumi olgeta long pilim tru olsem em bikpela samting yumi mas autim tok, na taim yumi mekim olsem, yumi yet na ol man i harim tok bilong yumi bai kisim blesing.—1 Ti 4:16.
5 Wanpela bikpela hap bilong kibung sekit na bikpela de kibung em baptais bilong ol nupela brata na sista. Paslain tru long ol i kamapim long ples klia dediket bilong ol, ol man i laik baptais i mas tokim wasman siaman na bai em i ken stretim rot bilong ol elda i ken bung wantaim ol.
6 Nem bilong pablik-tok long ol dispela kibung sekit i olsem, “Bilong Wanem Baibel i Mas Soim Rot Long Yumi?” Wanpela brata em Asosiesen i makim bai mekim bikpela tok bilong bikpela de kibung, em “Winim Mak na Redi Gut Olsem Wokman Bilong God.” Ol gutpela tok bai kamap i bilong strongim na helpim yu wantaim famili bilong yu, olsem na gutpela sapos yu stretim gut rot bilong go na harim olgeta tok bilong kibung sekit na bilong bikpela de kibung.
This article is unique to PNG.