Mekim Gutpela Wok Long Ol Olpela Buk
1 Jehova i bin givim planti gutpela kaikai bilong spirit long yumi. Yumi bin kisim planti gutpela tok long rot bilong ol buk i gat 192 pes. Long mun Janueri bai yumi tilim buk Yumi Bilong i Stap Nau Tasol? long 25 toea. Redim tok yu laik mekim bilong autim tok bilong Kingdom na bai yu inap kamapim wanpela tok i stap long dispela gutpela buk. Yu ken mekim olsem wanem?
2 Yu Ken Redi Olsem Wanem? Pastaim painim wanpela tok long buk em i gutpela long ol man i stap long teritori bilong yu. Nau tingim wanpela tok o wanpela samting i bin kamap na yu ken stori liklik long en pastaim, na bihain soim man bilong haus dispela tok long buk yu bin tingim. Ating i gat wanpela skripsa long buk yu ken kaunim stret long buk o long Baibel, em i helpim tok yu bin mekim. Nau yu ken tilim buk. Mekim wanpela tok o wanpela askim yu ken stori long en long taim yu go bek lukim em gen.
3 Taim yu tilim buk yu ken opim piksa i stap long pes 24 na tok olsem:
◼ “Sampela animal na diwai i stap longtaim tru winim yumi man, yu ting dispela i stret? [Larim man i bekim tok.] Baibel i tok, pastaim tru God i gat laik long ol manmeri i mas i stap oltaim long Paradais. [Kaunim Stat 2:16, 17, na stori long samting inap kamap sapos tupela i bin bihainim dispela lo.] Klostu nau dispela samting bai kamap tru. [Kaunim Song 37:10, 11.] Dispela buk inap soim yu long ol samting yu mas mekim bambai ol samting God bai mekim i ken helpim yu. Ating yu bin tingting planti long wanpela askim dispela buk i stori long en? [Soim lista bilong ol tok i stap long pes 3 na larim man i bekim tok.] Mi amamas long kam bek na toktok moa wantaim yu long dispela samting. Mipela tilim dispela buk long 25 toea tasol.” Makim taim wantaim em bilong mekim gobek.
4 O yu ken tok olsem:
◼ “Planti milion manmeri long olgeta hap i laik i stap amamas, tasol maski ol i wok strong long painim amamas, ol i no stap amamas. Planti ol i ting ol i bilong i stap inap sampela yia tasol, kamapim ol pikinini, na ol i laik sampela gutpela samting i ken painim ol paslain long ol i dai.” Nau yu ken stori wantaim man long sampela tok olsem i stap long pes 5 na 6, na bihain kaunim Song 37:11, na mekim liklik tok bilong soim em God i gat laik long kamapim nupela taim, na ol man i ken i stap laip oltaim long Paradais. Bilong kisim save long tingting bilong man bilong haus yu ken askim em olsem: “Yu ting olsem wanem long dispela gutpela samting?” Larim man i bekim tok. Tilim buk na stori long olsem wanem buk i ken bekim planti ol askim bilong Baibel. Soim lista long pes 3. Stretim tok bilong lukim em gen long narapela taim bilong toktok wantaim em long wanpela tok em i laikim.
5 Ol buk bilong yumi i bin kirapim planti tausen manmeri long skelim gut ol tok bilong Baibel. Ol tok ol i bin kisim save long en i bin helpim ol long wetim ol gutpela samting bai kamap bihain. (Sng 146:5) Yumi gat wok long helpim ol.
This is a partial repeat of article in km 1/95 taken from part of km-E 1/95, “Making Good Use of Our Older Books.”