Skul Bilong Wok Autim Tok i Helpim Yu
1 Skul Bilong Wok Autim Tok em i bin mekim bikpela wok bilong helpim yumi long save long pasin bilong ‘skulim gut ol man,’ na bai yumi inap long autim gut tok i tru bilong Baibel long ol man. (2 Ti 4:2) Long olgeta wan wan wik yumi kisim gutpela save long ol narapela narapela tok bilong Baibel. Yumi ken mekim wanem bambai dispela skul i ken helpim yumi tru?
2 Putim gut yau long ol tok wasman bilong skul i mekim bilong kirapim skul, em bai tokaut long sampela gutpela tok em miting inap lainim yu long en. Tingim ol askim em i kamapim na olsem wanem yu inap mekim wok long ol bekim long taim yu autim tok.
3 Brata i mekim Tok Namba Wan em i no ken stori tasol long ol tok i stap long buk samting. Em i mas helpim kongrigesen long save olsem wanem ol inap mekim wok long ol dispela tok na olsem wanem ol tok inap helpim olgeta wan wan. Sapos pastaim yu lukim ol dispela tok na redim, em bai helpim yu long putim tingting i go long ol bikpela tok na bekim sampela askim long pinis bilong tok.
4 Sapos oltaim yu kaunim ol sapta long Baibel em sedyul i makim, dispela inap helpim yu long pilim moa yet ol tok bilong Baibel. Na sapos yu wok long painim sampela save moa long ol buk samting bilong Sosaiti, bai yu kisim save long sampela nupela samting na kisim gut ol tok i tru. Brata i kamapim ol bikpela tok bilong Baibel em i no ken stori tasol na kamapim gen ol tok yumi kaunim pinis long Baibel. Em i mas mekim liklik tok tasol bilong kamapim stori bilong ol dispela sapta, na nau em i ken kamapim ol bikpela tok bilong ol dispela sapta bilong helpim kongrigesen long save long olsem wanem ol dispela tok inap helpim sindaun bilong yumi na i helpim yumi long lotuim God. Putim gut yau na bai yu ken save long olsem wanem yu inap bihainim moa yet ol tok bilong Baibel.—Sng 119:105.
5 Sapos ol i makim yu long mekim wanpela tok, tingim tok em wasman bilong skul i bin tokim yu long tingim long taim yu mekim tok, na kaunim hap tok bilong Buk Bilong Skul i stori long dispela samting, na wok long bihainim. Taim yu redim tok, kamapim sampela tok ol brata i ken mekim wok long en long taim ol i autim tok.—sg p. 19, 20.
6 Sapos yu wanpela sista na ol i makim yu long mekim Tok Namba 3 o Tok Namba 4, mekim olsem wanpela samting tru i kamap. Ating helpim bilong yu i ken wanbel long sampela tok yu mekim, na sampela tok, nogat. Helpim em long tingim na bilipim ol lo bilong Baibel em as bilong ol tok yu kamapim. (sg p. 37-39) Dispela bai helpim ol brata sista long save long ol samting ol i ken mekim taim ol i autim tok na wankain samting i painim ol. Redim gut pastaim, na stretim rot bilong traim dispela tok. Tasol nogut yu traim long taim miting i kirap pinis.
7 Gutpela ol sumatin i mekim tok ol i ken sindaun klostu long pletfom na bai taim i no lus nating long wokabaut i go long pletfom, na wasman bilong skul inap lukim sumatin taim em i givim sampela tok long em. Sapos wasman i kolim stret ol tok bilong Buk Bilong Skul na em i mekim long gutpela pasin, dispela inap helpim olgeta brata sista. Ating em i no bihainim tasol ol tok olsem i stap long pepa “Bilong Helpim Sumatin Long Mekim Gut Tok,” nogat; em bai tingim wanem wanem samting long pepa em inap helpim sumatin long mekim gut tok.
8 Em nau, em sampela gutpela as na yumi mas redim ol tok bilong Skul Bilong Wok Autim Tok na kam long dispela skul long olgeta wik. Ol tok yumi kisim em inap helpim yumi long bihainim gutpela tingting na mekim gut wok autim tok.—Snd 1:5.
This is a repeat of article in km 5/94 taken from km-E 5/94 “Benefiting Fully From the Theocratic Ministry School.”