Nupela Program Bilong Wokim Ol Haus Kingdom
Insait long 10-pela yia i go pinis, lain Witnes Bilong Jehova long Papua Niugini i bin i go bikpela; pastaim i gat 1,644 pablisa, na long 1995 i gat 2,994. Yumi amamas long lukim ol nupela pablisa i kam insait long lain bilong yumi long olgeta yia, na ol i lotuim Jehova wantaim yumi. Yumi stap long taim bilong “kisim kaikai,” em Jisas i bin toktok long en, olsem na yumi mas wokim sampela Haus Kingdom moa, long ol taun na long ol hap bilong bus.—Mt 13:30.
2 Ol misineri na painia salim i bin helpim dispela wok long i go bikpela. Olsem na kirap long 1986, Sosaiti i bin wokim ol haus misineri na ples slip bilong ol wasman bilong raun long Arawa, Madang, Wewak, Goroka, Alotau, Kavieng, Gerehu, Popondetta. Na Sosaiti i bin baim na stretim wanpela haus long Lae na long Kimbe. Sampela kongrigesen, olsem Wewak na Alotau, ol i bin wokim nupela Haus Kingdom bambai i gat spes inap long ol nupela man i kam.
3 Ol Witnes Bilong Jehova long olgeta hap, ol i tingim tru Haus Kingdom bilong ol. Ol i mekim olsem, long wanem, em i bikpela samting tru bilong helpim yumi long lotuim Jehova. Taim yumi bung wantaim long Haus Kingdom yumi pilim gutpela pasin wanbel i stap namel long ol brata Kristen, na narapela i strongim bel bilong narapela. (Sng 133:1; Hi 10:24, 25) Long olgeta hap Haus Kingdom i stap long en, em i ples tru bilong lotuim Jehova na i makim ol samting bilong Kingdom bilong em, na long Haus Kingdom ol nupela manmeri inap kisim gut save long oganaisesen bilong Jehova.
4 Long nau Jehova i wok long hariapim dispela wok bilong bungim ol man ol i olsem gutpela kaikai, olsem na long sampela hap ol Haus Kingdom i liklik tumas na ol i mas skruim i go bikpela o wokim nupela Haus Kingdom. Mipela i amamas long tok olsem, long Oktoba 1995 inap 64 brata sista bilong Ostrelia na ol brata sista bilong Papua Niugini yet, ol i bin volantia long wokim wanpela naispela Haus Kingdom long Popondetta, em 500 manmeri i ken sindaun long en long taim bilong ol kibung, na ol i pinisim insait long 3-pela wik. Na long wankain taim, ol i wokim wanpela haus misineri inap long 6-pela misineri. Long nau 4-pela misineri na wanpela painia salim i mekim wok long dispela hap. Long Me 1996, insait long 2-pela wik tasol wanpela lain brata bilong Ostrelia i helpim kongrigesen bilong Lae Wes long wokim wanpela Haus Kingdom em 250 manmeri inap sindaun long en.
5 I gat planti wok yet bilong mekim. Long sampela taun ol brata i mas wokim ol nupela Haus Kingdom, o ol i mas mekim bikpela wok long stretim ol Haus Kingdom nau i stap bambai ol i ken kamap gutpela na dispela i ken litimapim nem bilong Jehova. Long sampela hap bilong bus, planti manmeri tru i laik save long tok i tru, olsem na ol i mas i gat ol ples bung tu! Orait, yumi ken mekim wanem?
6 Bilong Ol Kongrigesen Long Hap Bilong Bus: Inap planti yia, mipela i bin mekim wok long mani ol brata i salim i go long Sosaiti bilong wokim ol Haus Kingdom, em bilong helpim ol kongrigesen long hap bilong bus na long ol taun, na mipela i bin givim dinau long ol inap long K1,000 bambai ol i ken baim ol plang bilong wokim haus o kapa bilong wokim rup samting. Dispela mani, em mani mipela i save bungim taim ol kongrigesen long Papua Niugini i salim ol kontribusen i kam long olgeta mun, na em inap long helpim ol liklik grup; i kam inap long nau, dispela mani i bin helpim 8-pela kongrigesen. Ol liklik kongrigesen i laik kisim helpim, ol i mas toktok pastaim wantaim wasman sekit long ol samting ol i sot long en, na bihain ol i ken salim pas i go long ‘Kingdom Hall desk’ long brens-ofis. Ol i mas tingim olsem dispela mani ol i kisim em wanpela dinau, na ol i mas bekim dinau long taim stret. Long dispela rot, mani bilong helpim wok bilong wokim ol Haus Kingdom i no ken pinis, na bai i gat mani i stap bilong helpim narapela kongrigesen.
7 Bilong Ol Kongrigesen Long Ol Taun: Mipela i amamas long toksave olsem mipela i bin kamapim wanpela nupela komiti, nem bilong en Komiti Bilong Wokim Ol Haus Kingdom Bilong Papua Niugini, na dispela bai helpim ol elda em ol i insait long wok bilong sanapim ol nupela Haus Kingdom o wok bilong stretim sampela Haus Kingdom long Papua Niugini. Dispela komiti bai helpim ol long skelim gut ol samting olsem, ol i mas wokim nupela Haus Kingdom o nogat, o stretim Haus Kingdom bilong ol o nogat; na tu em bai stiaim tingting bilong ol long ol samting bilong baim graun, na stail bilong haus, na ol samting bilong mani, i go inap long ol i pinis long wokim Haus Kingdom. Planti taim, wok bilong stretim Haus Kingdom i no save pulim bikpela hap taim na mani olsem long wokim nupela Haus Kingdom. Taim kongrigesen i laik baim narapela graun na wokim nupela Haus Kingdom, ol i mas salim olpela graun pastaim, na dispela inap givim hatwok long ol. Yumi ken save, taim ol i wok long skelim ol dispela samting, i gat planti samting bilong tingim, na ol i mas skelim gut olgeta samting wantaim na wanem ol rot i op long ol.
8 Husat Bai Mekim Ol Wok? Long ol kantri long ol narapela hap, planti tausen brata i amamas long volantia long mekim wok insait long kantri bilong ol yet, na ol i givim taim na strong bilong ol long redim ol samting, na long baim ol samting, na long mekim wok. Na long Papua Niugini tu i gat sampela brata em ol i gat save long mekim sampela kain wok, na ating rot bai i op long ol i ken volantia long helpim wok bilong sanapim sampela Haus Kingdom. Klostu nau, olgeta lain elda bai kisim sampela pepa, em pepa Ol Askim Bilong Man i Laik Volantia Long Wokim Haus Kingdom.
9 Sapos yu laik volantia long helpim wok bilong sanapim Haus Kingdom long hap bilong yu, na yu wanpela wokman o elda o wanpela Kristen i stap olsem gutpela piksa, na yu save gut long mekim wanpela wok, orait yu ken askim ol elda long kongrigesen bilong yu long kisim wanpela bilong ol dispela pepa. Taim yu bekim pinis olgeta askim, plis givim pepa long ol elda. Ol tu bai raitim sampela tok na ol bai salim i go long wasman sekit, na wasman sekit bai skruim sampela tok na em bai salim i go long Komiti Bilong Wokim Ol Haus Kingdom Bilong Papua Niugini. Sapos i no gat sampela samting i pasim yu na yu winim ol mak bilong mekim dispela wok, bai yu kisim ol bikpela blesing taim yu lukim bikpela amamas bilong ol brata sista bilong yu long taim Haus Kingdom bilong ol i sanap pinis, na dispela bai givim biknem long Jehova.
10 Olgeta Inap Helpim Wok: Ol brata sista ol i no inap volantia, ol tu i save mekim sampela bikpela samting bilong helpim wok. Ol i lukautim ol samting bilong kongrigesen long taim sampela narapela bilong kongrigesen i helpim wok bilong sanapim wanpela Haus Kingdom long narapela taun.
11 Na taim ol i wokim wanpela Haus Kingdom klostu long hap kongrigesen i stap long en, ating ol pablisa em ol i no gat save long mekim wanpela kain wok ol inap mekim wok leba samting. I no gat wok long ol i mas bekim ol askim pastaim long wanpela pepa bilong ol volantia. Ol elda bai toksave sapos ol i sot long ol brata bilong mekim wok leba samting, na ol bai stretim tok wantaim ol brata i laik volantia na ol elda bilong ol kongrigesen i stap klostu, bambai ol i ken insait long wok bilong sanapim dispela Haus Kingdom.
12 Taim kongrigesen i kisim tok orait long wokim wanpela nupela Haus Kingdom, nau Komiti Bilong Wokim Ol Haus Kingdom Bilong Papua Niugini bai skelim olsem, i gat planti volantia inap long pinisim dispela wok insait long liklik hap taim o nogat. Sapos i no gat, orait ating ol brata long dispela komiti bai askim wanpela komiti bilong Ostrelia (Australian Quickbuild Committee) long salim sampela volantia i kam.
13 Ol Bai Kirapim Wok Olsem Wanem? Pastaim ol elda bilong kongrigesen i mas toktok wantaim wasman sekit long ol wok ol i laik i mas kamap, na ol i mas toktok wantaim wasman bilong biktaun tu—sapos i gat wanpela. Bihain ol elda i mas salim pas i go long brens-ofis, na ol i mas raitim ‘Kingdom Hall desk’ long skin pas. Orait bihain, dispela dipatmen bai toksave long Komiti Bilong Wokim Ol Haus Kingdom Bilong Papua Niugini, na dispela lain bai tokim ol elda long ol samting ol i ken mekim.
14 Yumi Kisim We Mani Bilong Wokim Wanpela Nupela Haus Kingdom? Wan wan taim tasol, Sosaiti i bin baim olgeta samting bilong wokim wanpela nupela Haus Kingdom, na bihain kongrigesen i baim long olgeta wan wan mun. Tasol planti taim, kongrigesen yet i mas painim mani bilong wokim haus. Ol inap mekim olsem long rot bilong (1) ol brata i givim mani, (2) ol brata i givim sampela samting bilong wokim haus, (3) ol brata i givim mani olsem dinau, (4) Sosaiti i givim mani olsem dinau. Nau long olgeta hap, planti kongrigesen i mas wokim Haus Kingdom, olsem na Sosaiti i no gat bikpela mani bilong givim olsem dinau. Tasol long sampela taun i gat 2-pela o 3-pela kongrigesen. Sampela taim, wanpela kongrigesen i stap klostu, em inap helpim kongrigesen i laik wokim Haus Kingdom na givim mani, o em inap kisim dinau long Sosaiti bilong helpim dispela kongrigesen. Olsem na narapela i helpim narapela na hevi bilong dispela wok i no stap long wanpela kongrigesen tasol.
15 Wok Bilong Stretim Gut Ol Haus Kingdom: Ol Israel i bin stap gut long God ol i save lukautim gut haus lotu bilong Jehova, na olsem tasol ol kongrigesen long lain bilong Jehova long nau ol i save was gut—nogut ol samting bilong Haus Kingdom i wok long bagarap. (2 Sto 24:13) Taim ol kongrigesen i no lukautim gut Haus Kingdom bilong ol, dispela inap mekim na bihain ol i mas tromoi bikpela mani long stretim. Tasol bikpela samting moa i olsem, taim ol manmeri i lukim Haus Kingdom i stap nogut, dispela inap bagarapim nem bilong Jehova, na lain bilong em, na daunim gutpela tok bilong Kingdom. Planti taim ol samting ol man i lukim long namba wan taim ol i kam long miting, em dispela tasol i save helpim ol long skelim yumi i wanem kain lain. Orait, taim ol i lukim Haus Kingdom bilong yupela, ol bai kisim wanem tingting? Ating i gat wok long penim gen? Na olsem wanem long ol sia, na plua, na ol windo?
16 Sosaiti i salim pas pinis long olgeta kongrigesen bilong givim sampela tingting long ol long pasin bilong lukautim na stretim gut Haus Kingdom. Na tu long sampela taim, Sosaiti i save salim pas i go long ol lain elda bilong kamapim gen sampela bikpela wok ol i mas mekim bilong lukautim Haus Kingdom. Tasol i gat sampela samting ol elda yet i mas was gut long en long olgeta taim, olsem: Rup i stap gut? Na olsem wanem long ol paip bilong wara, na ol waia bilong paua, na ol fan? Olgeta i wok gut? Wanpela taim long olgeta yia, ol elda i mas sekim gut ol dispela samting.
17 Long nau, planti manmeri moa i wok long bihainim tok bilong Kingdom na kam insait long ‘bikpela lain.’ “Ol gutpela samting” bilong ol lain man i wok long kam pulap long haus lotu spirit bilong Jehova. (KTH 7:9; Hag 2:7, NW) Wankain long ol gutpela Juda long taim bilong Hagai, yumi mas givim bel long wok bilong God, na long helpim dispela bikpela wok bilong sanapim ol nupela Haus Kingdom. Tru, insait long sampela yia i go pinis ol i bin wokim sampela naispela Haus Kingdom, tasol wok i go bikpela yet. Wanpela gutpela rot tru bilong yumi ken insait long wok bilong God, em yumi mas wok yet long putim kontribusen long bokis kontribusen i gat nem—“Mani i Go Long Sosaiti Bilong Wokim Ol Haus Kingdom.”
[Ol Piksa long pes 3]
Haus misineri long Gerehu, ol i wokim long 1994
Haus misineri long Boundary Road, Lae, ol i stretim long 1991 na em inap long 15 misineri
[Ol Piksa long pes 4]
Haus Kingdom long Popondetta, ol i pinisim long Novemba 1995
Haus misineri long Popondetta inap long 6-pela misineri, ol i pinisim long Novemba 1995
[Piksa long pes 5]
Haus Kingdom long Kwaivagolo, ol i wokim long 1995
[Piksa long pes 6]
Piksa ol i wokim bilong Haus Kingdom long Lae Wes, ol i bin pinisim long Me 1996
This article is unique to PNG.