Rivyu Bilong Skul Bilong Wok Autim Tok
Rivyu bilong ol tok i bin kamap insait long Skul, kirap long Me 6 i go inap long Ogas 19, 1996. Long narapela hap pepa, traim raitim planti bekim insait long taim bilong mekim rivyu.
[Harim: Long taim bilong mekim rivyu long Skul, yu ken lukim Baibel tasol bilong helpim yu long bekim ol askim. Long pinis bilong ol askim i gat mak bilong ol buk samting, na taim yu kisim dispela pepa i go long haus paslain long taim bilong mekim rivyu, yu ken lukim ol dispela buk samting bilong helpim yu long raitim stret ol bekim bilong rivyu long Skul. Sampela taim ol i no putim namba bilong pes na paragraf bilong Wastaua.]
Makim ol dispela tok I Stret o I No Stret:
1. Jisas i mekim wanpela ofa na dispela i senisim olgeta ofa ol man i mekim aninit long Lo Bilong Moses. [4, uw p. 33 par. 8(4)] I Stret.
2. Tok piksa bilong ‘Gok bilong Magok’ i makim ol gavman bilong dispela graun. (Ese 38:2) [12, Hap bilong Baibel yumi kaunim long olgeta wik; lukim w93 11/1 p. 22 par. 19.] I No Stret. Tok piksa bilong Gok bilong Magok i makim Satan, i no makim ol gavman bilong graun.
3. Esekiel sapta 23 i stori olsem Ohola i bikpela susa bilong Oholiba, na olsem tasol lotu Katolik Bilong Rom em i bikpela susa bilong ol lotu Talatala, na tupela lotu wantaim i bin kamap doti, long wanem, ol i bin mekim pasin pamuk long ol samting bilong spirit wantaim ol bisnis na wok politik bilong dispela graun. [6, Hap bilong Baibel yumi kaunim long olgeta wik; lukim w89-E 4/1 30.] I Stret.
4. Bilong kamap wanpela man bilong God [olsem santu], man i mas dai pastaim. [1, rs p. 325 par. 1] I No Stret. Planti taim Baibel i kolim ol Kristen bilong pastaim olsem ol man bilong God [olsem santu], o man i holi, taim ol i stap laip yet hia long graun.
5. Baibel yet i kamapim insait bilong ol tok bilong en olsem yumi lukim long Kamapim Tok Hait 21:8. Dispela skripsa i kamapim insait bilong Kamapim Tok Hait 20:10, em i tok ol bai tromoi Satan i go daun long “bikpela hul i gat hatpela paia bilong ol ston salfa.” [16, rs p. 393 par. 5] I Stret. Kamapim Tok Hait 21:8 i tok dispela “bikpela hul i gat hatpela paia i lait long ol ston salfa” em i makim “namba 2 dai,” dispela i makim olsem Satan bai pinis inap oltaim oltaim.
6. Jems 4:17 na Esekiel 33:7-9 i makim wankain samting; tupela skripsa i soim yumi olsem, save yumi kisim pinis long ol samting God i laik yumi mas mekim, God i tingim dispela na em i skelim yumi long kot. [10, Hap bilong Baibel yumi kaunim long olgeta wik; lukim w93 4/1 p. 7 par. 1.] I Stret.
7. Daniel i kamapim klia olsem em i wanpela trupela profet taim em i kamapim insait bilong driman King Nebukatnesar i bin kamapim long em. [15, Hap bilong Baibel yumi kaunim long olgeta wik; lukim Daniel 2:7-9, 26.] I No Stret. Bilong kamapim klia olsem em i trupela profet, pastaim Daniel i mas tokim Nebukatnesar long driman bilong em na bihain em i bin kamapim insait bilong en. (Kain tok olsem em inap)
8. Wara i ran i kam daun long haus bilong God Esekiel i bin lukim long driman em i makim olsem baptais i gat strong bilong mekim man i kamap klin. [14, Hap bilong Baibel yumi kaunim long olgeta wik; lukim w88 12/1 p. 25 par. 20.] I No Stret. Wara hia i makim ol samting God i givim long yumi bambai yumi ken kisim laip oltaim; ofa bilong Jisas i insait long dispela.
9. No ken pret long sakim man i laik pulim yu long kisim kain kain amamas, maski dispela man i tok em i wanpela Kristen. (2 Pi 2:18, 19) [8, uw p. 43 par. 11] I Stret.
10. God i wokim Satan. [13, rs p. 391 par. 2] I No Stret. Pastaim Satan em i gutpela pikinini spirit bilong God, na em inap tingim ol samting em i laik mekim. Tasol em i mekim wok nogut long dispela samting na em i mekim em yet i kamap Satan. (Kain tok olsem em inap)
Bekim ol dispela askim:
11. Abraham i redi long givim Aisak olsem ofa na dispela i ken helpim yumi long pilim tru wanem samting? (Stt 22:1-18) [3, uw p. 32 par. 8(1)] Dispela i helpim yumi long pilim tru samting Jehova i bin mekim taim em i givim Pikinini bilong em bilong baim bek yumi. (Jon 3:16) (Kain tok olsem em inap)
12. Bilong wanem yumi ken tok, wok God i givim long Adam na Iv em i wanpela lo? (Stt 1:28; 2:15) [6, uw p. 38 par. 2] Long wanem dispela wok bai bosim ol samting tupela i mas mekim. (Kain tok olsem em inap)
13. Ol Witnes Jehova i makim ol long spirit na ol poroman bilong ol, olsem wanem ol i mas mekim wankain pasin olsem Esekiel? (Ese 11:25) [1, Hap bilong Baibel yumi kaunim long olgeta wik; lukim w88 12/1 p. 12 par. 3.] Ol i mas tokaut long olgeta samting Jehova i bin soim long ol. (Kain tok olsem em inap)
14. Husat i insait long lain bilong Snek? [2, uw p. 30 par. 3] Ol ensel na ol man i gat wankain tingting olsem Satan ol i insait long lain bilong Snek. (Kain tok olsem em inap)
15. Satan i sutim tok long Jehova olsem em i giaman, na tu, em i tok God i pasim tupela long kisim wanem narapela gutpela samting? (Stt 3:1-5) [10, uw p. 46 par. 1] Em i tok God i pasim tupela long skelim wanem samting i gutpela na wanem samting i nogut. (Kain tok olsem em inap)
16. Dispela “taun” Hibru 11:10 i tok long en, em i wanem samting? [11, uw p. 48 par. 6] Em i Kingdom bilong God.
17. Long wanem tupela rot i olsem Adam na Iv i dai long dispela de ol i bin kaikai pikinini bilong diwai bilong save long wanem samting i gutpela na wanem samting i nogut? (Stt 2:17) [13, uw p. 56 par. 5] God i wokim kot long dispela de na long ai bilong em i olsem tupela i dai long dispela de stret, na tu ol i bin i dai insait long 1,000 yia, em olsem wanpela de long ai bilong Jehova. (2 Pi 3:8) (Kain tok olsem em inap)
18. Olsem wanem 2 Tesalonaika 1:9 na Kamapim Tok Hait 21:8 i makim klia, dispela tok olsem God bai kisim bek olgeta man em i wanpela bilip giaman. [8, rs p. 204 par. 2-4] Tupela skripsa wantaim i tok klia, God i no inap kisim bek sampela man, tasol ol bai kisim bagarap i stap oltaim oltaim, sampela taim Baibel i kolim dispela olsem “namba 2 dai.” (Kain tok olsem em inap)
19. Pol i tok olsem God i kisim bek yumi sapos yumi bilip. Jems i tok yumi mas mekim gutpela pasin. Olsem wanem na dispela tupela tok i no pait wantaim? (Ef 2:8, 9; Je 2:14, 26) [10, rs p. 205 par. 2-4] Laip oltaim em i presen God i givim long ol man i bilip, man i no inap kisim olsem pe long wok em yet i mekim. Gutpela pasin Jems i tok long en, em i no olsem wok yumi mekim na God i mas givim pe long yumi, nogat; tasol dispela wok i makim olsem yumi laik bihainim tok bilong God na laikim em tumas, na yumi bilip tru long em. Olsem na yumi mas i gat bilip na gutpela pasin wantaim. (Kain tok olsem em inap)
20. Wanem em nambawan rot bilong save olsem Satan i stap tru, husat i bin lukim Satan na i tokaut olsem em i stap tru, na olsem wanem pasin nogut i pulap nau long graun i kamapim klia olsem Satan i stap tru? [11, rs p. 389 par. 3, 4] Baibel em i nambawan rot bilong kisim save olsem Satan i stap tru. Planti taim Krais Jisas i kolim nem bilong em. Ol man i bin mekim pasin nogut tru long ol narapela, tasol dispela i winim tru pasin nogut ol yet inap tingting long mekim. (Kain tok olsem em inap)
Raitim wanem hap tok i stret bilong pinisim ol dispela tok:
21. Long truim bilong Esekiel 21:26, kingdom i bin stap olsem “bikman” em Juda, na em i bin kamap olsem “man nating” taim em i bagarap long yia 607 paslain long Krais. Kingdom bilong ol narapela lain ol i olsem “man nating,” ol i bin kamap olsem “bikman”—nau ol yet i bosim graun na i no gat wanpela kingdom bilong God long graun bilong pasim ol moa. [5, Hap bilong Baibel yumi kaunim long olgeta wik; lukim w88 12/1 p. 16 par. 16.]
22. Hap bilong Buk Daniel i tokaut long ol samting i kamap bihain, em i stori long pasin bilong ol strongpela kantri long winim ol narapela, kirap long bipo na i kam inap nau. [15, si Ogas 12 par. 1]
23. Dispela tok “wokman bilong mi Devit” long Esekiel 34:23, Esekiel i bin raitim longtaim bihain long King Devit i dai pinis; em i wanpela tok profet na i makim Krais Jisas. [14, si Ogas 5 par. 31]
24. Kisim Bek 34:7 i tokaut long ol samting God bai mekim long lain Israel olgeta sapos ol i mekim sin long God na ol i go kalabus long narapela kantri. Tasol Esekiel 18:4 i tok long wanpela man tasol—sapos em i mekim rong em yet i mas kisim nogut long dispela. [4, Hap bilong Baibel yumi kaunim long olgeta wik; lukim w88 9/1 p. 6.]
25. Taim yumi kaunim Baibel, gutpela sapos yumi askim yumi yet long olsem wanem yumi yet i ken bihainim dispela tok na olsem wanem yumi ken mekim wok long en bilong helpim ol narapela. [1, uw p. 26 par. 12(4) na p. 28 par. 12(5)]
Makim wanem tok i stret:
26. Namba wan samting Kristen i save tingim em (i laik kisim gutpela wok insait long kongrigesen; abrusim bagarap long Armagedon; stap gut long ai bilong Jehova). [7, uw p. 42 par. 9]
27. Planti man i no laik ting olsem ol hevi i painim yumi, long wanem, (ol narapela i tingting strong long mekim nogut long yumi; taim nogut i painim yumi; yumi yet i gat laik nogut na yumi poroman wantaim ol man nogut). (1 Ko 15:33; Je 1:14, 15) [9, uw p. 44 par. 13]
28. Satan i tok, no gat wanpela man bai stap gut long God sapos hevi i painim em. Olsem na ol (samting yumi save long en; gutpela pasin bilong yumi long skulim man, samting yumi mekim) i kamapim klia olsem yumi stap gut long Jehova o yumi bihainim Satan. [12, uw p. 52 par. 12]
29. Long pastaim tru lain i kamap olsem “ol sospen bilong kisim marimari” em ol (man bilong ol narapela lain; ol Juda; ol Samaria i katim skin), na bihain ol (man bilong ol narapela lain; ol Juda; ol Samaria i katim skin), na las tru ol (man bilong ol narapela lain; ol Juda; ol Samaria i katim skin). (Ro 9:23, 24) [16, uw p. 58 par. 8; p. 59 par. 10]
30. Wel abus i kisim strong bilong en long Satan i makim (strongpela gavman bilong Briten wantaim Amerika; Yunaitet Nesen; olgeta gavman politik bilong dispela graun). (KTH 13:1, 2) [15, rs p. 393 par. 1-3]
Putim wanem skripsa i stret long ol dispela tok: Snd 27:11; Ese 18:25; Dan 1:8, 11-13; Ap 8:32-38; 1 Jo 1:8, 9
31. Man i laikim tumas tok i tru na ol samting Krais Jisas i bin mekim bilong truim ol tok profet bilong Baibel, dispela i kirapim ol man i gat gutpela bel long kisim baptais. [Ap 8:32-38] [3, uw p. 32 par. 7]
32. Ol yangpela Kristen i no ken surik long tokaut long ol tisa o ol bikman bilong gavman na long ol wanskul olsem ol bai bihainim ol lo olsem i stap long bel bilong ol. [Dan 1:8, 11-13] [15, Hap bilong Baibel yumi kaunim long olgeta wik; lukim w92 11/1 p. 14 par. 17.]
33. Yumi bilip tru long ofa bilong Krais Jisas, olsem na bel bilong yumi i ken i stap klin, long wanem, i gat rot bilong tekewe sin bilong yumi. [1 Jo 1:8, 9] [5, uw p. 35 par. 10]
34. Oltaim ol trupela Kristen i mas redi long stretim tingting bilong ol bambai tingting bilong ol i stret long ai bilong Jehova. Yumi no ken ting tok bilong Baibel bilong stretim yumi i no bilong yumi yet na yumi ken sakim. [Ese 18:25] [4, Hap bilong Baibel yumi kaunim long olgeta wik; lukim w90-E 11/1 p. 31.]
35. Wanpela as na God Jehova i no bin pinisim Satan wantu tasol bihain long em i bikhet long Iden em i olsem: God i laik ol wokboi bilong em inap kamapim klia olsem ol i stap gut long Em, long wanem, ol i laikim em tumas na bihainim tok bilong em, na long dispela rot ol i ken kamapim klia Satan i man bilong giaman. [Snd 27:11] [14, rs p. 392 par. 1]