“Lainim Ol Long . . . Olgeta Tok Mi Bin Givim Long Yupela”
1 Bilong man i ken kamap disaipel bilong Krais, narapela i mas lainim em “long bihainim olgeta tok” em Jisas i bin givim long yumi. (Mt 28:19, 20) Nambawan rot bilong lainim man olsem, em long rot bilong Baibel-stadi.
2 Sampela taim i hatwok long kirapim nupela Baibel-stadi. Sapos yu hatwok long painim wanpela man i laik stadi, orait, no ken bel hevi. Bilong kirapim Baibel-stadi, yu mas tingting strong long mekim olsem, na yu mas i gat laik tru long helpim man long kisim save long tok i tru.—Ga 6:9.
3 Bilong Kirapim Man Long Harim Sampela Tok Moa: Taim yu autim tok long man long namba wan taim, ating em i no putim gut yau. Sapos yu inap, tilim wanpela liklik nius, buklet, o magasin long em. Ating yu inap mekim wok long liklik nius o buklet samting na kirapim stadi. Sapos man bilong haus i laik harim sampela tok moa, orait taim yu go bek lukim em, tilim buk Save.
4 Bilong kirapim Baibel-stadi, yu mas redi gut pastaim. Taim yu no mekim yet gobek, tingim wanpela skripsa em liklik nius o buklet o magasin i kamapim, em yu ken mekim wok long en taim yu mekim gobek. Long dispela rot, tok yu kamapim i ken stret wantaim samting yu bin tilim. Na ating yu inap kaunim wanpela o tupela paragraf.
5 Yu ken mekim tok olsem:
◼ “Mipela i bin toktok wantaim ol man long wanpela tok profet em truim bilong en i kamap nau long dispela taim.” Kaunim Matyu 24:3. Nau stori long piksa na sampela tok i stap long pes 24 bilong buklet Harim! Taim yu tilim liklik nius Ol Man Bilong Graun Bai Abrusim Bagarap o Nogat?, yu ken kirapim tok long wankain pasin.
6 Taim yu save pinis olsem man i laik tru long harim tok, kwiktaim go bek lukim em. Gutpela sapos yu go bek insait long dispela wik yu bin lukim em na bai em inap tingim yet ol tok yu bin mekim. Olgeta taim yu go bek lukim em, stori long sampela paragraf long liklik nius o buklet samting yu bin tilim long em. Bihain, sapos yu pilim olsem i stret long man bilong haus, tilim buk Save na stori long sampela paragraf.
7 Long nau, bikpela wok i stap yet bilong bungim planti kaikai long gaden olsem Jisas i tok profet long en. (Mt 9:37, 38) Taim yumi wok yet long lainim ol man i gat gutpela bel, yumi ken kisim strong long tok promis Jisas i bin mekim olsem ‘em bai stap wantaim yumi olgeta de i go inap long dispela taim i pinis.’
This is a repeat of article in km 4/93 taken from km-E 2/93 “Teaching . . . the Things I Have Commanded You.”