Ol Kibung Intenesenel Bilong 1998 Bai Kamap Long Not Amerika
Olsem ol i bin toksave long Sarere, Oktoba 5, 1996, long miting bilong Was Taua Sosaiti bilong Pensilvenia bilong olgeta yia, Lain Bilong Bosim Ol Witnes i tingting long kamapim sampela kibung intenesenel long 1998. Long taim bilong ol kibung distrik, sampela kibung intenesenel bai kamap long Not Amerika na tu long Afrika, Esia, Yurop, Latin-Amerika, ol ailan Karibian, na Saut Pasifik.
Sampela bilong ol dispela bikpela kibung bai kamap long Not Amerika, na ol bai singautim sampela brata sista bilong olgeta hap i kam. Na tu, yumi ken ting olsem ol misineri bai kam long ol dispela kibung intenesenel. Sosaiti bai singautim ol brata sista i bin skul long Gileat na Skul Bilong Lainim Wok Bilong Lukautim Kongrigesen na sampela narapela i mekim wok bilong God kain olsem misineri em ol i mekim wok long ol ples olsem Afrika, Esia, Latin-Amerika, Isten Yurop, ol ailan bilong Karibian na Pasifik.
Bihain mipela bai mekim sampela toksave moa bilong ol det, ol ples, husat husat ol brata sista i ken i go, ol samting ol i stretim bilong ol brata sista bilong narapela hap, na sampela narapela samting. Brens-ofis bai toksave long ol kongrigesen long ol ples bilong ol kibung intenesenel em ol pablisa i ken i go long en. Ol bai toksave long ol det na ol narapela samting em brens-ofis bai stretim. Ol pablisa i gat tingting long putim aplikesen bilong go long ol kibung long narapela kantri, ol i ken kirap long bungim sampela wansiling bilong i go long dispela bikpela bung.