Strongim Bel Long Mekim Ol Gobek

¹ Yu amamas long mekim ol gobek? Planti pablisa i amamas long mekim. Ating pastaim yu bin tingting planti, na yu tingting planti moa yet sapos yu mekim gobek long sampela man em ol i no gat bikpela laik tumas long harim tok taim yu lukim ol long namba wan taim. Tasol taim God bilong yumi i strongim bel bilong yu long autim gutnius bilong Kingdom taim yu mekim gobek, ating yu kirap nogut olsem em i no hatwok long mekim gobek na God i blesim dispela wok. (1 Te 2:⁠2) Olsem wanem na i no hatwok?

² Wanpela samting i olsem: Mekim gobek i narapela kain long go lukim man long namba wan taim. Taim yu mekim ol gobek, yu toktok wantaim man yu save pinis long em​—⁠i no wanpela man yu no save liklik long em​—⁠na taim yu toktok wantaim man yu save pinis long em, i no hatwok olsem long taim yu toktok wantaim man yu lukim em long namba wan taim. Na ol gutpela samting i save kamap sapos yu insait long dispela wok, long wanem, long rot bilong ol gobek yu inap kirapim ol gutpela Baibel-stadi.

³ Taim yumi autim tok long ol haus, planti taim yumi go lukim ol man em bipo ol i no laik save long tok i tru. Bilong wanem yumi wok yet long lukim ol? Yumi save olsem sindaun bilong ol man i save senis senis, na wanpela man em bipo i luk olsem em i no laik harim tok, o em i bin birua long yumi taim yumi lukim em bipo, ating bihain em i laik harim tok taim yu go lukim em gen. Yumi tingim dispela samting taim yumi redim ol tok bilong gobek na yumi beten askim Jehova long blesim wok bilong yumi bambai tok yumi mekim bai kirapim man na em i gat laik long harim tok.

⁴ Sapos yumi save amamas long toktok wantaim ol man long taim yumi autim tok long ol haus, em bipo ol i no amamas liklik long harim tok, ating yumi mas amamas moa yet long mekim gobek long wanpela man em i amamas long harim tok bilong Kingdom, a?​—⁠Ap 10:​34, 35.

⁵ Long nau planti bilong yumi i stap long tok i tru, long wanem, wanpela pablisa i no bin les long mekim gobek long yumi. Sapos yu wanpela bilong ol, yu ken askim yu yet olsem: ‘Taim pablisa i bungim mi long namba wan taim mi bin mekim wanem pasin? Taim mi harim tok bilong Kingdom long namba wan taim kwiktaim mi bilipim? Mi bin mekim pasin olsem mi no pilim ol tok ol pablisa i autim long mi?’ Yumi mas amamas dispela pablisa i ting olsem yumi gutpela man inap long em i mekim gobek long yumi na ‘God bilong em i bin strongim bel bilong em,’ na em i kam bek gen na em i wok long skulim yumi long tok i tru. (1 Te 2:⁠2) Tasol olsem wanem long ol man em pastaim ol i mekim olsem ol i gat laik long harim tok tasol bihain i luk olsem ol i laik abrusim yumi? Yumi mas i gat stretpela tingting, olsem stori i kamap bihain i soim yumi. Olsem:

⁶ Taim tupela pablisa i autim tok long rot long moningtaim tru, ol i bin bungim wanpela yangpela meri i subim wanpela karis em pikinini i sindaun insait long en. Meri hia i kisim wanpela nius na em i singautim tupela sista long go lukim em long haus bilong em long Sande antap. Ol i kamap long taim stret ol i bin makim, tasol meri hia i tokim ol olsem em i no gat taim long toktok wantaim ol. Tasol em i tok promis olsem long wik antap em bai wetim ol. Ol sista i gat tupela tingting, em bai stap long taim ol i makim o nogat, tasol dispela meri i bin wetim ol long taim ol i go bek lukim em. Ol i kirapim stadi wantaim em, na kwiktaim em i wok long kamap strong. Insait long liklik taim, em i kirap go long ol miting long olgeta taim na em i kirap autim tok. Nau em i baptais pinis.

⁷ Long Namba Wan Taim Yu Lukim Man Mekim Ol Tok Inap Long Yu Ken Mekim Gobek: Planti taim ol tok yu mekim long namba wan taim yu lukim man i opim rot bilong mekim gutpela gobek. Putim gut yau long ol tok bilong man bilong haus. Em i stori long wanem samting? Em i save tingim lotu? Em i save tingting planti long sindaun bilong ol man? Em i save laikim ol samting bilong saiens? ol stori long ol samting i bin kamap bipo? ol samting bilong lukautim graun? Long taim yu laik lusim man yu ken kamapim wanpela askim i kirapim tru tingting bilong em, na yu ken tok promis long em olsem yu bai toktok wantaim em long dispela askim taim yu kam bek.

⁸ Olsem: Sapos man bilong haus i amamas long tok promis bilong Baibel olsem graun bai kamap wanpela paradais, i gutpela sapos yu toktok gen long dispela tok. Klostu long taim yu laik lusim em, yu ken askim em olsem: “Olsem wanem yumi inap save tru olsem God bai truim dispela tok promis bilong em?” Na yu ken tok moa: “Mi laik kam bek gen taim ol narapela bilong famili tu i stap long haus, na long dispela taim mi laik soim yu Baibel i tok wanem bilong bekim dispela askim bilong yu.”

⁹ Sapos man bilong haus i no kamapim sampela askim long samting em i laik save long en, yu inap kamapim wanpela bilong ol askim i stap long ol stori long baksait bilong Wok Kingdom na mekim wok long dispela askim olsem as bilong tok bilong yu taim yu mekim gobek.

¹⁰ Raitim Gut Ol Tok Long Notbuk Samting: Taim yu go autim tok long ol haus, yu mas raitim gut ol tok long notbuk bilong yu. Olsem: Taim yu autim tok pinis, nau yu mas raitim nem na atres bilong man bilong haus long notbuk. No ken raitim nating namba na nem bilong rot​—⁠yu mas lukim gut namba na nem i stret o nogat. Sapos haus i no gat namba, raitim ol samting i kamapim klia haus i stap long wanem hap tru. Raitim gut ol samting bilong dispela man; olsem em i bilong wanem hap, na ol man i kolim wanem ol nem long em. Raitim ol samting yu bin toktok wantaim dispela man long en, ol skripsa yu bin kaunim, ol nius o buk yu bin lusim wantaim em, na wanem askim yu laik bekim long taim yu mekim gobek. Raitim tu de na taim yu bin toktok long dispela man long namba wan taim, na long wanem taim yu bin tok yu bai mekim gobek. Taim yu raitim pinis ol tok, no ken lusim! Lukautim gut na bihain yu ken lukim gen ol samting yu bin raitim. Wok long tingim dispela man na tingim ol samting yu laik toktok wantaim em long en long bihain.

¹¹ Tingim Samting Yu Laik Mekim: Namba wan, pes bilong yu i mas lait gut na yu mas mekim gutpela pasin na bai man bilong haus inap i stap bel isi na no ken pret. Kamapim long ples klia olsem yu tingim em, tasol no ken mekim planti askim tumas long samting bilong em yet. Bihain, helpim em long tingim wanpela askim yu bin kamapim taim yu lukim em long namba wan taim. Putim gut yau taim em i kamapim tingting bilong em, na tok tenkyu long ol tok em i kamapim. Nau soim em bilong wanem tok bilong Baibel i gutpela bilong stiaim na stretim yumi. Sapos inap, stiaim tingting bilong em long sampela tok i stori long dispela samting long buk Save i Bringim Man Long Laip Oltaim. No ken lusim tingting, namba wan samting yu laik mekim taim yu go bek lukim man em yu laik kirapim wanpela Baibel-stadi.

¹² Buk Save i kamapim stret ol tok na dispela i bin helpim planti bilong yumi long “strongim bel” taim yumi mekim Baibel-stadi na kirapim ol sumatin long kam long ol miting na bung wantaim oganaisesen bilong Jehova. Long bipo, ating ol man i bin stadi inap longtaim liklik na yumi kirapim ol long kam bung wantaim yumi. Long nau, planti stadi i kam long ol miting taim ol i kirap stadi nupela, na dispela i mekim na kwiktaim ol i kamap strong.

¹³ Tupela marit i bin autim tok long wanpela wanwok bilong ol. Taim em i kamapim olsem em i laik save long tok i tru, ol i kirapim em long stadi long Baibel wantaim ol long buk Save. Na long dispela taim yet, ol i tokim em long kam long ol miting, long wanem, ol tok i kamap long ol miting bai bekim planti askim bilong em. Man hia i bin amamas long stadi long Baibel, na em i stadi tupela taim long wik na em i kirap go long olgeta miting long Haus Kingdom.

¹⁴ Mekim Wok Long Buklet God i Laik Yumi Mas Mekim Wanem?: Long “Ol Man Bilong Autim Tok Long Bel Isi God i Save Givim” Kibung Distrik, yumi kisim buklet God i Laik Yumi Mas Mekim Wanem? Dispela buklet i gutpela long kirapim Baibel-stadi wantaim ol man i pret long God, maski ol i kisim bikpela o liklik skul. Em i gutpela long stadi long ol bikpela as tok bilong Baibel. Dispela buklet i wanpela gutpela samting bilong skulim ol man long save bilong God. Em i kamapim klia ol tok na i no hatwok long kisim save long insait bilong en, olsem na yumi olgeta inap mekim wok long en bilong skulim ol man long ol lo bilong God. Olsem na planti pablisa bai amamas long mekim ol Baibel-stadi long dispela buklet.

¹⁵ Ating sampela man i pilim olsem ol i no gat taim long stadi long buk Save, tasol ol i amamas long stadi long ol sotpela Stadi bilong buklet Yumi Mas Mekim Wanem? Ol bai amamas tru long ol samting ol i lain long en! Long 2-pela o 3-pela pes tasol ol bai kisim bekim bilong ol askim em ol man i bin tingting planti long en inap planti handet yia, olsem: God em i husat? Satan em i husat? Wanem laik bilong God long dispela graun? Kingdom bilong God em i wanem samting? Olsem wanem yu inap painim lotu i tru? Buklet i kamapim tok i tru long pasin i no hatwok long kisim save long en, tasol tok em i kamapim i gat strong. Em i stori long ol bikpela tok ol elda bai rivyu wantaim ol man i laik kisim baptais, na em inap kirapim ol long stadi gut long buk Save.

¹⁶ Bilong kirapim man long stadi taim yu mekim gobek, yu ken tok olsem: “Olsem wanem? Yu save olsem insait long sampela minit tasol yu inap kisim bekim long wanpela bikpela askim bilong Baibel?” Nau kamapim wanpela askim i stap long kirap bilong wanpela Stadi bilong buklet. Sapos yu toktok long wanpela man i lapun liklik, yu ken tok olsem: “Yumi save bipo Jisas i oraitim ol manmeri. Tasol long bihain Jisas bai mekim wanem bilong helpim ol sikman? ol lapun? na ol manmeri i dai pinis?” Bekim bilong dispela askim i stap long Stadi 5. Wanpela man i save tingim lotu ating em bai amamas long dispela askim: “Olsem wanem? God i save harim olgeta beten?” Stadi 7 i bekim dispela askim. Ol wan wan insait long famili i laik save: “God i laik ol papamama na ol pikinini i mas mekim wanem samting?” Ol inap kisim bekim bilong dispela askim taim ol i stadi long Stadi 8. Sampela narapela askim i olsem: “Ol man i dai pinis inap nogutim ol man i stap laip?” Stadi 11 bai bekim dispela askim; “Bilong wanem i gat planti lotu i tok ol i Kristen?” Stadi 13 i stori long en; na “Yumi mas mekim wanem bilong kamap pren bilong God?” Stadi 16 i stori long en.

¹⁷ Helpim Ol Manmeri i Mekim Narapela Tok Ples: Olsem wanem long ol man bilong haus ol i save mekim narapela tok ples? Sapos inap, gutpela yumi ken skulim ol long tok ples ol i save gut long en. (1 Ko 14:⁠9) Sapos i no gat ol kongrigesen o grup i stap klostu o i no gat pablisa i mekim tok ples bilong dispela man, pablisa inap stadi wantaim em long buklet Yumi Mas Mekim Wanem? na em i ken holim buklet long tok ples bilong man bilong haus na tok ples bilong em yet.

¹⁸ Taim yu stadi wantaim man i gat narapela tok ples, yu mas tok isi isi, kamapim klia ol tok, na no ken mekim ol strongpela tok. Na yu mas tingim gut ol dispela man i mekim narapela tok ples, no ken daunim ol. No ken mekim pasin long ol olsem ol i pikinini.

¹⁹ Mekim gut wok long ol naispela piksa i gat kala kala long buklet Yumi Mas Mekim Wanem? Sapos “wanpela piksa i winim wan tausen toktok,” ol naispela piksa bilong buklet bai kamapim planti gutpela toktok long man bilong haus. Askim em long kaunim ol skripsa long Baibel bilong em yet. Sapos yupela inap mekim Baibel-stadi long taim wanpela famili i save long tok Pisin i stap na em i ken tanim tok, dispela bai helpim gut Baibel-stadi.

²⁰ Mekim Ol Gobek Kwiktaim: Yu mas wet inap wanem taim na yu ken mekim gobek? Sampela pablisa i save mekim gobek wanpela o tupela de bihain long ol i bin toktok wantaim man long namba wan taim. Sampela i save go bek bihain liklik long dispela de yet! Olsem wanem? Dispela i kwiktaim tumas? Planti man bilong haus i save orait long dispela. Planti taim pablisa yet i mas wok long kisim stretpela tingting, na em i mas strongim bel. Skelim ol ekspiriens ol paragraf i kamap bihain i kamapim.

²¹ Wanpela pablisa i gat 13 krismas i bin autim tok long ol haus na em i toktok wantaim tupela meri i wokabaut wantaim long rot. Ol i amamas long harim tok bilong Kingdom na tupela i kisim buk Save. Yangpela brata i kisim atres bilong wan wan, na tupela de bihain em i mekim gobek na kirapim Baibel-stadi wantaim ol.

²² Wanpela sista i save stretim rot bilong mekim gobek long wik antap. Tasol wanpela o tupela de bihain long taim em i lukim dispela man long namba wan taim, em i go bek lukim em na i soim em wanpela magasin i stori long tok ol i bin toktok long en bipo. Em i tokim man bilong haus olsem: “Mi bin lukim dispela stori na mi ting bai yu amamas long kaunim. Mi no inap stap longpela taim na stori wantaim yu, tasol bai mi kam bek long Trinde apinun olsem yumi stretim tok. Sapos mi kam long dispela taim i orait yet long yu?”

²³ Sapos man i amamas long harim tok i tru, yumi ken save olsem long kain kain rot ol man bai birua long em. Olsem na taim yumi mekim gobek kwiktaim bihain long taim yumi lukim em long namba wan taim, dispela bai strongim em na em inap sanap strong taim famili, o ol gutpela pren, na ol narapela i givim hevi long em.

²⁴ Kirapim Ol Man Yu Autim Tok Long Ol Long Ol Ples Bung na Bai Ol i Laik Harim Tok: Planti bilong yumi i amamas long autim tok long rot, long ol ples ol man i save putim ka long en, long ol PMV na balus samting, klostu long ol maket na stua, long ol pak, na ol kain ples olsem. Yumi laik tilim ol buk na magasin long ol man, na yumi laik kirapim ol tu na bai ol i laik harim tok. Bilong helpim yumi long mekim olsem, yumi mas wok strong long kisim nem na atres, na sapos inap, namba bilong telefon bilong olgeta man i amamas long harim tok. Yu no ken ting i hatwok tumas long kisim nem na atres samting. Taim yu laik pinisim tok wantaim man, kisim notbuk bilong yu na askim em olsem: “I gat rot bilong yumi ken toktok wantaim long dispela samting long narapela taim?” O yu inap tok: “Mi laik yu ken kaunim wanpela stori mi save yu bai amamas long en. Mi inap kisim i kam long haus o ofis bilong yu?”

²⁵ Mekim Wok Long Telefon Bilong Painim Ol Man i Laik Harim Tok na Kirapim Ol Long Kisim Save: Sapos yumi sindaun long wanpela taun, sampela taim yumi ken mekim wok long telefon bilong toktok long ol man em yumi no inap toktok wantaim ol long haus bilong ol, long wanem, haus i gat ol strongpela sekyuriti samting. Wanpela sista painia i sindaun long narapela kantri, taim em i autim tok long rot bilong telefon long ol man long namba wan taim em i save tok olsem: “Mi save yu no save long mi. Mi wok strong long toktok wantaim ol man long hap bilong yu long wanpela tok bilong Baibel. Sapos yu gat liklik hap taim, mi laik kaunim wanpela tok promis long yu i stap long . . . ” Taim em i kaunim pinis skripsa, em i tok: “Ating bai yumi amamas tru sapos yumi inap lukim dispela gutpela samting i kamap, a? Mi amamas long kaunim dispela skripsa long yu. Sapos yu tu i amamas, mi laik ringim yu gen na toktok wantaim yu long narapela skripsa.”

²⁶ Taim em i ringim gen dispela man, em i tokim man bilong haus long ol samting ol i bin stori long en long bipo, na em i tok em i laik kaunim long em long Baibel ol gutpela samting bai kamap long graun taim pasin nogut i pinis olgeta. Nau em i toktok wantaim man inap liklik hap taim. Em i bin toktok wantaim planti manmeri long rot bilong telefon, olsem na inap 35 man i bin singautim em long kam long haus bilong ol na em i bin kirapim 7-pela Baibel-stadi! Olsem wanem? Sampela taim i hatwok long yu long mekim gobek, long wanem yu sik, o long wanem i gat bikpela ren o sampela narapela hevi i mekim na i no gutpela yu raun long mekim gobek? Sapos olsem, olsem wanem na yu no toktok wantaim ol dispela man long rot bilong telefon, sapos yu inap mekim olsem?

²⁷ Go Bek Lukim Ol Man i Laik Harim Tok Long Ol Ples Bisnis: Yumi no ken tilim tasol ol magasin long ol ples bisnis, nogat; yumi mas mekim sampela samting moa. Planti papa bilong stua i gat laik tru long harim tok i tru, na yumi mas wok long helpim ol. Sampela taim yumi ken toktok wantaim ol long tok bilong Baibel o yumi ken stadi wantaim ol long stua bilong ol. Na sampela taim, yu inap bungim man i laik harim tok long belo taim em i malolo, o long narapela taim i gutpela long em.

²⁸ Wanpela wasman bilong raun i bin toktok wantaim papa bilong wanpela liklik stua bilong kaikai na em i tokim em olsem em i laik soim em long rot bilong mekim Baibel-stadi. Taim papa bilong stua i askim em long dispela stadi bai kisim hamas taim, wasman bilong raun i tok inap 15 minit tasol. Olsem na papa bilong stua i putim wanpela sain long dua bilong toksave olsem: “Bai mi kam bek bihain long 20 minit,” na em i kisim 2-pela sia, na tupela i toktok long 5-pela paragraf bilong buk Save. Man hia i gat gutpela bel na em i amamas tru long ol samting em i lain long en, olsem na long Sande em i go long Miting Bilong Pablik-Tok na Stadi Wastaua, na long wik antap em i orait long stadi gen.

²⁹ Bilong kirapim stadi long wanpela ples bisnis, yu ken tok olsem: “Sapos yu gat 15 minit tasol, bai mi amamas long soim yu long pasin bilong mipela long stadi long Baibel.” Nau yu mas bihainim stret taim yu makim. Sapos yupela i no inap toktok longpela taim long ples bisnis, ating i gutpela yu go lukim papa bilong stua long haus bilong em.

³⁰ Mekim Gobek Maski Man i No Bin Kisim Buk Samting: Yumi mas mekim gobek long olgeta man i bin amamas long harim tok, maski ol i kisim buk samting o nogat. Tru, sapos pasin bilong man i kamapim long ples klia olsem em i no laik harim tok bilong Kingdom, gutpela yu autim tok long ol narapela man.

³¹ Taim wanpela sista i go autim tok long ol haus, em i bungim wanpela meri i mekim gutpela pasin pren, tasol em i no laik tru long kisim sampela magasin. Pablisa i tok: “Inap planti de mi tingim dispela meri na mi pasim tok long bel olsem mi laik toktok gen wantaim em.” Sista i beten, na em i strongim bel, na em i paitim dua bilong haus bilong dispela meri. Em i amamas tru olsem meri i askim em long kam insait long haus. Em i kirapim Baibel-stadi wantaim em, na long de bihain em i stadi gen. Bihain dispela meri i kam insait long tok i tru.

³² Stretim Gut Rot na Bai Yu Inap Mekim Bikpela Wok: Sosaiti i kirapim yumi long makim taim bilong mekim ol gobek long olgeta wik. Yu inap mekim bikpela wok sapos yu stretim gut rot. Stretim rot bilong mekim ol gobek long hap yu bai autim tok long en long ol haus. Sapos yu raun long ka taim yu mekim gobek, no ken kisim planti pablisa bambai olgeta wan wan inap mekim sampela gobek. Pablisa i draivim ka i mas save pastaim ol brata sista i laik mekim ol gobek long wanem ol hap na bai em i no ken raun nating.

³³ Ol pablisa i save gut long mekim gobek na kirapim Baibel-stadi, ol i tok em i bikpela samting long kamapim long ples klia olsem yumi save tingim tru ol man, na yumi wok long tingting long ol taim yumi lusim ol pinis. Yumi mas toktok wantaim man long wanpela gutpela tok bilong Baibel em i amamas long harim, na paslain long taim yumi laik lusim man taim yumi lukim em long namba wan taim, yumi mas mekim ol tok i opim rot bilong mekim gobek long em. Na em i bikpela samting long go bek kwiktaim long man i laik harim tok. Long olgeta taim yumi mas ting olsem yumi laik kirapim wanpela Baibel-stadi.

³⁴ Nambawan bikpela pasin i helpim yumi long mekim gut gobek em pasin bilong strongim bel bilong yumi. Olsem wanem bel bilong yumi inap kamap strong? Aposel Pol i tok “God bilong yumi em i strongim bel” bilong yumi na yumi autim gutnius bilong God long ol man. (1 Te 2:⁠2) Sapos yu laik bai bel bilong yu i kamap strong moa, beten askim Jehova long helpim yu. Na olsem yu bin beten, go lukim olgeta man i laik harim tok. Jehova bai blesim tru wok bilong yu!

[Blok long pes 3]

Olsem Wanem Yu Inap Mekim Gut Ol Gobek

■ Kamapim long ples klia olsem yu tingim tru ol man.

■ Makim wanpela tok bilong Baibel ol man i amamas long harim.

■ Long olgeta taim yu toktok wantaim man, mekim ol tok i opim rot long yu ken go bek.

■ Wok long tingim man taim yu lusim em pinis.

■ Mekim gobek bihain long wanpela o tupela de.

■ Tingim olsem yu laik kirapim wanpela Baibel-stadi.

■ Beten askim Jehova long helpim yu long strongim bel bilong mekim dispela wok.