Wok Autim Tok i Makim Olsem Yumi Stap Narapela Kain
1 Planti man i laik save, “Wanem samting i mekim na ol Witnes Bilong Jehova i stap narapela kain long ol narapela lotu?” Yu bai bekim olsem wanem? Ating yu bai stori long sampela bilip bilong yumi em Baibel i as bilong en. Tasol olsem wanem? Yu bin tingting tu long stori long olsem wanem wok autim tok bilong yumi i makim olsem yumi stap narapela kain long ol narapela lotu?—Mt 24:14; 28:19, 20.
2 Long nau, i no planti man bilong lotu i tingting long autim bilip bilong ol long ol narapela. Planti ol i ting olsem pasin bilong bihainim ol lo bilong gavman, na mekim ol stretpela pasin, o helpim ol narapela, dispela em inap. Tasol ol i no pilim olsem ol i gat wok long helpim ol narapela long kisim save long ol samting Baibel i tok yumi mas mekim bilong kisim laip. Orait, olsem wanem yumi stap narapela kain?
3 Wok bilong yumi long autim tok em i narapela kain tru long ol wok ol narapela lotu i save mekim. Winim 100 yia nau, ol Witnes i bihainim pasin bilong ol Kristen bilong pastaim na ol i givim bel tru long autim gutnius i go inap long olgeta hap bilong graun. Yumi mekim dispela wok, long wanem, yumi laik helpim planti manmeri moa long bihainim laik bilong God.—1 Ti 2:4; 2 Pi 3:9.
4 Yu Gat Wanem Kain Nem? Olsem wanem? Ol man i save long yu olsem yu man bilong givim bel long autim tok bilong God? (Ap 17:2, 3; 18:25) Wok autim tok i mekim na ol man i stap klostu ol inap save hariap olsem lotu bilong yu i narapela kain long lotu bilong ol? Ol man i save long yu olsem yu gat laik tru long toktok wantaim ol narapela long ol samting yu wetim i kamap bihain? Yu gat sedyul bilong autim tok long olgeta taim? Tingim, i no nem tasol bilong yumi i makim olsem yumi stap narapela kain, nogat; wok yumi mekim olsem nem bilong yumi i makim—yumi toktok wantaim ol narapela long Jehova—dispela tu i makim olsem yumi stap narapela kain.—Ais 43:10.
5 Pasin bilong laikim God na ol narapela i save kirapim yumi long autim tok. (Mt 22:37-39) Long dispela as, yumi laik autim tok bilong Kingdom long ol narapela long olgeta taim rot i op, olsem Jisas na ol aposel i bin mekim. Gutpela tru yumi ken wok yet long givim bel long autim gutnius long ol man i laik harim tok. Taim yumi mekim olsem, dispela bai helpim ol man i gat gutpela bel long save olsem man i mekim wok bilong God em i narapela kain long man i no mekim wok bilong God.—Mal 3:18, NW.