Husat Bai Orait Long Stadi Long Baibel?
1 Profet Amos i bin tokaut olsem ol manmeri bilong Israel bai hangre tru, tasol “dispela hangre i no bilong kaikai na wara. Ol bai hangre tumas long harim tok bilong [God].” (Amo 8:11) Bilong helpim ol man i hangre long ol samting bilong spirit, oganaisesen bilong Jehova i save tilim planti tausen buk na nius bilong Baibel long olgeta hap bilong graun.
2 Inap long nau, Sosaiti i bin prinim 70 milion buk Save na 91 milion buklet Yumi Mas Mekim Wanem? Ol tok bilong dispela buk na buklet i no gat hatwok na i gutpela bilong helpim yumi long skulim ol man long tok i tru. Tasol planti manmeri i kisim ol buk na nius bilong yumi, ol i no stadi yet wantaim yumi long Baibel. Yumi ken mekim wanem?
3 Tingim Man i Kisim Buk o Nius i Olsem Wanpela Baibel-Stadi! Tingim ekspiriens bilong wanpela pablisa. Namba wan taim em i bungim wanpela meri long haus, em i tokim meri olsem em i laik stadi wantaim em. Wantu tasol meri i orait long stadi. Bihain dispela meri i tokim pablisa, “Yu namba wan man long tokim mi olsem yu laik stadi wantaim mi long Baibel.” Hamas man long teritori bilong yu em ol i gat pinis ol buk na nius bilong yumi na ol inap mekim wankain tok? Olgeta buk na nius yumi tilim ol i opim rot bilong yumi long mekim gobek na kirapim Baibel-stadi.
4 Planti taim yumi save bungim ol man i tok ol i gat pinis wanpela buk o nius bilong yumi, olsem na yumi ken mekim wanem bilong kirapim tingting bilong ol na bai ol i gat laik long kisim save long ol tok i stap insait long dispela buk o nius. Wanpela sista i bin askim meri bilong haus olsem em i gat sampela askim long ol tok bilong Baibel, na meri bilong haus i tok, “Nogat.” Tasol sista i tok moa, “Mi save yu gat sampela askim.” Dispela meri i gat askim, na sista i kirapim stadi. Yu ken askim man bilong haus olsem i gat wanpela askim o wanpela samting em i save tingting planti long en na em i laik save, Baibel i tok wanem long dispela. Sapos em i no inap tingim wanpela samting, yu mas redi long kamapim wanpela askim em bai amamas long kisim save long en. Kain tok olsem inap opim rot bilong kirapim stadi wantaim man long ol bikpela as tok bilong Baibel.
5 Wok bilong mekim ol Baibel-stadi em i wanpela bikpela wok tru insait long wok bilong autim tok. Yumi no save husat bai i gat laik long stadi, olsem na yu no ken surik long tokim olgeta man yu bungim olsem yu laik stadi wantaim ol long Baibel. Beten long Jehova long dispela samting, na mekim ol samting i stret wantaim beten bilong yu. I no longtaim na ating wanpela man yu tokim em long stadi, em bai orait long stadi!—1 Jo 5:14, 15.