Bilong Wanem Ol Kristen i No Save Smok o Kaikai Buai?
1 Kongrigesen i stap klin, na ol manmeri insait long en ol i bin givim ‘bodi bilong ol long God olsem ofa i stap klin na i holi na God i save laikim.’ (Ro 12:1, NW) Pasin bilong smok o kaikai buai—maski buai nating o wantaim kambang—dispela i no stret. Long wanem, dispela pasin (1) inap kalabusim man, (2) bagarapim skin bilong em, na (3) em pasin i doti. (Ro 6:19; 2 Ko 7:1) Em i hatwok tru long lusim pasin bilong smok na kaikai buai, tasol yumi mas mekim olsem na bai Jehova i ken amamas long yumi.—Mk 12:29, 30.
2 Pasin bilong smok na kaikai buai inap nogutim skin bilong man, olsem na man i smok o kaikai buai, inap em i tok em i mekim wok bilong God long olgeta “strong” bilong em? Taim smok i bagarapim win ol narapela i pulim, na spet bilong buai i bagarapim ples, inap man i tok em i “laikim ol wantok”?—Mk 12:30, 31.
3 Sapos man i laik kamap pablisa i no baptais yet o insait long Skul Bilong Wok Autim Tok, pastaim em i mas lusim pasin bilong smok, kaikai buai, o kisim ol drak olsem mariwana. Sapos Kristen i baptais pinis em i go insait long ol dispela pasin i no klin, kongrigesen inap rausim em.
4 Sapos wanpela Kristen i gat diwai buai o tabak (o mariwana) long hap graun bilong em yet, o em i salim buai o tabak bilong em yet o bilong narapela man, orait em i mekim wok bilong helpim ol narapela long kisim samting bilong bagarapim ol. (Na tu, gavman i tambuim mariwana.) Dispela pasin i makim olsem em i no laikim ol narapela, olsem na em i no ken kamap pablisa i no baptais yet. (Lu 10:27) Sapos man i baptais pinis em i insait long ol dispela samting, kongrigesen inap rausim em.
5 Olsem wanem sapos brata i gat trak o kanu samting na ol wanblut samting i askim em long kisim ol i go long maket bilong salim buai o tabak o mariwana bilong ol? Na olsem wanem sapos sampela wanblut o wanples i kam bilong salim ol dispela samting na ol i laik bai brata i ken orait long ol i slip long haus bilong em? Sapos yumi save samting yumi mekim inap bagarapim skin bilong narapela na yumi mekim bilong kisim mani o bilong helpim ol wanblut, yumi no ken tok yumi laikim tru ol narapela olsem yumi laikim yumi yet, a? (Mt 22:39) Olsem wanem? I stret wanpela Kristen i ken helpim narapela long salim samting em gavman i tambuim, olsem mariwana? (2 Ko 6:3; Ta 3:1) Bilong Jehova i ken orait long ol, sampela i bin katim na rausim ol buai na tabak bilong ol yet, maski ol dispela i olsem rot bilong ol long kisim mani na ol man i tok bilas long ol. Tasol ol lain i bin mekim olsem, bel bilong ol i ken stap isi, long wanem, Jehova i no save lusim ol manmeri i save laikim lo bilong em.—Ga 6:4, 5; 1 Ko 10:13; Sng 119:97.
6 Save yumi kisim long God na long ol samting em i laik mekim, em i bikpela samting bilong kirapim yumi long sakim ol pasin i no klin. Olgeta manmeri i lusim pinis ol pasin doti ol i mas pasim tok long bel long stap klin bilong mekim wok bilong Jehova.—2 Ko 7:1, 2; 2 Pi 3:14.
This article is unique to PNG and is repeated in km 8/07.