“Samting Bilong Helpim Famili Bilong Yu”
1 Tru tumas, long olgeta hap bilong graun, ol famili i wok long bagarap. Dispela i kamapim klia olsem em i bikpela samting long yumi mas hariap na helpim famili bilong yumi long “kamap strong,” na skulim ol narapela man tu long mekim olsem long famili bilong ol.—Snd 24:3, 27.
2 Helpim i Kamap Long Taim Stret: Em i gutpela samting tru long kisim wanpela samting bilong helpim yumi long taim stret, a? (Hi 4:16) Long “Tok Profet Bilong God” Kibung Distrik, yumi bin amamas tru taim ol i toksave long nupela buk, Rot Bilong Famili i Ken Stap Amamas. Dispela buk i stori long fopela bikpela samting bilong helpim ol famili long i stap amamas: (1) Pasin bilong bosim gut skin, (2) daun long man i gat wok bos, (3) pasin bilong toktok gut wantaim, na (4) pasin sori. Ol strongpela tok i tru i stap long dispela buk inap helpim olgeta long famili long olgeta samting bilong i stap bilong ol. Ol famili i bihainim ol dispela tok, ol bai i stap amamas na ol bai kisim bel isi em God i save givim.—Skelim wantaim Aisaia 32:17, 18.
3 Long wik i kirap long Me 1, bai yumi stadi long buk Rot Bilong Famili i Ken Stap Amamas long ol Buk-Stadi Bilong Kongrigesen. Mipela i singautim olgeta pablisa, na ol nupela man, na ol pikinini long kam, yes mipela i laik kirapim yupela long kam long olgeta wik long stadi long dispela buk i kamap long taim stret. Long olgeta wik redim gut ol tok bilong stadi, na amamas long bekim ol tok.
4 Mekim Gutpela Wok Long Nupela Buk: Nau mipela i laik kirapim yupela long makim hap taim bilong ritim gut dispela nupela buk, na long save gut long ol tok i stap insait long en bambai yupela i ken redi long kamapim gut ol tok bilong en taim yupela i autim tok na tilim buk long ol narapela. Sapos yupela famili i no bin stadi yet long dispela buk Famili i Ken Stap Amamas, gutpela sapos yupela i mekim olsem, a? Na tu, taim ol nupela hevi i kamap long famili, stadi gen long ol sapta bilong dispela buk i toktok long dispela hevi, na beten na skelim olsem wanem yupela i ken bihainim ol dispela tok. I gat wanpela blok long pinis bilong olgeta wan wan sapta i gat ol gutpela tok i kamapim tingting bilong God long samting yupela i stadi long en.—Ais 48:17.
5 Ol famili i save bihainim ol pasin bilong God, ol bai stap wanbel na strong long ol samting bilong spirit, na bai ol i redi gut long karim ol hevi em Satan i putim long ol. (1 Ti 4:7, 8; 1 Pi 5:8, 9) Yumi tenkyu tru, long wanem, Man i bin kamapim famili em i save skulim yumi!
This article is unique to PNG.