Askim Ol Long Helpim Yu
1 Dispela hap tok bilong Baibel “planti hevi nogut tru,” em i makim stret dispela taim yumi stap long en. (2 Ti 3:1) Olsem na taim ol bikpela hevi bilong daunim yu long ol samting bilong spirit i painim yu na yu pilim olsem yu no inap karim ol, orait yu ken mekim wanem?
2 Olsem wanem? Yu laik toktok wantaim wanpela brata o sista long kongrigesen i strong long ol samting bilong spirit? Ating sampela ol i surik liklik long mekim olsem, long wanem, ol i sem, o ol i no laik putim hevi long narapela, o ol i ting narapela i no inap helpim ol tru. Tru, yumi mas wok strong long mekim gut wan wan wok bilong yumi inap long skel bilong yumi, tasol yumi no ken sem long askim ol narapela long helpim yumi bambai yumi ken stap strong long ol samting bilong spirit.—Ga 6:2, 5.
3 Samting Yu Ken Mekim Pastaim: Ating yu ken toktok wantaim wasman bilong Buk-Stadi na askim em long autim tok wantaim yu. Dispela bai opim rot long yu ken tokim em long laik bilong yu long kamap strong long ol samting bilong spirit. Sapos em i wanpela wokman bilong kongrigesen, tokim em olsem yu laik kisim helpim long ol samting bilong spirit na bai em i askim ol elda long helpim yu. O yu ken toktok wantaim wanpela elda, o wasman sekit, long ol samting yu laik ol i ken helpim yu long en.
4 Yu laik bai ol elda i ken helpim yu long wanem ol samting? Wanpela samting i mekim na yu no wok strong moa? Yu wanpela papa o mama wanpis na yu wok strong long helpim ol pikinini long pas gut wantaim kongrigesen? Yu wanpela lapun brata o sista na i mas i gat man bilong helpim yu? O i gat sampela hevi i wok long daunim yu? I hatwok tru long karim ol hevi bilong dispela taim nogut bilong yumi —tasol i no olsem yumi no inap karim ol hevi. I gat ol man bilong helpim yumi.
5 Pasin Bilong Ol Elda Long Helpim Man: Ol elda na ol wasman bilong raun ol i save tingim tru ol narapela. Ol bai putim gut yau long ol tingting yu kamapim. Sapos ol narapela pablisa i karim wankain hevi, ol dispela brata bai tingim dispela samting taim ol i mekim wok bilong lukautim na skulim kongrigesen. Ol i stap olsem gutpela piksa bilong kongrigesen “i ken lukim na bihainim,” na ol i redi na amamas long wok wantaim yu. (1 Pi 5:3) Taim yu putim gut yau long tok ol dispela strongpela brata i mekim bilong kamapim gut ol lo bilong Baibel, dispela bai helpim i stap bilong yu na mekim wok autim tok bilong yu i kamap gutpela moa.—2 Ti 3:16, 17.
6 Jisas i bin givim planti man olsem “presen” long yumi. (Ef 4:8) Dispela i makim olsem ol elda na ol wasman bilong raun ol i redi long helpim yu. Ol i stap bilong helpim yu, na i olsem ol i ‘bilong yu.’ (1 Ko 3:21-23) Olsem na yu no ken surik long toktok wantaim ol. Askim ol long helpim yu.