“Singautim Ol Hetman”

1. Olsem wanem Jehova i soim olsem ol sipsip bilong em i dia tumas long em?

OL SIPSIP bilong Jehova i dia tumas long em. Em i baim ol long blut bilong Jisas na em i makim ol elda bilong kongrigesen long lukautim ol sipsip bilong Em. (Apo. 20:28) God i laik bai ol elda i mekim pasin isi long ol sipsip bilong em. Aninit long wok bos bilong Krais, ol elda i save strongim na lukautim ol long ol samting we inap bagarapim ol long sait bilong bilip.—Ais. 32:​1, 2.

2. Jehova i save tingim moa yet husat lain? (Esekiel 34:​15, 16)

² Jehova i save tingim tru olgeta sipsip bilong em, tasol em i save tingim moa yet ol sipsip em ol i no strong long bilip. Long rot bilong ol elda, em i save givim helpim long ol sipsip em ol i karim hevi long sait bilong bilip. (Ritim Esekiel 34:​15, 16.) Tasol em i laik bai yumi go lukim ol elda taim yumi nidim helpim. Taim yumi karim hevi, yumi mas beten strong long God i ken helpim yumi, na tu, yumi mas askim ‘ol wasman na ol tisa’ insait long kongrigesen long helpim yumi.—Efe. 4:​11, 12.

3. Taim yumi kliagut long wok bilong ol elda, olsem wanem dispela i ken helpim yumi?

³ Long dispela atikol, yumi bai stori long arensmen God i putim long ol elda i ken helpim yumi long sait bilong bilip. Yumi bai kisim bekim bilong ol dispela askim olsem: Wanem taim yumi mas askim ol elda long helpim yumi? Wai na yumi mas mekim olsem? Na hau ol elda i save helpim yumi? Maski yumi no karim wanpela hevi long nau, ol bekim bilong ol dispela askim bai helpim yumi long pilim tru arensmen God i putim na samting yumi ken mekim taim yumi nidim helpim bilong ol elda.

WANEM TAIM YUMI MAS “SINGAUTIM OL HETMAN”?

4. Wai na yumi ken ting olsem tok bilong Jems 5:​14-16, 19, 20 i makim sik long sait bilong bilip? (Lukim tu ol piksa.)

⁴ Disaipel Jems i stori long arensmen God i putim bilong yumi ken kisim helpim long sait bilong bilip. Em i givim dispela askim olsem: “I gat wanpela namel long yupela i sik? Orait em i mas singautim ol hetman bilong kongrigesen i kam.” (Ritim Jems 5:​14-16, 19, 20.) Ol tok i stap paslain na bihain long ol dispela ves i soim olsem tok bilong Jems i makim sik long sait bilong bilip. Olsem, em i tok man i gat sik i mas singautim ol hetman na i no ol dokta. Na tu, Jems i tok olsem man i sik inap kamap orait gen taim God i fogivim ol sin bilong em. Yumi ken tok, ol samting em man i sik long sait bilong bilip i mas mekim i wankain long ol samting em man i sik tru tru i save mekim. Taim yumi sik, yumi save go lukim dokta, stori gut long em long ol mak bilong sik yumi gat, na yumi save bihainim ol edvais em i givim long yumi. Olsem tasol, taim yumi sik long sait bilong bilip, yumi mas go lukim ol elda, tokim ol long hevi yumi karim, na bihainim ol edvais bilong Baibel ol i givim long yumi.

5. Hau yumi ken save sapos yumi wok long kamap slek long bilip?

⁵ Dispela arensmen em Jems sapta 5 i stori long en i kirapim yumi long toktok wantaim ol elda taim yumi pilim olsem yumi wok long kamap slek long bilip. Tasol em i savetingting long yumi kisim helpim paslain long pasin pren bilong yumi wantaim God i bagarap! Yumi no ken giamanim yumi yet. Baibel i givim tok lukaut long yumi olsem tingting bilong yumi inap giamanim yumi long ting olsem yumi stap strong long bilip, tasol tru tru yumi slek long bilip. (Jems 1:22) Sampela Kristen long Sardis bilong bipo i mekim dispela popaia, olsem na Jisas i givim tok lukaut long ol olsem pasin bilong ol i no amamasim Jehova moa. (Rev. 3:​1, 2) Wanpela rot yumi ken luksave sapos yumi stap strong long bilip o nogat em long skelim pasin bilong yumi long lotuim Jehova long nau wantaim long bipo. (Rev. 2:​4, 5) Yumi ken askim yumi yet olsem: ‘Mi lusim amamas bilong mi long ritim Baibel na tingim tingim ol tok bilong en long bel? Mi no moa redim gut olgeta hap bilong miting na go long olgeta miting olsem long bipo? Mi no givim bel moa long autim tok olsem long pastaim? Mi putim tingting olgeta na lusim bikpela haptaim moa long kisim ol amamas na bungim mani kago samting?’ Sapos yu bekim yes long wanpela bilong ol dispela askim, orait dispela inap makim olsem yu wok long kamap slek long bilip, na sapos yu no mekim samting bilong strongim bilip bilong yu, orait bikpela hevi inap painim yu. Sapos yumi yet i no inap mekim samting bilong strongim bilip bilong yumi o sapos yumi brukim pinis ol lo bilong God, orait yumi mas askim ol elda long helpim yumi.

6. Ol man i mekim bikpela sin i mas mekim wanem?

⁶ Ol man em ol i mekim bikpela sin na dispela inap makim olsem ol inap seperet long kongrigesen, ol i mas go lukim ol elda. (1 Kor. 5:​11-13) Ol man i bin pundaun long mekim bikpela sin, ol i mas kisim helpim bilong stretim bek pasin pren bilong ol wantaim Jehova. Bilong Jehova i ken fogivim yumi long rot bilong pe bilong baim bek man, yumi mas mekim “ol wok i stret long man i tanim bel pinis.” (Apo. 26:20) Na wanpela ol dispela wok i soim olsem yumi tanim bel em long go lukim ol elda sapos yumi mekim bikpela sin.

7. Husat narapela lain i mas kisim helpim long ol elda?

⁷ Ol elda i save helpim ol lain em ol i bin mekim bikpela sin, na ol i helpim tu ol lain em ol i no strong long sait bilong bilip. (Apo. 20:35) Olsem, ating yu inap pilim olsem yu hatwok long daunim ol laik nogut. Dispela inap putim bikpela hevi tru long yu na moa yet sapos yu bin kalabus long pasin bilong kisim drak, lukim ponografi, o insait long pasin pamuk paslain long yu lainim tok i tru. No ken pret olsem yu stap wanpis long karim ol dispela hevi na i no gat helpim. Yu ken toktok wantaim wanpela elda husat bai putim yau long ol wari bilong yu, givim yu gutpela edvais, na strongim yu olsem yu inap sakim ol laik nogut na amamasim Jehova. (Ekl. 4:12) Sapos yu bel hevi olsem yu pilim hatwok long daunim ol laik nogut, orait ol elda inap kirapim yu long tingim olsem bel hevi yu pilim i soim olsem yu tingim tru pasin pren bilong yu wantaim Jehova olsem bikpela samting na yu no laik bilip long strong bilong yu yet.—1 Kor. 10:12.

8. Yu ting yumi mas tokim ol elda long olgeta popaia yumi mekim? Stori long dispela.

⁸ Em tru olsem yumi mas go lukim ol elda taim yumi nidim helpim, tasol dispela i no makim olsem yumi mas tokim ol long olgeta popaia yumi mekim. Olsem, sapos yu belhat na yu mekim wanpela tok i bagarapim bel bilong wanpela brata o sista. Orait yu ken bihainim stiatok bilong Jisas long kamap wanbel gen wantaim brata o sista bilong yu, na i no gat wok long yu go lukim ol elda. (Mat. 5:​23, 24) Yu ken mekim wok painimaut long ol topik olsem pasin isi, i no les kwik, na pasin bilong bosim bel, na bai yu ken mekim moa yet ol dispela gutpela pasin long bihain. Na sapos yu mas kisim sampela moa helpim, orait yu ken toktok wantaim wanpela elda long dispela samting. Long pas aposel Pol i raitim i go long ol Filipai, em i tokim wanpela brata em Baibel i no kolim nem bilong em long helpim Yuodia na Sintike long stretim hevi i kamap namel long tupela. Wankain olsem, wanpela elda long kongrigesen bilong yu inap helpim yu long stretim hevi i kamap.—Fili. 4:​2, 3.

WAI NA YUMI MAS KISIM HELPIM LONG OL ELDA?

9. Wai na yumi no ken larim pasin bilong sem i pasim yumi long go lukim ol elda? (Provep 28:13)

⁹ Yumi mas i gat bilip na strongpela bel na bai yumi inap askim ol elda long helpim yumi taim yumi mekim bikpela sin o taim yumi pilim olsem yumi no inap daunim wanpela laik nogut. Yumi no ken larim pasin bilong sem i pasim yumi long askim ol elda long helpim yumi. Bilong wanem? Long wanem, taim yumi bihainim arensmen Jehova i putim, yumi soim olsem yumi trastim em na ol instraksen em i putim bilong helpim yumi long stap strong long bilip. Yumi luksave olsem yumi nidim helpim bilong em na bai yumi mekim yet pasin i stret. (Sng. 94:18) Na sapos yumi mekim sin, orait God bai marimari long yumi sapos yumi tokaut long ol elda long dispela samting na yumi givim baksait long sin yumi mekim.—Ritim Provep 28:13.

10. Wanem samting inap kamap sapos yumi traim long haitim ol sin bilong yumi?

¹⁰ Taim yumi tokim ol elda long ol sin bilong yumi, Jehova bai fogivim yumi na yumi inap pas gut gen wantaim em. Tasol sapos yumi haitim ol sin bilong yumi, yumi bai karim bikpela hevi tru. Taim King Devit i traim long haitim ol sin bilong em, em i no pas gut moa wantaim Jehova, em i bel hevi na tingting planti na em i pilim sik tu. (Sng. 32:​3-5) Taim yumi sik o i gat bagarap long bodi na yumi no stretim hariap, hevi i save go bikpela moa, olsem tasol sik bilong bilip tu inap i go bikpela sapos yumi no stretim hariap. Jehova i save long dispela, olsem na em i tokim yumi long “stretim tok” wantaim em long rot bilong arensmen em i putim bilong yumi ken kisim helpim long sait bilong bilip.—Ais. 1:​5, 6, 18.

11. Sapos yumi haitim ol bikpela sin, dispela inap mekim wanem long ol narapela?

¹¹ Sapos yumi traim long haitim wanpela bikpela sin yumi mekim, orait dispela inap kamapim hevi long ol narapela. Yumi inap pasim holi spirit bilong God long helpim olgeta insait long kongrigesen na bagarapim bel isi i stap namel long ol bratasista. (Efe. 4:30) Na sapos yumi kisim save olsem wanpela insait long kongrigesen i mekim bikpela sin, yumi mas kirapim em long toktok long ol elda long dispela samting.a Sapos yumi haitim bikpela sin narapela i mekim, yumi tu bai gat asua long dispela. (Wkp. 5:1) Yumi laikim Jehova, olsem na dispela i mas kirapim yumi long tokaut long dispela samting. Taim yumi mekim olsem, yumi helpim kongrigesen long stap klin na yumi helpim dispela man o meri i mekim sin long pas gut gen wantaim Jehova.

HAU OL ELDA I SAVE HELPIM YUMI?

12. Ol elda i save mekim wanem bilong helpim ol lain em ol i no strong long bilip?

¹² Baibel i kirapim ol elda long helpim ol lain em ol i no strong long bilip. (1 Tes. 5:14) Sapos yu bin mekim wanpela sin, ol inap givim ol askim long yu bilong kliagut long tingting tru i stap long bel bilong yu. (Prov. 20:5) Yu ken helpim wok bilong ol taim yu kamapim olgeta samting long ol, maski yu pilim hatwok long mekim olsem bikos long kalsa bilong yu, o em i no pasin bilong yu long mekim olsem, o yu sem long rong yu bin mekim. No ken pret na ting olsem bai yu mekim “planti toktok nabaut.” (Jop 6:3) Ol elda i no inap mekim disisen hariap, ol bai wok strong long putim gut yau long yu na kliagut long olgeta samting i bin kamap paslain long ol i givim tok kaunsel long yu. (Prov. 18:13) Ol i save olsem bikpela haptaim i mas lus long ol i mekim wok sepeding long wanpela brata o sista, olsem na ol i save bung planti taim wantaim wanpela husat i mekim bikpela sin na bai ol i ken helpim em.

13. Taim ol elda i beten bilong helpim yumi na givim yumi edvais bilong Baibel, dispela inap helpim yumi olsem wanem? (Lukim tu ol piksa.)

¹³ Taim yu go lukim ol elda, ol i no inap mekim ol samting bilong mekim yu bel hevi moa yet long rong yu bin mekim. Ol bai beten bilong helpim yu. Yu bai luksave olsem beten bilong ol i gat “bikpela pawa.” Na tu, ‘long nem bilong Jehova ol i ken welim yu long oil.’ (Jems 5:​14-16) Dispela “oil” i makim tok i tru i stap long Tok Bilong God. Ol elda bai yusim tok bilong Baibel long mekim isi bel bilong yu na strongim yu, na helpim yu long strongim gen pasin pren bilong yu wantaim Jehova. (Ais. 57:18) Ol tok bilong Baibel ol i givim long yu inap strongim tingting bilong yu long wok yet long mekim pasin i stret. Long rot bilong ol elda, yu inap harim Jehova i tokim yu olsem: “Dispela em rot. Wokabaut long en.”—Ais. 30:21.

14. Olsem Galesia 6:1 i kamapim, hau ol elda i save helpim wanpela husat i mekim “samting i no stret”? (Lukim tu ol piksa.)

¹⁴ Ritim Galesia 6:1. Wanpela Kristen husat i mekim “samting i no stret,” em i sakim ol stretpela lo bilong God. Dispela tok samting i no stret inap makim olsem wanpela i no mekim gutpela disisen o em i mekim wanpela bikpela sin. Pasin laikim i kirapim ol elda Kristen long “traim long stretim kain man olsem long pasin isi.” Tok Grik em ol i tanim olsem “stretim,” inap makim wok bilong dokta long stretim bek bun bilong man i bruk na bai bun i ken kamap orait gen. Wankain olsem dokta i mekim olsem na em i no givim pen long sikman, ol elda i save wok strong long helpim yumi long kamap orait gen long sait bilong bilip na ol i no laik givim pen long yumi taim ol i mekim olsem. Na tu, Baibel i tokim ol long ‘was gut long ol yet.’ Ol elda i helpim yumi long bihainim ol stiatok bilong Baibel, na long wankain taim, ol i save olsem ol i no gutpela olgeta na ol inap mekim ol pasin i no stret tu. So ol i save wok strong long pilim hevi bilong yumi, na ol i no save ting olsem ol i winim yumi, ting ol i gutpela olgeta, o skelim yumi long hatpela pasin, nogat.—1 Pita 3:8.

15. Yumi mas mekim wanem sapos yumi gat wanpela hevi?

¹⁵ Yumi ken trastim ol elda long kongrigesen bilong yumi. Ol i kisim trening pinis long no ken tokaut long ol pesenel samting bilong yumi na long yusim tok bilong Baibel long i givim tok kaunsel na i no tingting bilong ol yet, na ol i gat wok yet long helpim yumi long karim ol hevi bilong yumi. (Prov. 11:13; Gal. 6:2) Ol pasin na ekspiriens bilong ol elda i no wankain, tasol yumi no ken pret long i go toktok wantaim ol long ol hevi bilong yumi. Na tingim tu olsem, yumi no inap go long wanpela elda na askim long edvais na bihain i go long narapela elda na narapela gen bikos yumi laik bai wanpela bilong ol i mekim ol tok em yumi laik harim, nogat. Sapos yumi mekim olsem, orait yumi wankain olsem ol man em ol i laik bai “yau bilong ol i sikirap long harim” tok, na ol i no laik harim “ol gutpela tok” i kam long Baibel. (2 Tim. 4:3) Taim yumi go lukim wanpela elda long hevi bilong yumi, ating em bai askim yumi sapos yumi toktok pinis wantaim ol narapela elda long dispela samting na wanem ol tok kaunsel ol i givim long yumi. Na pasin daun inap kirapim em long kisim edvais long narapela elda tu.—Prov. 13:10.

SAMTING YUMI WAN WAN I MAS MEKIM

16. Yumi wan wan i gat wanem wok long mekim?

¹⁶ Ol elda i lukautim yumi ol sipsip bilong God, tasol ol i no inap tokim yumi long wanem samting yumi mas mekim. Yumi wan wan i gat wok long bihainim pasin bilong givim bel tru long God long rot bilong toktok na pasin yumi mekim long olgeta wan wan de. Maski i olsem, yumi ken save tru olsem Jehova bai helpim yumi long sanap strong na holimpas bilip. (Rom 14:12) So ol elda i save stiaim yumi i go long tok bilong Baibel na bai yumi kisim tingting bilong God, na ol i no inap tokim yumi stret long wanem samting yumi mas mekim, nogat. Taim yumi bihainim ol tok kaunsel bilong Baibel ol i givim, yumi inap “lainim gut tingting” bilong yumi long mekim ol gutpela disisen.—Hib. 5:14.

17. Yumi mas tingting strong long mekim wanem?

¹⁷ Em gutpela blesing tru long yumi stap olsem ol sipsip bilong Jehova! Jehova i salim Jisas, em “gutpela wasman bilong sipsip,” i kam bilong givim pe bilong baim bek man na bai yumi ken i gat rot long kisim laip oltaim. (Jon 10:11) Na long rot bilong ol elda Kristen long kongrigesen, Jehova i truim tok promis bilong em olsem: “Mi bai givim yupela ol wasman i save bihainim laik bilong mi na ol bai mekim wok long save bilong ol na skelim gut ol samting na givim kaikai long yupela.” (Jer. 3:15) Taim yumi slek long bilip o sik long sait bilong bilip, yumi mas askim ol elda long helpim yumi. Yumi ken tingting strong long kisim helpim long ol elda bilong kongrigesen, em arensmen Jehova i putim bilong helpim yumi.