Hau Ol Elda i Ken Mekim Pasin Laikim na Pasin Marimari Long Ol Man i Mekim Sin

1. Wanem samting inap kamap sapos wanpela i mekim bikpela sin?

LONG atikol i go pinis, yumi stori long ol tok aposel Pol i givim long kongrigesen long Korin bilong stretim wanpela man husat i bin mekim bikpela rong. Sinman i no tanim bel na ol i mas rausim em long kongrigesen. Tasol olsem tim skripsa bilong dispela atikol i kamapim, God inap helpim sampela husat i mekim bikpela sin long tanim bel. (Rom 2:4) Olsem wanem ol elda i ken helpim ol long tanim bel?

2-3. Yumi mas mekim wanem sapos yumi save long wanpela wanbilip bilong yumi i mekim bikpela sin, na bilong wanem?

² Paslain long ol elda i helpim em, ol i mas save long wanem samting tru i kamap. So yumi mas mekim wanem sapos yumi save long wanpela wanbilip i mekim bikpela sin na dispela inap makim olsem em bai raus long kongrigesen? Yumi mas kirapim man i mekim sin long i go lukim ol elda bilong kisim helpim.—Ais. 1:18; Apo. 20:28; 1 Pita 5:2.

³ Tasol olsem wanem sapos man i mekim sin i no laik toktok wantaim ol elda? Sapos olsem, orait yumi yet i mas go lukim ol elda na bai dispela man i ken kisim helpim em i nidim. Taim yumi mekim olsem, yumi soim olsem yumi laikim brata o sista bilong yumi na yumi no laik bai em i lus. Sapos dispela brata o sista i wok yet long mekim sin, orait em bai bagarapim moa yet pasin pren bilong em wantaim Jehova. Na em inap bagarapim tu gutnem bilong kongrigesen. So yumi mas strongim bel na go lukim ol elda bikos yumi laikim Jehova na yumi laikim brata o sista bilong yumi husat i mekim sin.—Sng. 27:14.

HAU OL ELDA I SAVE HELPIM MAN I MEKIM BIKPELA SIN

4. Ol elda bai tingting long mekim wanem taim ol i bung wantaim wanpela i mekim bikpela sin?

⁴ Taim wanpela long kongrigesen i mekim bikpela sin, ol lain elda i save makim 3-pela elda namel long ol bilong insait long komiti bilong ol elda.a Ol dispela brata i mas i gat pasin daun. Ol bai traim long helpim man i mekim sin long tanim bel, tasol ol i luksave tu olsem ol i no inap fosim wanpela man long senisim pasin bilong em. (Lo 30:19) Ol elda i luksave olsem i no olgeta sinman i save kisim tok bilong stretim ol na tanim bel, olsem King Devit i bin mekim. (2 Sml. 12:13) Sampela sinman inap makim olsem ol i no laik bihainim ol tok kaunsel bilong Jehova. (Stt. 4:​6-8) Maski i olsem, astingting ol elda i gat em long traim bes long helpim dispela sinman long tanim bel sapos ol inap mekim olsem. Ol elda i mas larim wanem ol stiatok i stiaim ol taim ol i bung wantaim sinman?

5. Ol elda i mas holim wanem tingting taim ol i bung wantaim sinman? (2 Timoti 2:​24-26) (Lukim tu piksa.)

⁵ Ol elda i mas tingim dispela sinman olsem wanpela sipsip i dia tumas i lus. (Luk 15:​4, 6) Olsem na taim ol i bung wantaim dispela brata o sista, ol i no save mekim hatpela tok, hatpela pasin, o pasin i no gutpela tumas, na tu, ol i no tingim dispela bung olsem taim bilong givim ol askim na kisim ol bekim na em tasol, nogat. Ol bai kamapim ol pasin i stap long 2 Timoti 2:​24-26. (Ritim.) Ol elda i mas wok yet long mekim pasin isi, toktok isi, na mekim gutpela pasin taim ol i wok strong long putim tok i go daun long bel bilong sinman na helpim em long senisim tingting bilong em.

6. Olsem wanem ol elda i ken lusim haptaim long kisim tingting bilong Jehova paslain long ol i bung wantaim man i mekim rong? (Rom 2:4)

⁶ Ol elda i lusim haptaim long kisim tingting bilong Jehova. Ol i traim long bihainim tingting bilong Jehova taim ol i stretim wanpela sinman, bikos ol i tingim tok Pol i mekim olsem: “God i mekim pasin helpim long yu bilong kirapim yu long tanim bel.” (Ritim Rom 2:4.) Ol elda i mas tingim olsem ol i stap olsem wasman bilong sipsip aninit long daireksen bilong Krais. (Ais. 11:​3, 4; Mat. 18:​18-20) Paslain long ol i bung wantaim sinman, komiti bai beten na skelim gen astingting bilong ol: em long helpim sinman long tanim bel. Ol bai mekim wok painimaut long Ol Skripsa na ol pablikesen bilong yumi bilong kisim tingting bilong Jehova na beten bilong skelim gut ol samting. Na ol bai tingim tu ol samting ol i save long en long bekgraun na sindaun bilong dispela brata o sista we inap stiaim tingting na pasin bilong em na i kirapim em long mekim sin.—Prov. 20:5.

7-8. Olsem wanem ol elda i ken bihainim pasin bilong Jehova long i no les kwik taim ol i bung wantaim man i mekim sin?

⁷ Ol elda i bihainim pasin bilong Jehova long i no les kwik. Ol i tingim pasin em Jehova i bin mekim long ol man i mekim sin long bipo. Olsem, Jehova i no les kwik taim em i toktok wantaim Kein, na em i givim tok lukaut long em long samting nogut em sin i save kamapim na em i givim em rot long senisim pasin na bai em i ken kisim blesing. (Stt. 4:​6, 7) Jehova i stretim Devit taim em i salim profet Natan i go long em, na Natan i yusim wanpela tok piksa we king i pilim tru long bel na em i tanim bel. (2 Sml. 12:​1-7) Na Jehova i “wok long salim” ol profet bilong em “planti taim” i go bilong helpim lain Israel em ol i no save bihainim tok. (Jer. 7:​24, 25) Em i no wetim ol long tanim bel paslain long em i helpim ol, nogat. Em yet i go pas long kirapim ol long tanim bel.

⁸ Ol elda i bihainim eksampel bilong Jehova taim ol i traim long helpim ol man i mekim bikpela sin. Olsem 2 Timoti 4:2 i stiaim ol long mekim, ol “i no les kwik” taim ol i toktok gut wantaim wanbilip em bel na tingting bilong em i no stap isi. So oltaim ol elda i stap isi na i no les kwik na bai ol i ken helpim sinman long i gat laik long mekim samting i stret. Sapos ol elda i belhat o kros, dispela inap mekim na sinman i no inap putim yau long edvais ol i givim em o em i no inap tanim bel.

9-10. Olsem wanem ol elda i ken helpim sinman long luksave long wanem ol disisen em i mekim we i kirapim em long mekim sin?

⁹ Ol elda i traim long kisim save long wanem ol pasin o disisen i kirapim em long mekim sin. Olsem wanem? Isi isi dispela Kristen i kamap slek long bilip bikos em i lusim pasin bilong mekim pesenel stadi o em i lusim wok autim tok? Em i lusim pasin bilong beten oltaim long Jehova o em i wok long kolim nating ol tok long beten? Em i wok long larim ol laik nogut i stiaim bel na tingting bilong em? Em i bin raun wantaim ol poroman nogut o makim ol amamas i no stret? Ol dispela disisen bilong em i mekim wanem long bel na tingting bilong em? Em i luksave olsem ol disisen na ol pasin bilong em i mekim Papa bilong em Jehova i bel hevi?

¹⁰ Taim ol i givim ol gutpela askim olsem na ol i no givim ol pesenel askim long em long ol samting ol i no gat wok long save long en, ol bai helpim man i mekim sin long kamapim tingting i stap long bel bilong em na long tingim ol samting we i bagarapim pasin pren bilong em wantaim Jehova. (Prov. 20:5) Na tu, ol inap yusim ol tok piksa bilong helpim em long wokim gut tingting na helpim em long luksave long rong em i mekim, olsem Natan i mekim long Devit. Long fes taim ol i bung wantaim em, ating sinman bai bel hevi tru long rong em i bin mekim. Na ating em inap tanim bel.

11. Jisas i mekim wanem long ol sinman?

¹¹ Ol elda i wok strong long bihainim pasin bilong Jisas. Taim Jisas i toktok wantaim Sol bilong Tarsus, em i helpim em long rot bilong wanpela gutpela askim olsem: “Sol, Sol, bilong wanem yu wok long mekim nogut long mi?” Long dispela rot, Jisas i helpim em long luksave olsem pasin em i mekim i no stret. (Apo. 9:​3-6) Na tu, Jisas i bin stori long “dispela meri Jesebel,”b na em i tok: “Mi larim hap taim bai em i ken tanim bel.”—Rev. 2:​20, 21.

12-13. Olsem wanem ol elda inap givim inap taim long man i mekim sin long tanim bel? (Lukim tu piksa.)

¹² Ol elda i bihainim pasin bilong Jisas, na ol i no hariap long kisim tingting olsem man i mekim sin bai no inap tanim bel. Sampela inap tanim bel long fes taim komiti i sindaun wantaim ol, tasol ol narapela bai nidim sampela haptaim moa. So ol elda i ken stretim rot bilong bung wantaim sinman sampela taim moa. Bihain long fes taim ol elda i bung wantaim man i mekim sin, ating em bai tingim gen ol tok ol i bin givim long em. Na em inap daunim em yet na askim Jehova long fogivim em. (Sng. 32:5; 38:18) So taim ol i bung wantaim em gen long narapela taim, pasin bilong em inap senis na i no wankain long pasin em i bin mekim long fes taim ol i bung wantaim em.

¹³ Bilong helpim sinman long tanim bel, ol elda i soim olsem ol i pilim hevi bilong em na mekim gutpela pasin long em. Ol i bilip na beten olsem Jehova bai blesim hatwok bilong ol, na bai dispela Kristen i mekim sin i ken kisim stretpela tingting na tanim bel.—2 Tim. 2:​25, 26.

14. Taim sinman i tanim bel, husat tru i ken kisim biknem long dispela, na bilong wanem?

¹⁴ Taim sinman i tanim bel, em taim bilong bikpela amamas tru! (Luk 15:​7, 10) Husat tru i ken kisim biknem long dispela? Yu ting em ol elda? Tingim tok Pol i mekim long ol sinman olsem: “Ating God bai larim ol i tanim bel.” (2 Tim. 2:25) So Jehova i ken kisim biknem bikos em i helpim wanpela Kristen long senisim tingting na pasin bilong em, na i no wanpela man. Pol i stori long gutpela samting i save kamap taim wanpela i tanim bel. Dispela man i ken kisim sampela stretpela save moa long tok i tru, tingting bilong em i ken kamap klia gen, na em i ken sakim ol traim bilong Satan.—2 Tim. 2:26.

15. Olsem wanem ol elda i ken wok yet long helpim wanpela man i mekim sin long tanim bel?

¹⁵ Taim man i mekim sin i tanim bel, komiti bai stretim rot bilong mekim ol sepeding visit long em na bai em i wok yet long kisim helpim em i nidim bilong sakim ol traim bilong Satan na bihainim yet stretpela rot. (Hib. 12:​12, 13) Ol elda i no inap tokim ol narapela long ol rong na ol samting em dispela sinman i bin mekim. Tasol ol i ken toksave long kongrigesen long wanem samting?

‘STRETIM OL MAN LONG AI BILONG OL ARAPELA’

16. Olsem Pol i tok long 1 Timoti 5:​20, dispela tok “long ai bilong ol arapela” i makim husat?

¹⁶ Ritim 1 Timoti 5:20. Pol i raitim dispela tok i go long wanwok bilong em Timoti husat i mekim wok elda tu long pasin ol i mas bihainim bilong stretim man i “wokabaut long pasin bilong sin.” Tok bilong Pol i makim husat? Long tok bilong em, dispela tok “long ai bilong ol arapela” i no makim kongrigesen olgeta, nogat. Tok bilong em i makim sampela insait long kongrigesen husat i save pinis long sin em dispela man i bin mekim. Em ol lain husat i bin lukim ol rong dispela man i bin mekim o ating em yet i bin tokim ol long ol sin em i bin mekim. Ol elda i ken bihainim savetingting na toksave long ol dispela bratasista taim ol i stap ol yet olsem ol i stretim pinis dispela hevi na ol i stretim pinis dispela sinman.

17. Sapos wanpela i mekim bikpela sin na planti long kongrigesen i save long en o klostu nau ol bai save long en, orait ol elda bai mekim wanem toksave, na bilong wanem?

¹⁷ Sampela taim, planti insait long kongrigesen i save long rong em dispela man i bin mekim o klostu nau ol bai save long en. Long kain taim olsem, dispela tok “long ai bilong ol arapela” inap makim kongrigesen olgeta. So wanpela elda bai mekim toksave long kongrigesen olsem ol i stretim pinis dispela brata o sista i bin mekim rong. Bilong wanem ol elda i mas mekim olsem? Pol i tok: “Bai dispela i ken stap olsem tok lukaut long ol arapela” na bai ol i no ken pundaun na mekim sin.

18. Sapos pikinini aninit long 18 krismas husat i baptais pinis i mekim sin, hau ol elda bai stretim dispela hevi? (Lukim tu piksa.)

¹⁸ Sapos pikinini aninit long 18 krismas husat i baptais pinis i mekim bikpela sin, hau ol elda bai stretim dispela hevi? Lain elda bai makim tupela elda long bung wantaim dispela pikinini wantaim papamama Kristen bilong em.c Lain elda bai painimaut long wanem ol samting em papamama i bin mekim pinis bilong helpim pikinini bilong ol long senisim pasin bilong em na tanim bel. Sapos pikinini i bihainim tok kaunsel bilong papamama na em i wok long senisim tingting na pasin bilong em, orait dispela tupela elda i ken wokim disisen long larim papamama i wok yet long helpim pikinini bilong ol. Ol elda i save olsem Jehova i givim wok long papamama long stretim ol pikinini bilong ol long gutpela pasin na pasin laikim. (Lo 6:​6, 7; Prov. 6:20; 22:6; Efe. 6:​2-4) Bihain long en, sampela taim ol elda i ken toktok wantaim papamama long lukim sapos ol i wok long helpim pikinini bilong ol o nogat. Tasol olsem wanem sapos dispela yangpela i wok yet long mekim sin na i no tanim bel? Long kain taim olsem, komiti bilong ol elda bai bung wantaim em na papamama Kristen bilong em.

“JEHOVA I GAT PASIN BILONG SORI TRU NA MARIMARI”

19. Olsem wanem ol elda i ken wok strong long bihainim pasin bilong Jehova taim ol i bung wantaim wanpela i mekim sin?

¹⁹ Ol elda i stap long ol komiti, ol i gat wok em Jehova i givim long ol bilong helpim kongrigesen long stap klin. (1 Kor. 5:7) Tasol long wankain taim, ol bai mekim olgeta samting ol inap mekim bilong helpim man i mekim sin long tanim bel. Bilong mekim olsem, ol elda i mas holim stretpela tingting na bilip olsem dispela man inap tanim bel. Bilong wanem? Long wanem, ol i laik bihainim pasin bilong Jehova, em Man “i gat pasin bilong sori tru na marimari.” (Jems 5:11) Luksave long hau lapun aposel Jon i holim wankain tingting olsem. Em i tok: “Ol pikinini bilong mi, mi rait na stori long ol dispela samting bai yupela i no ken mekim sin. Tasol sapos man i mekim sin, yumi gat wanpela helpim i stap wantaim Papa, em Jisas Krais, wanpela stretpela man.”—1 Jon 2:1.

20. Bai yumi stori long wanem samting long laspela atikol bilong dispela siris?

²⁰ Sori tru, sampela taim wanpela Kristen i no laik tanim bel. Sapos olsem, em i mas raus long kongrigesen. Hau ol elda bai stretim kain ol siries keis olsem? Bai yumi stori long dispela samting long laspela atikol bilong dispela siris.