Hau Ol Elda i Ken Helpim Ol Manmeri Em Ol i Seperetim Ol Long Kongrigesen

1-2. (a) Jehova i gat wanem tingting long ol man em ol i mekim bikpela sin na ol i no laik tanim bel? (b) Jehova i laik bai ol man i mekim sin i mas mekim wanem?

JEHOVA i no save orait tasol long olgeta kain pasin, na em i no save orait long pasin bilong mekim sin. (Sng. 5:​4-6) Em i laik bai yumi rispektim ol stretpela lo bilong em na em i putim ol dispela lo long Baibel bilong yumi ken bihainim. Tasol Jehova i save olsem yumi no gutpela olgeta, olsem na em i no ekspektim yumi long bihainim stret olgeta lo bilong em. (Sng. 130:​3, 4) Tasol long wankain taim, em i no orait long ol man nogut em “ol i ting bikpela pasin helpim bilong God i givim rot long ol long mekim pasin bikhet na i no sem.” (Jut 4) Baibel i tok: “Ol man i sakim tok bilong God, ol bai bagarap olgeta” long pait bilong God long Armagedon.—2 Pita 3:7; Rev. 16:16.

² Tasol Jehova i no laik bai wanpela man i kisim bagarap. Olsem yumi stori long ol atikol i go pinis, Baibel i tokaut klia olsem “em i laik bai olgeta i tanim bel.” (2 Pita 3:9) Ol elda Kristen i bihainim pasin bilong Jehova long i no les kwik taim ol i traim long helpim ol man i mekim sin long senisim ol pasin bilong ol na pas gut gen wantaim Jehova. Tasol i no olgeta man husat i mekim rong i save bihainim tok na tanim bel. (Ais. 6:9) Sampela i save wok yet long bihainim ol pasin nogut, maski ol elda i traim planti taim long helpim ol long tanim bel. Ol elda i mas mekim wanem long kain taim olsem?

SEPERETIM MAN NOGUT

3. (a) Baibel i tok long mekim wanem long ol man i mekim sin na ol i no laik tanim bel? (b) Taim wanpela i mekim sin na em i no laik tanim bel, wai na yumi ken tok olsem em yet i makim olsem em i laik seperet long kongrigesen?

³ Taim wanpela man i mekim sin na em i no laik tanim bel, ol elda i mas bihainim daireksen i stap long 1 Korin 5:13 olsem: “Yupela i mas [seperetim] man nogut i stap namel long yupela.” I olsem dispela mana i mekim sin, em yet i makim olsem em i laik seperet long kongrigesen, so em i kamautim samting em yet i planim. (Gal. 6:7) Wai na yumi ken tok olsem? Yumi tok olsem bikos planti taim ol elda i givim tok bilong kirapim em long tanim bel, tasol em i sakim tok bilong ol. (2 Kin. 17:​12-15) Ol pasin bilong em i soim olsem em i no laik bihainim ol lo bilong Jehova.—Lo 30:​19, 20.

4. Taim wanpela man i mekim sin na em i no laik tanim bel, wai na ol elda i save mekim toksave taim ol i seperetim em long kongrigesen?

⁴ Taim wanpela man i mekim sin na i no laik tanim bel, ol elda i mas seperetim em long kongrigesen, na ol i save mekim toksave bilong kongrigesen i ken save olsem dispela man i no stap moa olsem wanpela Witnes Bilong Jehova.b Dispela toksave i no bilong semim dispela man i mekim rong, nogat. Ol i mekim dispela toksave na bai kongrigesen i ken bihainim tok Baibel i mekim olsem “lusim pasin bilong poroman” wantaim dispela man, na “no ken kaikai wantaim” em. (1 Kor. 5:​9-11) I gat gutpela risen na Jehova i givim dispela daireksen. Aposel Pol i tok: “Liklik yis tasol i save mekim bret olgeta i solap.” (1 Kor. 5:6) Ol man i mekim sin na ol i no laik tanim bel, ol inap mekim ol narapela i slek long bihainim ol stretpela lo bilong Jehova.—Prov. 13:20; 1 Kor. 15:33.

5. Yumi mas i gat wanem tingting long ol man i seperet long kongrigesen, na bilong wanem?

⁵ Yumi mas i gat wanem tingting long wanpela wanbilip husat i seperet long kongrigesen? Maski yumi no lusim haptaim long mekim ol samting wantaim em, yumi mas tingim em olsem wanpela sipsip i lus, na i no olsem wanpela man i no gat hop olgeta. Wanpela sipsip i lusim lain sipsip em inap kam bek long lain sipsip. Yumi mas tingim olsem, dispela sipsip i lus em wanpela husat i bin dediketim em yet long Jehova. Sori tru olsem, long nau yet em i no bihainim dediket bilong em, na dispela i wok long nogutim em. (Ese. 18:31) Maski i olsem, i gat taim i stap yet na Jehova i redi long mekim pasin marimari long em, olsem na i gat hop olsem em inap kam bek. Olsem wanem ol elda i ken helpim wanpela man i seperet long kongrigesen long luksave olsem i gat hop long em i ken kam bek long kongrigesen?

HAU OL ELDA I SAVE HELPIM MAN O MERI EM OL I SEPERETIM LONG KONGRIGESEN

6. Ol elda bai mekim wanem bilong helpim man o meri em ol i bin seperetim em long kongrigesen?

⁶ Yu ting ol elda bai lusim tingting olgeta long wanpela em ol i bin seperetim em long kongrigesen na larim em yet i painim rot bilong kam bek long Jehova? Nogat tru! Taim komiti bilong ol elda i toksave long man i mekim sin na i no laik tanim bel olsem ol bai seperetim em long kongrigesen, ol bai stori gut long em long wanem ol samting em i ken mekim bilong kam bek long kongrigesen. Na ol elda bai mekim sampela samting moa. Olsem, ol bai tokim em olsem ol bai bung gen wantaim em bihain long sampela mun bilong lukim sapos em i senisim ol tingting na pasin bilong em. Sapos em i orait long bung gen wantaim ol, orait long dispela bung ol elda bai toktok gut wantaim em na kirapim em long tanim bel na kam bek. Long dispela taim, sapos em i soim olsem em i no senisim ol tingting na pasin bilong em, orait ol elda bai makim ol narapela taim bilong bung gen wantaim em.

7. Olsem wanem ol elda i bihainim pasin sori bilong Jehova long pasin ol i mekim long wanpela i seperet long kongrigesen? (Jeremaia 3:12)

⁷ Ol elda i wok strong long bihainim pasin sori bilong Jehova long pasin ol i mekim long wanpela i seperet long kongrigesen. Olsem, Jehova i no bin wet long bikhetlain Israel i mekim ol samting bilong kam bek long em, nogat. Em i go pas long mekim ol samting bilong helpim ol paslain long ol i soim olsem ol i tanim bel. Olsem yumi bin stori long namba 2 atikol bilong dispela siris, Jehova i soim pasin sori bilong em taim em i tokim profet Hosea long kamap wanbel gen wantaim meri bilong em, husat i wok yet long mekim sin. (Hos. 3:1; Mal. 3:7) Ol elda Kristen i bihainim pasin bilong Jehova, na ol i laik tru long helpim sinman long kam bek, na ol i laik mekim ol samting na bai em isi long em i ken kam bek.—Ritim Jeremaia 3:12.

8. Olsem wanem tok piksa bilong Jisas long pikinini i lusim papa i helpim yumi long kliagut moa long pasin sori na pasin marimari bilong Jehova? (Luk 15:7)

⁸ Tingim tok piksa bilong Jisas long pikinini i lusim papa olsem yumi stori long en long namba 2 atikol bilong dispela siris. Taim papa i lukim pikinini bilong em i wokabaut i kam, “em i ran i go na holimpasim em na givim kis long em.” (Luk 15:20) Papa i no wet long pikinini i kam bek na askim em long fogivim em, nogat. Em i go pas long kisim pikinini bilong em bikos em i laikim em. Ol elda i wok strong long mekim wankain pasin long ol man i lusim Jehova. Ol i laik bai ol dispela manmeri i lusim Jehova i kam bek long em. (Luk 15:​22-24, 32) Amamas i save kamap long heven taim wanpela sinman i kam bek long Jehova, na kongrigesen olgeta tu i save amamas.—Ritim Luk 15:7.

9. Jehova i laik bai ol man i mekim sin i mas mekim wanem?

⁹ Olsem yumi skelim pinis, em i klia tru olsem Jehova i no save orait long ol man i mekim sin na i no tanim bel. Tasol em i no save givim baksait long ol man i mekim sin. Em i laik bai ol i mas kam bek. Hosea 14:4 i kamapim klia samting Jehova i save pilim taim man i mekim sin i tanim bel, em i tok: “Mi bai mekim ol i kamap orait gen na ol bai i no givim baksait moa long mi. Long laik bilong mi yet, mi bai laikim ol, long wanem, mi no belhat moa.” Ol elda i save long dispela samting Jehova i pilim, olsem na ol i save lukluk long ol mak i soim olsem man i tanim bel. Na dispela i mas kirapim ol man em ol i lusim Jehova long senisim pasin bilong ol na kwiktaim ol i mas kam bek long em.

10-11. Ol elda bai mekim wanem bilong traim long helpim ol man em ol i bin seperet long kongrigesen long bipo?

¹⁰ Olsem wanem long ol manmeri em ol i bin seperet long kongrigesen long bipo, ating inap planti yia i go pinis? Ating ol dispela manmeri i stop pinis long mekim ol pasin nogut em ol i bin mekim na ol i seperet long kongrigesen. Sampela taim ol i no inap tingim wanem sin ol i bin mekim na ol i seperet long kongrigesen. Maski hamas yia i lus, ol elda bai traim long painim ol dispela manmeri na visitim ol. Long ol dispela taim ol i visitim ol, ol elda bai beten wantaim ol na toktok gut long ol na kirapim ol long kam bek long kongrigesen. Em tru olsem sapos wanpela i bin stap longwe long kongrigesen inap planti yia, em bai i no strong moa long ol samting bilong bilip. Olsem na sapos em i soim olsem em i laik kam bek long kongrigesen, ol elda bai stretim rot long wanpela i ken stadi long Baibel wantaim em, maski kongrigesen i no kisim em bek yet. Long ol kain taim olsem, ol elda yet i mas makim husat brata o sista bai stadi wantaim em.

¹¹ Ol elda i bihainim pasin bilong Jehova long sori long ol manmeri, olsem na ol i mas go visitim olgeta manmeri husat i bin seperet long kongrigesen na helpim ol long save olsem rot i op yet long ol i ken kam bek. Taim wanpela sinman i soim klia olsem em i tanim bel na lusim rot bilong sin em i bihainim, kwiktaim kongrigesen i ken kisim em bek.—2 Kor. 2:​6-8.

12. (a) Long wanem ol taim, ol elda i mas was gut? (b) Wai na yumi no ken ting olsem Jehova i no inap marimari long ol man em ol i bin mekim sampela kain sin? (Lukim tu futnot.)

¹² Long sampela sin ol man i mekim, ol elda i mas was gut paslain long ol i kisim ol bek. Olsem, sapos wanpela i seperet long kongrigesen bikos em i abiusim ol pikinini o em i insait long pasin apostet o em i mekim pasin giaman bilong katim marit na bai em i ken maritim narapela, long kain taim olsem ol elda i mas skelim gut na bai ol i ken save olsem tru tru em i tanim bel, o nogat. (Mal. 2:14; 2 Tim. 3:6) Ol i mas lukautim ol bratasista insait long kongrigesen. Long wankain taim, yumi mas luksave olsem Jehova bai kisim bek wanpela husat i tanim bel tru tru long ol sin em i bin mekim na em i stop long mekim pasin nogut. Em tru olsem ol elda i laik bai ol man i mekim pasin giaman long ol narapela i soim olsem ol i tanim bel tru tru, tasol ol elda i no ken ting olsem Jehova i no inap soim pasin marimari long ol man i mekim kain ol sin olsem.c—1 Pita 2:10.

SAMTING KONGRIGESEN I KEN MEKIM

13. Olsem wanem pasin yumi mekim long wanpela em ol elda i stretim em i no wankain long pasin yumi mekim long wanpela em ol elda i seperetim em long kongrigesen?

¹³ Olsem yumi stori long atikol i go pinis, sampela taim toksave i save kamap olsem ol elda i stretim pinis wanpela i bin mekim rong. Long kain taim olsem, yumi ken wok yet long bung wantaim em, long wanem, yumi save olsem em i tanim bel na lusim pasin nogut bilong em. (1 Tim. 5:20) Em i stap yet olsem hap bilong kongrigesen na em i nidim ol gutpela tok i kam long ol narapela wanbilip bilong strongim em. (Hib. 10:​24, 25) Tasol dispela em i no wankain long pasin yumi mas mekim long wanpela husat i seperet long kongrigesen. Yumi “lusim pasin bilong poroman” wantaim em, na tu, yumi “no ken kaikai wantaim kain man olsem.”—1 Kor. 5:11.

14. Olsem wanem ol Kristen i ken yusim maus bilong bel bilong ol em Baibel i trenim pinis long pasin ol i mekim long wanpela em ol elda i bin seperetim em long kongrigesen? (Lukim tu piksa.)

¹⁴ Long ol tok yumi skelim, yu ting dispela i makim olsem yumi mas abrusim tru ol man i seperet long kongrigesen? Nogat, i no olsem. Em tru olsem yumi no inap lusim haptaim long stap wantaim em. Tasol ol Kristen i ken yusim maus bilong bel bilong ol em Baibel i trenim pinis long wokim disisen olsem ol bai invaitim wanpela husat i seperet long kongrigesen, ating em wanpela wanblut o wanpela pren bilong ol long bipo, long kam long miting bilong kongrigesen, o nogat. Sapos em i kam long miting, orait yumi ken mekim wanem long em? Long pastaim, yumi no save toktok wantaim kain man olsem. Tasol nau wan wan Kristen yet i ken yusim maus bilong bel em Baibel i skulim pinis long makim samting em bai mekim. Sampela inap pilim olsem em orait long gritim em o welkamim em long taim em i kam long miting. Tasol yumi no inap stori planti wantaim em o lusim sampela haptaim long mekim ol narapela samting wantaim em.

15. Namba 2 Jon 9-11 i stori long wanem kain ol sinman? (Lukim tu blok “Yu Ting Jon na Pol i Stori Long Wankain Sin?”)

¹⁵ Sampela inap ting olsem, ‘Baibel i tok olsem sapos wanpela Kristen i tok gude long wanpela sinman, em i poromanim em long ol wok nogut bilong em.’ (Ritim 2 Jon 9-11.) Ol tok i stap paslain na bihain long dispela skripsa i soim olsem dispela tok i makim ol apostet na ol man em ol i wok yet long kirapim ol narapela long mekim ol pasin nogut. (Rev. 2:20) Olsem na sapos wanpela i kirapim ol narapela long bihainim ol tok bilong ol apostet o sapotim ol narapela pasin nogut, ol elda i no inap stretim rot long i go visitim em. Em tru olsem, i gat hop olsem dispela man inap tanim bel. Tasol sapos em i no mekim olsem yet, orait yumi no inap tok gude long kain man olsem o invaitim em long miting bilong kongrigesen.

BIHAINIM PASIN SORI NA PASIN MARIMARI BILONG JEHOVA

16-17. (a) Jehova i laik bai ol sinman i mas mekim wanem? (Esekiel 18:32) (b) Olsem wanem ol elda i ken soim olsem ol i wanwok bilong Jehova taim ol i laik helpim ol sinman?

¹⁶ Yumi kisim wanem skul long ol atikol i stap long dispela Wastaua? Jehova i no laik bai wanpela man i kisim bagarap! (Ritim Esekiel 18:32.) Em i laik bai ol sinman i kamap wanbel gen wantaim em. (2 Kor. 5:20) Em risen na long bipo yet na i kam inap long nau, oltaim Jehova i save kirapim ol wokman bilong em, em ol i lusim em long tanim bel na kam bek long em. Ol elda bilong kongrigesen i amamas long stap wanwok bilong Jehova taim ol i wok strong long helpim ol sinman long tanim bel.—Rom 2:4; 1 Kor. 3:9.

¹⁷ Tingim amamas i save kamap long heven taim ol sinman i tanim bel! Papa bilong yumi long heven, Jehova, em i save pilim dispela amamas long olgeta taim wanpela sipsip bilong em i bin lus i kam bek long kongrigesen. Pasin bilong yumi long laikim Jehova i kamap strong moa taim yumi tingim tingim long bel pasin sori, pasin marimari, na bikpela pasin helpim bilong em.—Luk 1:78.