Ol Witnes Bilong Jehova i Save Givim Baksait Long Ol Lain i No Lotu Moa Wantaim Ol?

Mipela i save wok strong long soim pasin laikim, pasin helpim, na rispek long olgeta. Sapos wanpela Witnes i go sampela taim tasol long lotu o i no go moa long lotu, orait mipela i save go lukim em, tokim em olsem mipela i laikim em, na kirapim em long tingim ol samting bilong lotu.​—Luk 15:4-7.

Sampela taim, pasin bilong man yet i mekim na em i seperet long kongrigesen. (1 Korin 5:13) Tasol bikos mipela i laikim tru wanbilip, mipela i wok strong long helpim em paslain long em i seperet. Na maski em i seperet, mipela i soim yet pasin laikim na rispek, olsem Baibel i kirapim mipela long mekim. ​—Mak 12:31; 1 Pita 2:17.

Wanem samting i save mekim na man i seperet long kongrigesen?

Baibel i kamapim klia olsem sapos wanpela Kristen i mekim bikpela sin na em i no laik senis, orait em i mas seperet long kongrigesen.a (1 Korin 5:11-13) Baibel i kolim ol sin i bikpela tru we man inap long seperet long kongrigesen. Olsem, em i kolim ol pasin olsem pasin adaltri, dring spak, kilim i dai narapela man, mekim nogut long wanfamili, na stil.​—1 Korin 6:9, 10; Galesia 5:19-21; 1 Timoti 1:9, 10.

Tasol mipela i no save hariap long seperetim ol man husat i mekim bikpela sin long kongrigesen. Pastaim ol elda bilong Kongrigesenb i save helpim em long senisim pasin bilong em. (Rom 2:4) Ol i bihainim pasin isi na mekim gutpela pasin long em bilong save long tingting i stap long bel bilong em. (Galesia 6:1) Dispela inap helpim man i mekim rong long luksave long ol popaia bilong em na tanim bel. (2 Timoti 2:24-26) Sapos planti taim ol i givim helpim long em, tasol em i mekim pasin bilong brukim lo bilong Baibel i kamap olsem pasin bilong em na em i no tanim bel, orait em i mas seperet long kongrigesen. Ol elda i save toksave long kongrigesen olsem dispela man o meri i seperet olsem wanpela Witnes Bilong Jehova.

Wanem gutpela samting i kamap long pasin bilong seperetim wanpela husat i mekim sin? Wanpela samting, kongrigesen bai holimpas stretpela pasin na dispela bai lukautim ol narapela na ol i no ken bihainim pasin nogut bilong em. (1 Korin 5:6; 15:33; 1 Pita 1:16) Na tu, dispela bai kirapim man i mekim rong long sakim ol pasin nogut em i bihainim na wok strong long mekim senis.​—Hibru 12:11.

Ol Witnes Bilong Jehova i save mekim wanem kain pasin long lain i seperet long kongrigesen?

Baibel i tok ol Kristen i mas “lusim pasin bilong poroman wantaim” wanpela husat i seperet long kongrigesen, na tu, ol “i no ken kaikai wantaim kain man olsem.” (1 Korin 5:11) Olsem na yumi no save bung wantaim wanpela husat i seperet. Tasol dispela i no makim olsem yumi lusim em olgeta, nogat. Yumi save toktok na mekim pasin i soim olsem yumi rispektim em. Em i ken kam long ol taim mipela i mekim bung bilong ol lotu, na ol Witnes Bilong Jehova husat i bung long dispela taim i ken welkamim em.c Man i sepret i ken askim tu long kisim helpim long sait bilong bilip long rot bilong toktok wantaim ol elda.

Olsem wanem long wanpela husat i seperet long kongrigesen, tasol poroman marit na ol liklik pikinini bilong em i stap yet olsem ol Witnes Bilong Jehova? Maski em i no lotu moa wantaim ol, ol i stap yet olsem wanpela famili. Bikos ol i stap yet long seim haus, em i stap yet olsem man o meri marit, na papa o mama bilong ol pikinini, olsem na ol i mekim yet pasin laikim long narapela narapela.

Wanpela husat i seperet i ken askim ol elda long i kam lukim em, ol bai givim ol gutpela tok bilong Baibel na long gutpela pasin ol bai kirapim em long tanim bel na kam bek long God. (Sekaraia 1:3) Sapos em i lusim ol pasin nogut na kamapim klia olsem em i gat laik long bihainim ol stretpela lo bilong Baibel, em inap long stap hap bilong kongrigesen gen. Kongrigesen bai “redi long fogivim em na mekim isi bel bilong em,” olsem ol Kristen long Korin i mekim taim wanpela sin man i senisim ol pasin bilong em.​—2 Korin 2:6-8.

Ol lain em bipo ol i seperet i pilim olsem wanem?

Lukim tok sampela Witnes Bilong Jehova husat i bin seperet long kongrigesen na bihain ol i mekim disisen long kam bek long God i mekim.

“Taim mi tingting long kam bek long kongrigesen, mi ting olsem ol elda bai laik long save long olgeta samting mi mekim long planti yia we mi seperet. Tasol ol i tok, ‘Mipela i laik yu putim tingting long ol samting yu bai mekim kirap long nau.’ Bihain long dispela, bel bilong mi i stap isi.”​—Maria Amerika.

“Kongrigesen i amamas tru taim mi kam bek. Mi pilim olsem ol i tingim mi. Ol wanbilip bratasista i helpim mi long luksave olsem God i fogivim mi na mi mas putim tingting long samting mi bai mekim long nau na i go. Oltaim ol elda i stap bilong helpim mi long pas gut gen wantaim God. Ol i mekim gut bel bilong mi na helpim mi long tingim olsem Jehova i tingim na laikim mi yet.”​—Malcom, Siera Leon.

“Mi amamas olsem Jehova i laikim lain bilong em, olsem na em i mekim samting long oganaisesen bilong em i mas stap klin. Maski ol man i no save long dispela inap ting olsem em hatpela pasin, tasol tru tru dispela i soim pasin laikim. Mi amamas olsem Papa bilong mipela long heven i gat pasin laikim na em God bilong fogivim ol man.”​—Sandi, Amerika.