Bai Mi Tok Wanem?

Taim yumi autim tok na bungim ol man i amamas long harim tok, yumi laik go bek na autim tok moa long ol. Tasol ating yumi no save bai yumi tok wanem bilong kirapim gen toktok. Ating yu ken traim bihainim dispela rot: Kamapim wanpela gutpela askim, na bihain opim buk Toktok Gut na kamapim bekim em Baibel i as bilong en. I gutpela long wokim wanpela lista bilong ol askim, na taim yu go bek lukim wanpela man yu ken kamapim wanpela askim i kirapim tingting bilong em. Ol askim i stap hia mipela i kisim long buk Toktok Gut, na namba i makim pes yu inap painim bekim bilong en:

◼ Bilong wanem yumi go lapun na dai? (84)

◼ I gat as tru na yumi ken bilip olsem God i stap? (115)

◼ Yu ting God i tingim tru yumi ol man? (117)

◼ Yu ting man i mas i go long heven bambai em inap i stap amamas tru long bihain? (160)

◼ Bilong wanem i bikpela samting yumi mas save long nem bilong God na kolim? (171)

◼ Kingdom bilong God bai mekim wanem ol wok? (188)

◼ Ol man i stap bilong mekim wanem? (225)

◼ Bilong wanem i gat planti lotu? (230)

◼ Olsem wanem yumi ken save wanem lotu i stret? (236)

◼ Bilong wanem i gat planti pasin nogut? (353)

◼ Bilong wanem God i larim pen na hevi i stap? (364)

◼ Yu ting Satan i gat strong long nau? (393)

Yu ken putim wanpela kain lista olsem dispela insait long Baibel o buk Toktok Gut bambai yu ken painim hariap. Sapos yu tingim stret wanem ol samting yu bai toktok long en taim yu go bek lukim man, dispela bai strongim yu long mekim gut wok bilong i go bek lukim ol man i bin amamas long harim tok.

This is a repeat of article in km 11/97 taken from km-E 11/97 “What Will I Say?”