I Gat Rong Long Pilai Laki?
1 Planti manmeri long Papua Niugini i save pilai laki long Sande, kirap long moningtaim i go inap long apinun. Taim ol Witnes Bilong Jehova i autim tok long ol na tokim ol long Kingdom, ol i no laik harim tok, long wanem, ol i tingting tasol long kas bilong ol. Olsem na ol i no inap kisim save long rot bilong stap bel isi nau long dispela taim nogut. Sapos ol i no harim na bihainim tok bilong God, bai ol i no inap kisim laip oltaim long Paradais.
2 Planti Witnes Bilong Jehova i stap long ol ples we ol man i save pilai laki samting. Ating ol wanblut na ol wantok bilong ol i save pilai laki. Olsem na dispela samting inap traim ol brata sista bilong yumi na ol pikinini bilong ol, em ol i stap long kain ples olsem. Olsem wanem? I gat rong sapos ol i pilai laki wantaim ol wanblut o wantok bilong ol long sampela taim? Ol inap pilai laki wantaim ol bambai ol inap kisim liklik amamas bilong skin?
3 Long bipo bipo yet na i kam inap long nau ol man i bin mekim kain kain pilai laki. Pastaim ol lotu i no laik bai man i pilai laki. Ol i tok olsem ol man i pilai laki ol i save dring spak na mekim ol tok doti. Ol gavman tu i no save amamas long ol man i pilai laki, long wanem, dispela samting i mekim na man i no save wok, na em i save giaman na stil. Pasin bilong pilai laki em i no save kamapim wanpela gutpela samting long man, tasol em inap kamapim planti hevi na bai man i no stap amamas. Sapos man i pilai laki long olgeta taim, kongrigesen Kristen i mas rausim em. Sapos em i no lusim dispela pasin, em bai i no inap kisim laip oltaim.
4 Tasol ating wanpela man bai tok: “Mi no save pilai laki long olgeta taim” o “Wan wan taim tasol mi save pilai kas wantaim ol man i stap klostu long mi na mi no save tromoi bikpela mani” o “I no gat wanpela man i lukim mi, olsem na mi no pundaunim narapela man. Na sapos mi winim sampela mani, mi inap lusim sampela taim moa long mekim wok autim tok.”
5 Tasol bikpela samting, em olsem: God i ting wanem long pasin bilong pilai laki? Baibel i tok wanem long pilai laki? Gutpela sapos yumi skelim ol dispela tok i stap daunbilo:
◼ Man i pilai laki, em i mangalim samting bilong narapela man. Em i laik givim liklik mani na winim bikpela mani.—Ef. 5:3.
◼ Man i pilai laki, em i lesman. Sampela man i laik kisim mani wantu tasol na ol i no laik wok.—2 Te. 3:10; Snd. 6:6-11.
◼ Man i pilai laki, em i mekim pasin stil. Em i kisim nating mani bilong narapela man na em i no givim wanpela samting long dispela man.—Ef. 4:28.
◼ Man i pilai laki, em bai poromanim ol man nogut, na dispela inap pulim em long dring spak na mekim pasin pamuk.—1 Ko. 15:33.
◼ Man i pilai laki em i no sori long narapela man. Em i tromoi mani long pilai laki na em i no gat mani bilong baim kaikai na klos bilong famili bilong em.—Jo. 13:34, 35.
6 Wanem samting bai painim man i wok long pilai laki? Man i save pilai laki, em i mekim pasin mangal, olsem na kongrigesen i mas rausim em. Pasin bilong pilai laki, maski em i wanem kain pilai laki, em i no stret. Jehova na oganaisesen bilong em i nolaik tru long dispela kain pasin. Sapos man i pilai laki long sampela taim tasol, ating bihain bai em i pilai laki long olgeta taim, na bai em i no inap kisim laip oltaim. Yumi no ken lusim tingting long tok bilong Rom 14:12: “Olsem na yumi save, yumi olgeta wan wan bai yumi mas tokim God long as bilong olgeta pasin yumi bin mekim.”
This article is unique to PNG.