Kamapim Ol Disaipel Long Rot Bilong Buk Save
1 Olgeta Kristen i gat wok long lainim ol man long tok i tru na helpim ol man em ‘bel bilong ol i gutpela tru bilong kisim laip oltaim’ long kamap disaipel. (Ap. 13:48; Mt. 28:19, 20) Bilong helpim yumi long mekim dispela wok, oganaisesen bilong Jehova i bin givim wanpela gutpela buk long yumi—buk Save i Bringim Man Long Laip Oltaim.
2 Buk Save em i nambawan buk bilong Sosaiti long nau long mekim Baibel-stadi. Dispela buk bai helpim yumi long kamapim klia tok i tru na lainim ol man insait long sotpela taim tasol. Dispela bai helpim yumi long putim tok i tru i go daun long bel bilong man. (Lu. 24:32) Tasol tisa tu i mas mekim gutpela wok bilong skulim man.
3 Helpim Baibel-Stadi Long Kamap Strong: Tingim sumatin olsem em inap kamap wanpela disaipel Kristen na wanpela brata o sista spirit bilong yumi. Mekim gutpela pasin pren, na amamas long kamapim ol tok bilong stadi. Putim gut yau long ol tok em i kamapim na bai yu inap save gut long em, dispela bai helpim yu long save long gutpela rot bilong helpim em long ol samting bilong spirit. Redi long givim yu yet bilong helpim sumatin.—1 Te. 2:8.
4 Taim yu kirapim stadi pinis, gutpela yu bihainim stret ol sapta long buk Save, olsem sapta 1, sapta 2, olsem. Mekim stadi long pasin i no hatwok long em i kisim gut, na long pasin i kirapim tingting bilong em na em i laik putim yau. (Ro. 12:11) Tingim save bilong sumatin na i stap bilong em, na sapos inap, ating klostu olgeta taim yu mekim stadi, bai yu inap pinisim wanpela sapta olgeta insait long wanpela aua, tasol no ken mekim hariap tumas. Sapos olgeta wan wan wik, tisa na sumatin i mekim stadi long taim stret ol i bin makim, dispela bai helpim sumatin long kamap strong kwiktaim.
5 Taim yu kirapim stadi long ol wan wan wik, mekim liklik tok bilong kirapim tingting bilong sumatin long ol tok bilong stadi. Bihainim stret ol tok i stap long buk Save. No ken kamapim planti narapela tok—nogut dispela i tekewe o karamapim ol bikpela tok bilong stadi na pulim ol minit bilong stadi. (Jo. 16:12) Sapos sumatin i kamapim askim bilong samting i no insait long stadi, ating taim stadi i pinis yu ken bekim dispela askim. Long dispela rot bai yu inap stadi long olgeta paragraf, na dispela askim i no pulim yu long toktok long sampela narapela samting.
6 Sapos sumatin i bilip strong long God Triwan, man i gat tewel, bikpaia, o sampela narapela tok giaman, na em i pilim olsem ol tok bilong buk Save i no inap, orait, givim buk Toktok Gut long em o sampela narapela buk i toktok long dispela samting. Tokim em, taim em i tingting pinis long ol tok em i ritim, bai yu toktok wantaim em long dispela samting.
7 Sapos yu kirapim na pinisim stadi long beten na askim Jehova long stiaim tingting bilong yupela na blesim stadi, dispela bai litimapim stadi, na kirapim sumatin long tingim gut stadi, na tingim Jehova em i Tisa tru bilong em.—Jo. 6:45.
8 Mekim Gutpela Wok Tisa: Sapos yu kamapim gut ol skripsa, sumatin bai pilim olsem em i stadi tru long Baibel. (Ap. 17:11) Mekim wok long blok “Save Gut Long Baibel Bilong Yu,” long pes 14 bilong buk Save, na lainim em long pasin bilong painim ol skripsa. Lainim em long luksave long ol skripsa em buk i kamapim ol tok bilong en. Sapos i gat taim, opim Baibel na ritim ol skripsa em buk i kolim sapta na ves tasol. Tokim sumatin long stori olsem wanem ol dispela skripsa i helpim o i kamapim klia ol tok bilong paragraf. Kamapim gut ol bikpela tok bilong ol skripsa na bai em inap save long as bilong ol bikpela tok bilong stadi. (Neh. 8:8) Tokim sumatin long olsem wanem i gutpela sapos em i save long nem bilong olgeta buk bilong Baibel, na wanem buk i kam pastaim na wanem buk i kam bihain.
9 Ol sumatin i mas wok long kamap strong long olgeta wan wan stadi. Bilong helpim sumatin olsem, kolim ol askim i stap long blok “Traim Save Bilong Yu”—dispela blok i stap long pinis bilong olgeta wan wan sapta. Putim gut yau long tok sumatin i kamapim; tok i makim olsem em i kisim gut tok em i bin stadi long en, o em i kolim nating tasol? Sampela askim i bilong kirapim sumatin long kamapim bel bilong em. Wanpela askim olsem i stap long pes 31: “Yu laikim tru wanem ol pasin bilong God Jehova?”—2 Ko. 13:5.
10 Skulim Sumatin Long Pasin Bilong Redim Stadi: Sumatin bai kamap strong kwiktaim sapos em i redim stadi pastaim, na katim ol bekim, na tingim olsem wanem em inap kamapim ol dispela tok long toktok bilong em yet. Sapos yu stap gutpela piksa na yu strongim em, bai yu inap skulim em long pasin bilong redim stadi. Stori long rot bilong painim ol tok i bekim stret ol askim i stap daunbilo long pes. Sapos yutupela wantaim i redim wanpela sapta, ating dispela bai helpim em. Kirapim em long bekim tok long toktok bilong em yet.
11 Kirapim sumatin olsem taim em i redim stadi long olgeta wan wan wik, gutpela sapos em i lukim ol skripsa em buk i kolim sapta na ves tasol. Mekim sampela tok amamas long ol gutpela wok sumatin i mekim long stadi. (2 Pi. 1:5; Wastaua, Ogas 15, 1993, p. 13-14, i stori long sampela samting moa tisa na sumatin i ken mekim bilong helpim sumatin long kisim sampela save moa long taim bilong stadi.) Long dispela rot tisa i wok long skulim sumatin long pasin bilong redim ol tok bilong miting na long bekim sampela tok. Sumatin bai lain gut long pasin bilong mekim stadi em yet i mas mekim, na taim stadi bilong em long buk Save i pinis, bai em i wok yet long kamap strong long tok i tru.—1 Ti. 4:15; 1 Pi. 2:2.
This is a partial repeat of article in km 6/96 taken from km-E 6/96 “How to Make Disciples With the Knowledge Book.”