Ol Miting Bilong Wok

HARIM: Wok Kingdom Bilong Yumi bai makim Miting Bilong Wok long olgeta wik long Novemba na Disemba. Ol kongrigesen i ken senisim ol miting bambai ol i ken go long “Ol Tisa Bilong Tok Bilong God” Kibung Distrik. Yupela i mas mekim hap “Sakim Ol Pasin Bilong Ples Em Ol Spirit Nogut i As Bilong En,” maski kibung i mekim na yupela i mas senisim taim bilong mekim dispela hap. Sapos i stret, yupela i ken mekim wok long 15 minit bilong laspela Miting Bilong Wok bai kamap paslain long kibung na stori long sampela bikpela tok bilong pepa yumi kisim wantaim Wok Kingdom bilong nau. Long Janueri 2002, ol bai makim wanpela Miting Bilong Wok olgeta bilong skelim ol bikpela tok bilong kibung. Bilong redi long mekim dispela hap, yumi olgeta i ken raitim long notbuk ol bikpela tok bilong kibung, ol samting yumi yet i laik bihainim long laip bilong yumi na long wok autim tok. Yumi ken redi long stori long olsem wanem yumi bin bihainim ol dispela tok bihain long kibung. Taim yumi harim olsem wanem ol gutpela tok yumi kisim long kibung i bin helpim yumi, dispela bai strongim yumi.

Wik i Kirap Long Novemba 12

Singsing 170

5 min: Ol toksave bilong kongrigesen. Sampela Toksave bilong Wok Kingdom.

14 min: “Wetim Jehova i Strongim Yu.”a Kamapim sampela sotpela tok long Wastaua, Oktoba 1, 1999, p. 18-19, par. 6-8.

26 min: “Sakim Ol Pasin Bilong Ples Em Ol Spirit Nogut i As Bilong En.” Wanpela brata i save mekim gut ol tok i kamapim ol askim na bekim. No ken kalapim ol minit bilong tok. Wanpela i mas ritim olgeta paragraf na brata i mas kamapim klia olsem wanem ol man i ken bihainim tok bilong ol skripsa.

Singsing 191 na beten.

Wik i Kirap Long Novemba 19

Singsing 172

8 min: Ol toksave bilong kongrigesen. Ripot bilong ol akaun.

15 min: Sampela tok bilong helpim kongrigesen.

22 min: “Skulim Gut Tingting Bilong Yu.”b Wanpela elda i mekim gut riviu long program bilong bikpela de kibung bilong sevis yia i go pinis.

Singsing 195 na beten.

Wik i Kirap Long Novemba 26

Singsing 177

15 min: Ol toksave bilong kongrigesen. Kirapim ol pablisa long putim ripot bilong wok autim tok bilong Novemba. Bihainim tok i stap long hap “Ol Tok Yu Ken Mekim Bilong Tilim Ol Nius,” na mekim tupela soim ol i bin redim gut long pasin bilong tilim ol nius​—⁠wanpela long Wastaua, na narapela long Kirap!, Oktoba-Disemba. Sapos yupela i mas mekim, yupela i ken bihainim tok bilong tilim ol nius i stap long Wok Kingdom bilong Oktoba. Mekim wanpela soim long pasin bilong tilim buk Nambawan Man Tru o buk Stap Oltaim long Disemba.

15 min: “Olsem Wanem Mi Inap Painim Taim?” Wanpela tok na kamapim sampela askim. Kamapim sampela bikpela tok bilong Wastaua, Oktoba 1, 2000, p. 20-21, par. 9-10, aninit long het-tok “Ol i Painim Taim Bilong Mekim Stadi.” Kirapim ol brata long stori long ol samting ol i bin lusim bilong painim sampela hap taim bilong mekim ol bikpela samting. Kamapim klia olsem yumi mas makim taim bilong mekim stadi bilong yumi yet na famili-stadi, go long ol miting bilong kongrigesen, autim tok, na ritim Baibel long olgeta de.

15 min: Ol Yangpela i Litimapim Nem Bilong Jehova. Ol askim na bekim. Klostu olgeta kongrigesen i gat planti yangpela i save mekim wok autim tok. I stret ol i mekim olsem, maski ol i mas autim tok long ol man i bikpela pinis. (Sng. 148:​12, 13; Mt. 21:​15, 16) Taim papamama na ol narapela pablisa i tingim ol yangpela, na skulim na strongim bel bilong ol, ol yangpela bai kisim bikpela amamas long wok autim tok. Askim ol brata sista long kolim sampela rot bilong helpim ol yangpela long insait long wok bilong autim tok long ol haus na mekim ol gobek. Askim ol papamama long stori long ol i bin mekim wanem bilong helpim ol pikinini long lain long tilim ol nius, mekim wok long Baibel taim ol i autim tok, na toktok wantaim ol man bilong haus na ol i no pret. Kamapim klia olsem pasin bilong mekim gutpela tok amamas long ol pikinini bai helpim tru ol. Toktok wantaim wanpela o tupela yangpela pablisa, na larim ol i stori long ol samting bilong autim tok ol i save laikim na bilong wanem ol i laikim.

Singsing 198 na beten.

Wik i Kirap Long Disemba 3

Singsing 179

8 min: Ol toksave bilong kongrigesen.

17 min: Sampela tok bilong buk Toktok Gut. Ol askim na bekim. Skelim ol tok i soim olsem wanem dispela buk i helpim yumi long stori gut long ol tok bilong Baibel. Olsem: “Kingdom” (p. 187) o “spirit” (p. 409-410); em i skelim tok bilong narapela narapela Baibel, kamapim ol ves bilong Baibel i gat nem bilong God long en na olsem wanem ol i kamapim dispela nem (p. 167-168) o tok i tru bilong hel (p. 152-153); em i stori long ol bilip i mekim na yumi narapela kain long ol narapela lotu (p. 328-330) o soim olsem wanem man inap save wanem lotu i trupela lotu (p. 236-238); em i stori long as bilong Krismas (p. 284-287) o ol Kristen bilong pastaim i no insait long ol samting bilong graun (p. 295-297); em i stori long ol tok bilong saiens i strongim tok olsem God i bin wokim olgeta samting (p. 122-124) o soim ol samting nogut mariwana na smok i save kamapim (p. 91-95). Strongim ol pablisa long yusim dispela gutpela buk long wok autim tok taim rot i op long mekim olsem.

20 min: “Pilim Tru Pasin Sori Bilong Jehova na Kisim Ol Blesing​—⁠Hap 1.”c Taim yu stori long par. 3-6, kirapim ol brata long stori long ol gutpela ekspiriens ol i bin kisim taim ol i autim tok long ol haus, long rot, na mekim ol gobek na Baibel-stadi.

Singsing 200 na beten.

[Ol Futnot]