“Olsem Wanem Bai Ol i Harim?”
1 Jisas i tokaut strong olsem: “Olgeta lain man i mas harim man i autim gutnius pastaim.” (Mk. 13:10) Maski yumi wok strong, i gat planti handet milion manmeri em yumi no bin autim tok yet long ol. Sampela gavman i putim tambu long wok bilong yumi. Planti kantri i gat bikpela lain manmeri i stap long en na i wok long go bikpela hariap. Long Papua Niugini i gat planti manmeri i sindaun long ol longwe hap na ol i no bin harim tok bilong Kingdom. Olsem na “olsem wanem bai ol i harim?”—Ro. 10:14.
2 Bilip Long Jehova: Yumi mas tingim olsem Jehova i save long bel bilong olgeta man. Maski sindaun bilong man i wanem kain, sapos em i wok strong long painim tok i tru bilong God, em bai painim.—1 Sto. 28:9.
3 Abraham i tingting planti long ol manmeri bilong Sodom na Gomora. Tasol God i tokim em olsem em bai no bagarapim Sodom sapos em inap painim 10-pela man i bihainim stretpela pasin. (Stt. 18:20, 23, 25, 32) I no gat wanpela taim Jehova i bin bagarapim ol stretpela man wantaim ol man nogut, dispela pasin bilong Jehova i kamap klia taim Lot na ol pikinini meri bilong em ol i abrusim bagarap.—2 Pi. 2:6-9.
4 Wanpela taim Elaija i ting em wanpela tasol i mekim wok bilong trupela God. Tasol Jehova i tokim em olsem em i no stap wanpis na wok em i bin kirap long mekim em bai pinis. (1 Kin. 19:14-18) Olsem wanem long wok bilong yumi long nau?
5 Givim Bel Long Wok Bilong God: I gat bikpela wok bilong autim tok i stap yet o nogat, em yumi no save. Dispela em i wok bilong Jehova na em i mekim wok long ol ensel bilong em bilong bosim dispela wok. (KTH 14:6, 7) Em bai makim wok bilong autim tok long olgeta lain man bai go inap long wanem mak. Sapos Jehova i laik, em inap stretim rot na bai wok bilong autim tok bilong Kingdom bai kamap long kain kain rot em yumi no inap save long en, na planti manmeri moa inap “harim na bilip” long gutnius. (Ap. 15:7) Ol samting Jehova bai mekim i stret wantaim pasin tru bilong em—em i God bilong sori, em i gat gutpela tingting na save, na stretpela pasin.
6 Em wok bilong yumi long mekim ol samting i stret wantaim laik bilong Jehova, yumi mas wok strong long autim gutnius na bai olgeta man i ken harim.—1 Ko. 9:16.