Autim Gutnius Long Olgeta Lain Manmeri
“Yupela bai i autim tok bilong mi . . . i go inap long olgeta hap bilong graun.”—APOSEL 1:8.
1. Long wanem hap na long wanem taim ol disaipel i bin harim tok profet bilong Matyu 24:14 long namba wan taim?
PLANTI bilong yumi i save gut tru long tok Jisas i mekim long Matyu 24:14. Na dispela tok profet em i narapela kain tru! Tingim tingting ol disaipel i mas kisim taim ol i harim dispela tok long namba wan taim! Em yia 33 C.E. na ol disaipel i bin stap wantaim Jisas inap 3-pela yia, na nau ol i kam wantaim em long Jerusalem. Ol i bin lukim ol mirakel bilong em na harim ol tok em i skulim ol man long en. Ol i amamas long ol gutpela tok i tru Jisas i bin lainim ol, tasol ol i save olsem i no olgeta man i amamas long en. Sampela man i gat biknem na namba ol i birua long Jisas.
2. Wanem ol hevi na hatwok bai painim ol disaipel?
2 Fopela disaipel i sindaun long maunten Oliv wantaim Jisas, na ol i putim gut yau taim em i stori long ol hevi na ol hatwok bai painim ol. Paslain long dispela, Jisas i bin tokim ol olsem ol man bai kilim em i dai. (Matyu 16:21) Nau em i tokaut klia long ol olsem ol man bai mekim nogut tru long ol tu. Em i tok: “Long dispela taim bai ol i kisim yupela bilong givim pen na hevi long yupela, na bai ol i kilim yupela i dai. Na olgeta lain manmeri bai ol i bel nogut tru long yupela, long wanem, nem bilong mi em i stap long yupela.” Na i no dispela samting tasol. Ol profet giaman bai giamanim planti manmeri. Sampela bai lusim bilip na birua long ol wanbilip na putim ol long han bilong ol birua. Na “planti man” bai lusim pasin bilong laikim God na Tok bilong em.—Matyu 24:9-12.
3. Bilong wanem yumi kirap nogut tru long tok bilong Jisas long Matyu 24:14?
3 Orait nau Jisas i kamapim wanpela tok i mekim ol disaipel i kirap nogut tru long en. Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Em nau, wok Jisas i bin kirapim long Israel—bilong “autim tok tru”—bai i go long olgeta hap bilong graun. (Jon 18:37) Em i wanpela tok profet yumi kirap nogut tru long en! Em bai hatwok long autim tok “long olgeta lain manmeri,” na bilong mekim long taim ‘olgeta lain manmeri i bel nogut tru long [ol],’ dispela bai i olsem wanpela mirakel. Dispela bikpela wok bai litimapim tru wok bos na bikpela strong bilong Jehova wantaim pasin laikim, marimari, na pasin bilong em long i no les kwik. Na tu, dispela inap larim ol wokboi bilong em long kamapim olsem ol i bilip tru na givim bel olgeta long em.
4. Husat i kisim wok bilong autim tok? Jisas i mekim wanem tok i mekim isi bel bilong ol?
4 Jisas i kamapim klia long ol disaipel olsem ol i gat wanpela bikpela wok bilong mekim. Taim em i no go yet antap long heven, Jisas i kamap long ol na em i tok: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) I no longtaim na sampela moa bai helpim ol. Tasol namba bilong ol disaipel i no planti. Bel bilong ol i stap isi taim ol i save holi spirit bilong God bai givim strong long ol na bai ol inap mekim dispela wok God i givim ol!
5. Ol disaipel i no save long wanem ol samting bilong wok autim tok?
5 Ol disaipel i save ol i mas autim gutnius na “mekim olgeta lain manmeri i kamap disaipel.” (Matyu 28:19, 20) Tasol ol i no save ol i mas mekim dispela wok inap long wanem mak, na ol i no save pinis bai kamap long wanem taim. Yumi tu i no save. Em ol samting Jehova yet i makim. (Matyu 24:36) Taim wok autim tok i kamap long mak Jehova i laikim, orait long dispela taim em bai bagarapim ol samting nogut bilong dispela graun. Long dispela taim tasol bai ol Kristen i save olsem wok autim tok i kamap pinis long mak Jehova i laikim. Ol disaipel bilong pastaim i no save long bikpela wok autim tok ol Kristen bai mekim long dispela taim bilong pinis long nau.
Autim Tok Long Taim Bilong Ol Aposel
6. Wanem samting i bin kamap long Pentikos 33 C.E. na bihain liklik long en?
6 Long taim bilong ol aposel, wok bilong autim tok bilong Kingdom na kamapim ol disaipel i bin karim planti kaikai tru. Long Pentikos 33 C.E., 120 disaipel i bung long rum antap bilong wanpela haus long Jerusalem. God i kapsaitim holi spirit long ol, na aposel Pita i mekim wanpela tok i kamapim mining bilong dispela mirakel, na 3,000 manmeri i bilip na kisim baptais. Dispela em kirap tasol bilong dispela wok. Maski ol hetman bilong lotu i laik stopim wok bilong autim gutnius, long olgeta de Jehova “i wok long kisim bek sampela manmeri, na long dispela pasin em i mekim namba bilong ol manmeri i bilip long Jisas i kamap planti moa.” I no longtaim na “namba bilong ol manmeri i bilip long en i go inap olsem 5,000.” Bihain, “planti manmeri moa yet i bilip long Bikpela, na ol i kam insait long lain bilong en.”—Aposel 2:1-4, 8, 14, 41, 47; 4:4; 5:14.
7. Bilong wanem i bikpela samting taim Kornilius i bilip na kisim baptais?
7 Narapela bikpela samting i bin kamap long 36 C.E.—Kornilius i bilip na kisim baptais, em i no bilong lain Israel. Jehova i bin stiaim Pita i go long dispela gutpela man, na dispela i makim olsem tok bilong Jisas long “mekim olgeta lain manmeri i kamap disaipel” i no makim ol Juda i stap long ol narapela kantri tasol. (Aposel 10:44, 45) Ol brata i go pas long kongrigesen i ting wanem? Taim ol aposel na ol hetman long Judia i luksave olsem gutnius i mas go long ol man bilong ol arapela kantri—ol man ol i no bilong lain Israel—ol i litimapim nem bilong God. (Aposel 11:1, 18) Long wankain taim sampela Israel moa i wok long kamap disaipel. Sampela yia bihain, long 58 C.E. samting, i gat ol man bilong ol arapela lain i kamap bilipman wantaim “planti tausen Juda.”—Aposel 21:20.
8. Gutnius i save mekim wanem long ol wan wan man?
8 Tru, namba bilong ol man i kamap Kristen long taim bilong ol aposel i bikpela, tasol yumi no ken lusim tingting long ol wan wan man ol i insait long dispela namba. Tok bilong Baibel ol i bin harim i gat strong. (Hibru 4:12) Em i bin senisim tru laip bilong ol man i bihainim tok bilong en. Ol manmeri i bin lusim ol pasin nogut, kamap nupela man, na ol i kamap wanbel wantaim God. (Efesus 4:22, 23) Wankain samting i save kamap long nau. Na olgeta manmeri i kisim gutnius inap kisim laip oltaim oltaim.—Jon 3:16.
Ol Wanwok Bilong God
9. Ol Kristen bilong pastaim i bin luksave olsem ol i gat wanem gutpela wok ol i mas mekim?
9 Ol Kristen bilong pastaim i no tok olsem ol yet i as na dispela bikpela wok i kamap. Nogat. Ol i luksave olsem “strong bilong Holi Spirit” i helpim ol long mekim wok autim tok. (Rom 15:13, 19) Tru, Jehova i as na wok autim tok i go bikpela. Tasol ol dispela Kristen i save ol tu i gat wanpela wok ol i mas mekim—ol i gat wok long i stap olsem ol “wanwok bilong God.” (1 Korin 3:6-9) Olsem na bilong wanbel wantaim tok bilong Jisas, ol i wok strong tru long wok Jisas i givim long ol.—Luk 13:24.
10. Sampela Kristen bilong bipo i bin mekim wanem wok bilong autim tok long olgeta lain manmeri?
10 God i bin salim Pol i go mekim wok ‘namel long ol manmeri bilong ol arapela lain,’ olsem na em i bin raun planti tausen kilomita long solwara na long rot. Em i bin kamapim planti kongrigesen long provins Esia bilong Rom na long kantri Grik. (Rom 11:13) Na tu em i bin raun long Rom na ating long Spen. Long seim taim, aposel Pita i kisim wok bilong “autim gutnius long ol Juda,” na em i go long Babilon, em hap i gat planti Juda i stap long en. (Galesia 2:7-9; 1 Pita 5:13) I gat planti arapela i bin wok strong long wok bilong Bikpela na tupela bilong ol em tupela meri, Trifina na Trifosa. Narapela meri, em Persis, “em i bin mekim planti wok bilong Bikpela.”—Rom 16:12, NW.
11. Olsem wanem Jehova i bin blesim wok bilong ol disaipel?
11 Jehova i bin blesim tru hatwok bilong ol dispela bratasista na ol arapela wanwok em ol i givim bel long mekim wok. Klostu 30 yia bihain long taim Jisas i bin tok profet olsem ol bai autim gutnius long olgeta lain manmeri, Pol i tok mipela i bin “autim [gutnius] long olgeta manmeri i stap long graun.” (Kolosi 1:23) Olsem wanem? Pinis i kamap long dispela taim? Yes, i gat wanpela pinis i bin kamap. Pinis i painim Judia long 70 C.E. taim ami bilong Rom i bagarapim Jerusalem wantaim tempel. Tasol Jehova i tingting pinis olsem paslain long em i bagarapim dispela graun bilong Satan, ol Kristen i mas mekim bikpela wok bilong autim tok, winim wok autim tok i bin kamap long taim bilong ol aposel.
Wok Autim Tok Long Nau
12. Ol Sumatin Bilong Baibel bilong pastaim i gat wanem tingting long tok bilong Jisas long mekim wok autim tok?
12 Inap planti handet yia ol man i bin tromoi bilip i tru, tasol long 1870 samting lotu i tru i kamap strong gen. Ol Sumatin Bilong Baibel, em nem bilong ol Witnes Bilong Jehova long dispela taim, ol i kliagut long tok bilong kamapim ol disaipel long olgeta hap bilong graun. (Matyu 28:19, 20) Long 1914 i gat 5,100 ol i save autim tok, na ol i bin autim tok long 68 kantri. Tasol ol dispela Sumatin Bilong Baibel i no kliagut long mining bilong Matyu 24:14. I kam inap long 1880 samting ol Baibel sosaiti i bin tanim na prinim Baibel long planti tok ples na salim ol dispela Baibel long olgeta hap. Gutnius i stap insait long ol dispela Baibel, olsem na i kam inap 1920 samting ol Sumatin Bilong Baibel i ting dispela wok bilong autim tok long olgeta lain man i kamap pinis.
13, 14. Wastaua bilong Disemba 1, 1928 i kamapim wanem tok i kliaim gut tingting bilong ol man long samting God i tingting pinis long mekim?
13 Isi isi, Jehova i kliaim tingting bilong ol manmeri bilong em long ol samting em i tingting pinis long mekim. (Sindaun 4:18) Wastaua bilong Disemba 1, 1928, i tok: “Yu ting i stret yumi ken tok wok bilong autim gutnius bilong kingdom i kamap pinis, long wanem, ol man i bin tilim ol Baibel i go long olgeta hap? Nogat tru! Maski ol i bin tilim Baibel i go long olgeta hap, liklik lain witnes bilong God i gat wok yet long prinim ol buk samting bilong kamapim klia long ol man samting God i tingting pinis long mekim na bilong go long ol haus bilong ol man we ol dispela Baibel i stap long en. Sapos yumi no mekim, orait ol manmeri i no inap save olsem gavman bilong Mesaia i kamap pinis long taim bilong yumi.”
14 Dispela Wastaua i tok moa olsem: “Long 1920, . . . ol Sumatin Bilong Baibel i kisim stretpela tingting long tok profet bilong Bikpela i stap long Matyu 24:14. Long dispela taim ol i kisim save olsem ‘dispela gutnius’ ol i mas autim long olgeta hap, i no gutnius bilong wanpela kingdom ol i wetim i kamap, nogat, em i gutnius olsem King Mesaia i kirap pinis long bosim dispela graun.”
15. Kirap long 1920 samting i kam inap long nau, wok bilong autim tok i bin go bikpela olsem wanem?
15 Dispela “liklik lain witnes” long 1920 samting i no stap olsem tasol. Insait long ol yia i kamap bihain, ol i luksave long lain “planti manmeri tru” bilong ol “arapela sipsip” na ol i kirap bungim ol. (KTH 7:9; Jon 10:16) Long nau i gat 6,613,829 manmeri i wok long autim gutnius long 235 kantri. Em i wanpela bikpela truim bilong tok profet! I no gat narapela taim bipo we ol man i bin mekim bikpela wok olsem bilong autim “dispela gutnius bilong kingdom.” Namba bilong ol wokboi bilong Jehova, em ol i stap gut long em, i bikpela tru, winim olgeta taim bipo.
16. Wanem gutpela wok i bin kamap long sevis yia i go pinis? (Lukim sat long pes 27-30.)
16 Dispela bikpela lain Witnes i bin bisi tru long sevis yia bilong 2005. Ol i bin lusim wan bilion aua samting long autim gutnius long 235 kantri. Ol i bin mekim planti milion gobek, na lukautim planti milion Baibel stadi. Ol Witnes Bilong Jehova i bin mekim dispela wok, ol i bin givim nating taim na mani bilong ol bilong autim Tok Bilong God long ol arapela. (Matyu 10:8) Long rot bilong holi spirit bilong em, Jehova i wok yet long strongim ol wokboi bilong em long mekim laik bilong em.—Sekaraia 4:6.
Ol i Wok Strong Long Autim Tok
17. Ol manmeri bilong Jehova i wok long mekim wanem long tok Jisas i bin mekim long autim gutnius?
17 Maski klostu 2,000 yia i lus bihain long taim Jisas i tok ol bai autim dispela gutnius, ol manmeri bilong God i wok yet long givim bel long mekim dispela wok, ol i no les. Taim yumi stap strong long mekim ol gutpela wok, yumi bihainim ol pasin bilong Jehova olsem pasin laikim, pasin marimari, na pasin bilong i no les kwik. Yumi gat wankain tingting olsem em, yumi no laik bai wanpela man i kisim bagarap, nogat, yumi laik bai ol man i tanim bel na kamap wanbel wantaim Jehova. (2 Korin 5:18-20; 2 Pita 3:9) Holi spirit i save kirapim ol Witnes Bilong Jehova na ol i wok yet long givim bel long autim gutnius long olgeta hap bilong graun. (Rom 12:11) Olsem na ol manmeri bilong olgeta hap ol i wok long kisim tok i tru na ol i wok long bihainim ol gutpela tok bilong Jehova. Yumi laik stori long sampela man olsem.
18, 19. Kamapim sampela gutpela ekspiriens bilong ol man i bin harim na bihainim gutnius.
18 Charles em i wanpela fama long westen Kenya. Long 1998 em i bin salim 8,000 kilogram brus na em i kisim wanpela setifiket i tok olsem em i Nambawan Fama Bilong Groim Brus. Long dispela taim, em i kirap stadi long Baibel. I no longtaim na em i luksave olsem man i groim brus i brukim lo bilong Jisas olsem man i mas laikim ol wantok. (Matyu 22:39) Charles i kisim tingting olsem ‘nambawan fama bilong groim brus’ em i ‘nambawan man bilong kilim i dai ol narapela man,’ olsem na em i kapsaitim marasin nogut bilong kilim i dai ol brus bilong em. Bihain em i winim mak bilong dediket na baptais na long nau em i mekim wok painia oltaim na kongrigesen sevan.
19 Tru tumas, Jehova i wok long seksekim olgeta lain man long rot bilong autim tok long olgeta hap, na ol gutpela gutpela samting—em ol manmeri—i kam insait long haus bilong em. (Hagai 2:7, NW) Pedro i stap long Potugal, na taim em i gat 13 krismas em i go long wanpela semineri. Em i laik kamap wanpela misineri na lainim ol man long tok bilong Baibel. Tasol bihain liklik em i lusim semineri, long wanem, long ol klas bilong em ol i no save stori tumas long Baibel. Sikspela yia bihain em i skul long wanpela yunivesiti long Lisbon. Em i stap wantaim anti bilong em, em wanpela Witnes Bilong Jehova, na anti i strongim em long stadi long Baibel. Long dispela taim Pedro i no save, tru God i stap o nogat, na em i gat tupela tingting, em i laik stadi long Baibel o nogat. Em i toktok wantaim wanpela tisa bilong em long pasin bilong em long i gat tupela tingting. Tisa i tok wanpela bikpela samting skul i lainim ol man long en i olsem, ol man i gat tupela tingting na ol i no inap makim samting ol i laik mekim, ol kain man olsem i save mekim ol samting bilong bagarapim laip na sindaun bilong ol yet. Pedro i harim dispela tok na em i kirap stadi long Baibel. I no longtaim i go pinis em i kisim baptais na em i wok long stadi long Baibel wantaim sampela narapela man.
20. Bilong wanem yumi amamas olsem yumi mekim bikpela wok tru long autim tok long olgeta lain man?
20 I kam inap long nau yumi no save yumi mas mekim wok autim tok long olgeta hap i go inap long wanem mak, na tu, yumi no save long wanem taim stret pinis bai kamap. Tasol yumi save klostu nau em bai kamap. Yumi amamas olsem wok bilong autim gutnius long olgeta hap em i wanpela hap bilong ol samting i makim olsem klostu nau Kingdom Bilong God bai senisim ol gavman bilong ol man. (Daniel 2:44) Long olgeta yia, planti milion manmeri ol inap harim na bihainim gutnius sapos ol i laik mekim olsem, na dispela i save givim glori long God Jehova. Gutpela sapos yumi tingting strong long stap gut long God na wok wantaim ol brata bilong yumi long olgeta hap long mekim wok autim tok long olgeta lain man. Taim yumi mekim olsem bai God i kisim bek yumi yet na ol manmeri i save harim tok bilong yumi.—1 Timoti 4:16.
Yu Tingim Yet?
• Bilong wanem tok profet bilong Matyu 24:14 em i narapela kain tru?
• Ol Kristen bilong bipo i bin mekim wanem ol samting bilong autim tok? Dispela i bin karim wanem kaikai?
• Olsem wanem ol Sumatin Bilong Baibel i bin kliagut long wok ol i mas mekim bilong autim tok long ol man bilong olgeta hap?
• Yu laikim wanem samting taim yu skelim ol wok ol manmeri bilong Jehova i bin mekim long sevis yia i go pinis?
[Sat long pes 27-30]
RIPOT BILONG WOK BILONG OL WITNES BILONG JEHOVA LONG 2005
(Lukim buk o magasin)
[Mep/Ol Piksa long pes 25]
Pol i raun planti tausen kilomita long rot na long sip bilong autim gutnius
[Piksa long pes 24]
Jehova i stiaim Pita long autim tok long Kornilius na famili bilong em