Ol Witnes Kristen i Tokaut Olsem God i King Tru
“Yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em.”—1 PITA 2:9.
PASLAIN long taim bilong ol Kristen, i gat planti witnes ol i tokaut olsem Jehova tasol em i God tru. (Hibru 11:4–12:1) Ol i gat strongpela bilip, na ol i no pret—ol i bihainim ol lo bilong Jehova na ol i no mekim sampela pasin bilong lotu Jehova i no laikim. Ol i mekim bikpela wok witnes na tokaut strong olsem Jehova i stap King tru bilong heven na graun.—Song 18:21-23; 47:1, 2.
2 Laspela na nambawan bikpela witnes paslain long taim bilong ol Kristen, em Jon Bilong Baptais. (Matyu 11:11) Em i kisim wok bilong tokaut olsem Man God i Bin Makim em i laik i kam, na em i toksave long ol man olsem Jisas em i Mesaia. (Jon 1:29-34) Jisas em i nambawan bikpela Witnes bilong Jehova, em i “save autim stret olgeta tok bilong God.” (KTH 3:14) Ol Israel bilong skin ol i sakim Jisas, olsem na Jehova i rausim ol na em i makim nupela lain, em lain Israel bilong God, long i stap witnes bilong em. (Aisaia 42:8-12; Jon 1:11, 12; Galesia 6:16) Pita i kolim wanpela tok profet bilong Baibel i toktok long lain Israel, na em i kamapim klia olsem dispela tok i makim “lain Israel tru bilong God,” em lain Kristen. Em i tok: “Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet.”—1 Pita 2:9; Kisim Bek 19:5, 6; Aisaia 43:21; 60:2.
3 Tok bilong Pita i makim olsem nambawan wok bilong lain Israel bilong God em bilong mekim wok witnes na tokaut long ol man long biknem bilong Jehova. Long taim bilong yumi i gat wanpela bikpela lain witnes olsem “planti manmeri tru” i bung wantaim dispela lain Israel bilong spirit, na ol tu i tokaut long ol man long biknem bilong God. Ol i singaut strong olsem: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.” (KTH 7:9, 10; Aisaia 60:8-10) Olsem wanem lain Israel bilong God wantaim ol poroman bilong ol inap mekim dispela bikpela wok witnes? Ol i gat strongpela bilip na ol i save bihainim tok bilong God.
Ol Witnes Giaman
4 Bilong holim bilip na bihainim tok bilong God, man i mas bihainim ol lo bilong God long olgeta wokabaut bilong em. Jisas i kamapim klia olsem dispela em i bikpela samting taim em i stori long ol hetman bilong lotu Juda i stap long taim bilong em. Ol i save skulim ol man long Lo “olsem Moses i bin mekim.” Na ol i salim ol misineri i go bilong kirapim ol man i no bilip na bai ol i ken tanim bel na kam insait long lotu Juda. Tasol Jisas i tokim ol olsem: “Yupela i save raun long olgeta hap bilong solwara na bilong graun, bilong mekim wanpela man tasol i kamap disaipel bilong yupela. Na taim em i kamap disaipel pinis, yupela i save mekim em i kamap man bilong i go long hel [Gehena], olsem yupela yet.” (Matyu 23:1-12, 15) Wanpela taim Jisas i tokim sampela Juda: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela.” Bilong wanem em i tok olsem long ol man bilong dispela lain God i bin makim bilong em yet? Long wanem, ol i no laik harim tok bilong nambawan bikpela Witnes bilong Jehova.—Jon 8:41, 44, 47.
5 Na bihain long taim bilong Jisas na i kam inap nau, planti milion manmeri i gat nem Kristen ol i tok ol i disaipel bilong em. Tasol ol i no bin mekim laik bilong God, olsem na Jisas i no orait long ol. (Matyu 7:21-23; 1 Korin 13:1-3) Ol misin i bin salim ol misineri i go, na ating planti ol i gat gutpela bel. Tasol ol i skulim ol man long lotuim wanpela god Triwan em i save kukim ol sinman long bikpaia, na planti man i tanim bel na kam insait long lotu bilong ol, ol i no mekim ol pasin i makim olsem ol i Kristen. Tingim Ruanda long hap bilong Afrika—ol misineri bilong misin Katolik i bin wok longtaim tru long dispela hap. Tasol ol Katolik bilong Ruanda i bin insait tru long bikpela pait i bin kamap nau long Ruanda. Ol kaikai ol dispela misineri i kamapim i makim stret olsem ol lotu bilong graun i gat nem Kristen ol i no bin givim tok witnes tru bilong Kristen long ol dispela man.—Matyu 7:15-20.
Bihainim Ol Lo Bilong God
6 Ol man i tok ol i Kristen, taim ol i mekim ol pasin nogut, dispela i mekim na ol man i tok nogut long “Rot bilong pasin [olsem tok] i tru.” (2 Pita 2:2) Kristen tru i save bihainim ol lo bilong God. Em i no save stil, o giaman, o mekim pasin giaman, o pamuk. (Rom 2:22) Na em i no save kilim i dai ol man i stap klostu long em, nogat tru. Ol man marit Kristen ol i save mekim pasin sori long bosim famili bilong ol. Meri bilong ol i save daun long ol olsem bos bilong famili. Papamama i save skulim ol pikinini bambai ol i ken i stap gutpela Kristen taim ol i bikpela pinis. (Efesus 5:21–6:4) Tru, yumi olgeta i no gutpela tumas na yumi save popaia. Tasol Kristen tru i save daun long ol lo bilong Baibel na wok strong long bihainim. Ol narapela i save lukim gutpela pasin bilong em na dispela i litimapim tok i tru. Sampela taim, ol man pastaim ol i bin birua long tok i tru, ol i lukim stretpela pasin bilong wanpela Kristen na ol i kam insait long tok i tru.—1 Pita 2:12, 15; 3:1.
7 Jisas i kamapim klia wanpela bikpela pasin Kristen taim em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol man bilong dispela graun bilong Satan ol i save mekim ‘ol pasin i no stret, mangal nogut, pasin birua, bel nogut long ol man i gat planti samting, kilim ol man i dai, kros nabaut, giaman, mekim nogut long ol arapela man, tok baksait, mekim ol giaman tok bilong bagarapim nem bilong man, birua long God, bikmaus nabaut, hambak, litimapim nem bilong ol yet, kamapim ol nupela kain pasin nogut, sakim tok bilong papamama.’ (Rom 1:29, 30) Namel long ol kain man olsem, sapos i gat wanpela lain i stap long olgeta hap na ol i save laikim tru narapela narapela insait long lain bilong ol, dispela bai kamapim klia tru olsem spirit bilong God i stap long ol—em gutpela witnes ol i givim long ol man. Ol Witnes Bilong Jehova ol i kain lain olsem.—1 Pita 2:17.
Ol Witnes i Save Stadi Long Baibel
8 Bilong mekim gut wok bilong autim tok, olsem wok witnes, Kristen i mas save long ol stretpela lo bilong Jehova na laikim tru, na em i mas nolaik tru long ol pasin nogut bilong dispela graun. (Song 97:10) Ol man bilong dispela graun i save gut long grisim yumi long bihainim tingting bilong ol yet, na i hatwok long sakim tingting bilong dispela graun. (Efesus 2:1-3; 1 Jon 2:15, 16) Orait wanem samting inap helpim yumi long holimpas stretpela tingting? Yumi mas stadi gut oltaim long Baibel. Man bilong raitim Song 119, planti taim em i tok em i laikim tumas Lo bilong Jehova. Em i save kaunim na tingim long olgeta taim, “long san na long nait.” (Song 119:92, 93, 97-105) Olsem na em inap tok: “Mi no laik tru long pasin giaman, na bel bilong mi i nogut long en. [Mi laikim tumas lo bilong yu, NW.]” Na pasin bilong em long laikim tru lo bilong God i kirapim em long tokaut. Em i tok, “7-pela taim long olgeta de mi save tenkyu long yu [olsem litimapim nem bilong yu] long ol stretpela tok yu mekim long kot.”—Song 119:163, 164.
9 Na yumi tu, sapos yumi stadi oltaim long Baibel na tingim tingim ol dispela tok, bel bilong yumi bai pilim tru na em bai kirapim yumi long litimapim nem bilong Jehova, olsem autim tok bilong em, planti taim, olsem “7-pela taim long olgeta de.” (Rom 10:10) Man bilong raitim namba wan Song em i mekim tok i stret wantaim dispela, em i tok, man i tingim gut ol tok bilong Jehova, em i “olsem diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai. Olgeta samting em i mekim i save kamap gutpela.” (Song 1:3) Aposel Pol tu i kamapim klia olsem Tok Bilong God i gat bikpela strong. Em i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.”—2 Timoti 3:16, 17.
10 Lain bilong lotu tru long God i go bikpela hariap nau long taim bilong yumi, na dispela i kamapim klia olsem Jehova i blesim dispela lain. Tru tumas, ol i olsem witnes bilong tokaut olsem Jehova i King tru, na ol i kisim pasin bilong laikim tumas lo bilong Jehova long bel bilong ol. Dispela i kirapim ol long bihainim lo bilong Em na tokaut “long san na long nait” long biknem bilong Jehova, olsem man bilong raitim Song i mekim.—KTH 7:15.
Ol Strongpela Wok Bilong Jehova
11 Long taim bilong ol aposel, spirit holi i givim strong long ol gutpela witnes Kristen na ol i wokim ol mirakel, na dispela i kamapim klia olsem tok ol i autim em i tru. Taim Jon Bilong Baptais i stap kalabus, em i salim ol disaipel i go askim Jisas: “Ating yu dispela man God i bin promis long salim i kam, o mipela i mas wetim narapela?” Jisas i no tok yes o nogat. Em i tok: “Yupela go tokim Jon long olgeta samting yupela i harim na lukim. Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius. Na ol man i lukim mi na bilip bilong ol i no pundaun, ol i ken amamas.” (Matyu 11:3-6) Ol dispela strongpela wok i olsem witnes bilong soim Jon, tru tumas Jisas em i “dispela man God i bin promis long salim i kam.”—Aposel 2:22.
12 Na sampela disaipel bilong Jisas ol i oraitim sik bilong ol man na ol i kirapim bek sampela man i dai pinis. (Aposel 5:15, 16; 20:9-12) Taim ol i wokim ol dispela mirakel, i olsem God yet i stap witnes bilong ol bilong helpim ol. (Hibru 2:4) Na ol dispela wok i kamapim klia tru olsem Jehova i gat olgeta strong. Olsem: Yumi save, Satan, em “hetman i save bosim dispela graun,” em i gat strong bilong mekim ol man i dai. (Jon 14:30; Hibru 2:14) Tasol taim bilipmeri Dorkas i dai na Pita i kirapim em bek, yumi save em i mekim long strong bilong Jehova tasol, long wanem, Em tasol inap givim laip gen long man i dai pinis.—Song 16:10; 36:9; Aposel 2:25-27; 9:36-43.
13 Long nau ol dispela strongpela wok i no save kamap moa. Ol i mekim pinis wok bilong ol. (1 Korin 13:8) Tasol stori bilong ol dispela mirakel i stap long Baibel na planti man i bin lukim. Taim ol Kristen bilong nau i kamapim stori bilong ol dispela mirakel i bin kamap bipo, ol dispela mirakel i mekim wok yet olsem witnes bilong tokaut long bikpela strong bilong Jehova. (1 Korin 15:3-6) Na tu, long taim bilong Aisaia Jehova i tokaut olsem ol tok profet i kamap tru pinis em i wanpela bikpela samting bilong kamapim klia olsem Em i God tru. (Aisaia 46:8-11) Planti tok profet bilong God long Baibel i wok long kamap tru long nau—sampela ol i kamap tru long lain Kristen. (Aisaia 60:8-10; Daniel 12:6-12; Malakai 3:17, 18; Matyu 24:9; KTH 11:1-13) Truim bilong ol tok profet i makim olsem yumi stap long taim bilong las de, na tu, ol i kamapim long ples klia olsem Jehova tasol i God tru.—2 Timoti 3:1.
14 Long nau tu, Jehova i wok yet long mekim ol bikpela samting, em ol gutpela samting tru, bilong helpim lain bilong em. Spirit bilong Jehova i mekim na lain bilong em i wok long kisim planti save moa long tok i tru bilong Baibel, olsem lait i wok long kamap strong moa. (Song 86:10; KTH 4:5, 6) Ol ripot i tokaut olsem lain bilong Jehova i wok long i go bikpela tru long olgeta hap, na dispela i kamapim klia olsem Jehova i hariapim dispela wok long taim em i makim pinis. (Aisaia 60:22) Nau long taim bilong las de, ol man i wok long mekim nogut tru long lain bilong Jehova long ol narapela narapela kantri, tasol spirit holi i helpim na strongim ol na ol i no pret—ol i sanap strong na karim ol dispela hevi. (Song 18:1, 2, 17, 18; 2 Korin 1:8-10) Tru tumas, stori bilong ol Witnes Bilong Jehova long nau i stap olsem witnes bilong kamapim klia moa yet olsem Jehova em i Nambawan Bikpela King.—Sekaraia 4:6.
Ol i Mas Autim Gutnius
15 Jehova i bin makim lain Israel olsem witnes bilong em bilong ol narapela lain. (Aisaia 43:10) Tasol Jehova i tokim wan wan Israel tasol long i go na autim tok long ol narapela lain, na em i givim dispela wok long ol bilong tokaut long kot bilong Jehova bai painim ol. (Jeremaia 1:5; Jona 1:1, 2) Tasol ol tok profet long Ol Skripsa Hibru i makim olsem wanpela taim bai kamap bihain na Jehova bai salim gutnius i go long ol narapela lain bilong graun, na em i bin mekim dispela wok long rot bilong lain Israel bilong God. (Aisaia 2:2-4; 62:2) Taim Jisas i laik go bek long heven, em i tokim lain bilong em: “Yupela i mas i go mekim olgeta lain manmeri i kamap disaipel bilong mi.” (Matyu 28:19) Jisas i bin autim tok long “ol lain bilong Israel tasol, bilong helpim ol dispela sipsip i lus.” Tasol Jisas i salim ol disaipel bilong em i go long “olgeta lain manmeri,” i go “inap long olgeta hap bilong graun.” (Matyu 15:24; Aposel 1:8) Olgeta manmeri bilong graun i mas harim dispela gutnius ol Kristen i autim olsem witnes long olgeta lain.
16 Pol i makim klia olsem em i save gut long dispela samting. I kam inap long yia 61 em inap tok, “long olgeta hap bilong graun ol i wok long autim dispela gutnius, na planti manmeri i bilip na bihainim.” Gutnius i no bilong wanpela kantri o lain tasol, olsem wanpela lain ol i bin “lotu long ol ensel,” nogat. Ol i autim gutnius “long olgeta manmeri i stap long graun.” (Kolosi 1:6, 23; 2:13, 14, 16-18) Olsem na lain Israel bilong God long taim bilong ol aposel ol inapim tru wok bilong “tokaut long olgeta gutpela pasin” bilong dispela Man “em i bin singautim [ol] long lusim tudak . . . na em i bringim [ol] i kam insait long lait bilong em.”
17 Tasol dispela wok bilong autim tok ol i bin mekim long taim bilong ol aposel, em i olsem piksa tasol bilong bikpela wok bilong autim tok bai kamap long taim bilong las de. Jisas i tingim taim bilong yumi na em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14; Mak 13:10) Olsem wanem? Dispela tok profet i kamap tru pinis? Yumi ken tok, em i kamap pinis. Long yia 1919, liklik lain tasol i autim gutnius, tasol dispela wok i go bikpela bikpela, na long nau ol i autim gutnius long planti kantri, winim 230. Long hap bilong Not tru i kol moa yet, na long ol ples hat tu, ol man i harim gutnius. Ol i autim long ol manmeri bilong ol bikpela kantri, na ol i go tu long ol ailan i stap ausait tru long solwara, bambai ol lain bilong ol dispela ailan inap harim gutnius. Long ol kantri i gat ol bikpela pait, olsem dispela bikpela pait long Bosnia na Hetsagovina, ol i wok yet long autim gutnius. Olsem long taim bilong ol aposel, long nau tu, “long olgeta hap bilong graun ol i wok long autim dispela gutnius, na planti manmeri i bilip na bihainim.” Ol i autim gutnius “long olgeta manmeri i stap long graun.” Orait wanem samting i kamap long dispela wok? Namba wan samting, em ol i bungim pinis hap lain bilong Israel bilong God ol i stap yet long graun, em ol i “bilong olgeta lain man, na bilong olgeta tok ples, na bilong olgeta kain skin, na bilong olgeta kantri.” Namba 2 samting, ol i kirap bungim bikpela lain, em ol i “bilong olgeta lain man na bilong olgeta kantri na bilong olgeta kain skin na bilong olgeta tok ples.” (KTH 5:9; 7:9) Truim bilong Matyu 24:14 i wok long kamap moa yet long olgeta hap.
18 Dispela wok bilong autim gutnius long olgeta hap em wanpela mak i kamapim long ples klia olsem Jisas i kirap pinis long mekim wok king. (Matyu 24:3) Na dispela wok em i nambawan bikpela rot bilong kisim “olgeta kaikai bilong gaden i mau pinis,” long wanem, em i soim ol man olsem Kingdom bilong Jehova tasol inap stretim tru ol hevi bilong graun. (KTH 14:15, 16) Ol Kristen tru, ol tasol i mekim wok bilong autim gutnius, olsem na dispela wok em i wanpela rot bilong kamapim klia husat ol i Kristen tru na husat ol i Kristen giaman. (Malakai 3:18) Dispela i kamapim gutpela wok olsem: Ol man i autim tok, na ol man i harim na bilip long en, ol bai kisim laip. (1 Timoti 4:16) Na bikpela samting tru, em olsem: Wok bilong autim gutnius i save litimapim nem bilong Jehova, em yet i bin tok long ol i mas mekim, na em i sambai long ol man i mekim dispela wok, na em yet i mekim na dispela wok i karim planti kaikai.—2 Korin 4:7.
19 Pol i pilim tru dispela samting, olsem na em i tok: “Sapos mi no autim gutnius, bai mi stap nogut tru.” (1 Korin 9:16) Ol Kristen long nau ol i gat wankain tingting. Ol i ting em i gutpela samting tru na i bikpela wok tru long i stap “wanwok bilong God” na givim lait bilong tok i tru long ol man i stap long tudak bilong dispela graun. (1 Korin 3:9; Aisaia 60:2, 3) Dispela wok em i liklik tru long 1919, nau em i go bikpela moa yet. Klostu 5 milion Kristen ol i save lusim wan bilion aua samting long olgeta yia long bringim gutnius long ol man, olsem God i laik kisim bek ol, na long dispela wok witnes ol i kamapim klia olsem God em i King tru. Yumi amamas tru long yumi ken insait long dispela wok bilong mekim holi nem bilong Jehova! Nau yia bilong wok bilong 1996 i kirap, na yumi mas tingting strong olsem yumi no ken slek long mekim dispela wok. Bai yumi putim yau moa yet long tok Pol i bin givim long Timoti, em i tok: “Oltaim yu mas wok strong long autim tok bilong Krais.” (2 Timoti 4:2) Na taim yumi wok long mekim dispela wok, yumi beten strong tru long Jehova bai wok yet long blesim ol wok bilong yumi.
Yu Tingim Yet?
◻ Husat i senis bilong lain Israel long i stap “witnes” bilong Jehova long ol narapela lain?
◻ Olsem wanem pasin bilong Kristen i helpim tok em i autim long ol man?
◻ Bilong wanem ol Witnes Kristen i mas stadi long Baibel na tingim tingim long bel?
◻ Olsem wanem stori bilong ol Witnes Bilong Jehova long nau i makim olsem Jehova i God tru?
◻ Wanem gutpela samting i kamap long wok bilong autim gutnius?
[Askim Bilong Stadi]
1. Paslain long taim bilong ol Kristen ol i mekim bikpela wok witnes na tokaut long wanem samting bilong Jehova?
2. (a) Husat i nambawan bikpela Witnes bilong Jehova? (b) Husat i senis bilong lain Israel long i stap witnes bilong Jehova? Yumi save olsem wanem?
3. Wanem nambawan wok bilong Israel bilong God na bikpela lain?
4. Olsem wanem na ol Juda long taim bilong Jisas ol i witnes giaman?
5. Olsem wanem yumi save, ol lotu i gat nem Kristen ol i givim tok witnes giaman long ol man taim ol i skulim ol long God?
6. Olsem wanem stretpela pasin em i bikpela samting long wok bilong autim tok olsem witnes?
7. Olsem wanem em i bikpela samting long ol Kristen i mas laikim tru narapela narapela?
8, 9. (a) Taim man bilong raitim Song i stadi long Lo bilong God na em i tingim tingim long bel, dispela i strongim em olsem wanem? (b) Sapos yumi stadi long Baibel na tingim tingim ol tok bilong en, olsem wanem dispela bai strongim yumi long wok yet long autim tok?
10. Wanem samting bilong ol Witnes Bilong Jehova i kamap klia nau long taim bilong las de?
11, 12. Ol mirakel em Jisas na ol disaipel i wokim, dispela i kamapim wanem gutpela wok?
13. (a) Olsem wanem ol dispela mirakel bilong Baibel i mekim wok yet olsem witnes bilong tokaut long bikpela strong bilong Jehova? (b) Olsem wanem truim bilong ol tok profet em i bikpela samting bilong kamapim klia olsem Jehova em i God tru?
14. Olsem wanem stori bilong ol Witnes Bilong Jehova long nau i stap olsem witnes bilong kamapim klia moa olsem Jehova em i Nambawan Bikpela King?
15. Lain Kristen i mas mekim wanem wok bilong autim tok i bikpela moa?
16. Ol Kristen long taim bilong ol aposel i kisim wanem wok na ol inapim tru? Ol inapim olsem wanem?
17. Olsem wanem tok bilong Matyu 24:14 i wok long kamap tru moa yet?
18. Ol i autim gutnius long olgeta hap bilong graun na dispela i mekim wanem ol gutpela wok?
19. Nau yia bilong wok bilong 1996 i kirap, na olgeta Kristen i mas tingting strong long mekim wanem?
[Ol Piksa long pes 15]
Gutnius i no stap long sampela hap tasol—nau ol i wok long autim “long olgeta manmeri i stap long graun”