Wanpela Lain i Stap Amamas Tru
1 “Ol manmeri i putim Bikpela i stap God bilong ol, ol . . . i ken amamas.” (Sng. 144:15) Dispela tok i makim olsem ol Witnes Bilong Jehova ol i wanpela lain i stap amamas tru, winim olgeta narapela lain. Ol i mekim wok bilong God tru i stap laip, em Jehova, na dispela i givim bikpela amamas long ol, winim ol narapela kain amamas. Em i God bilong “amamas,” olsem na ol manmeri i lotu long em, ol tu i save amamas. (1 Ti. 1:11) Wanem sampela wok bilong lotu i save helpim yumi long stap amamas tru?
2 As na Yumi Save Amamas: Jisas i tok, ol manmeri i pilim olsem ol i mas kisim ol samting bilong spirit, ol i ken amamas. (Mt. 5:3, NW ) Pasin bilong stadi oltaim long Baibel na go long olgeta miting Kristen i save inapim dispela laik. Yumi bin kisim save long ol tok i tru bilong Baibel na nau yumi no stap kalabus moa long ol bilip giaman. (Jo. 8:32) Na tu, Baibel i bin lainim yumi long nambawan gutpela rot yumi ken bihainim. (Ais. 48:17) Olsem na yumi gat ol gutpela poroman Kristen bilong bung wantaim ol namel long ol lain brata i stap amamas.—1 Te. 2:19, 20; 1 Pi. 2:17.
3 Bel na tingting bilong yumi i stap isi taim yumi bihainim ol lo bilong God, long wanem, yumi save dispela i save lukautim yumi na i mekim Jehova i bel gut tru. (Snd. 27:11) Wanpela niusman i tok: “Maski ol Witnes Bilong Jehova i gat ol strongpela lo, ol i no pes drai. Nogat. Ol yangpela wantaim ol lapun ol i save luk amamas tru na ol i gat gutpela tingting.” Yumi ken mekim wanem bilong helpim sampela moa long stap amamas tru olsem yumi?
4 Helpim Sampela Moa Long Painim Amamas: Planti man i no amamas, na planti i ting olsem ol hevi bai stap olsem tasol. Tasol yumi amamas, long wanem, yumi save olsem wanpela taim bai kamap na ol man i no ken bel hevi moa. (KTH 21:3, 4) Olsem na yumi save givim bel long wok autim tok na long painim ol man i gat gutpela bel em yumi ken tokim ol long Jehova na long ol gutpela samting yumi wetim i kamap bihain.—Ese. 9:4.
5 Wanpela painia sista i tok: “Taim yumi mekim wok bilong helpim ol man long kisim save long Jehova na long tok i tru bilong em, bel bilong yumi i gutpela tru.” I gutpela sapos yumi mekim olgeta samting yumi inap mekim bilong kirapim planti man moa long stadi long Baibel. Taim yumi mekim wok bilong Jehova na givim yumi yet long helpim ol narapela long mekim wok bilong em, dispela i save kamapim bikpela amamas i winim olgeta narapela kain amamas.—Ap. 20:35.