Pas i Kam Long Gavening Bodi
Long dispela taim yumi stap long en, mipela i amamas long raitim pas long yupela ol “manmeri bilong God” i stap long olgeta hap bilong graun, na tok amamas long bikpela wok yupela i save mekim. (1 Pi. 2:17) Klostu 2,000 yia i go pinis, Jisas i tok: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” (Lu. 18:8) Pasin bilong yupela long givim bel long mekim wok long sevis yia i go pinis i bekim dispela askim bilong Jisas! Ol man i bin tok nogut na tok bilas long sampela bilong yupela, long wanem, yupela i holimpas bilip. Long planti hap, yupela i karim hevi bilong pait, ol bikpela bagarap, ol sik, o hangre. (Lu. 21:10, 11) Tasol yupela i givim bel long mekim stretpela pasin, olsem na Jisas inap painim yet “ol manmeri i stap long graun ol i bilip.” Olsem na ol lain i stap long heven ol i amamas tru!
Yumi save olsem i hatwok tru long sanap strong na karim hevi. Tingim ol hevi ol brata bilong yumi i karim long wanpela kantri long westen Esia. Planti taim ol man i save mekim nogut tru long ol Witnes Bilong Jehova long dispela kantri. I no longtaim i go pinis na polis i bagarapim kibung em 700 manmeri i bung na ol i stap isi long en. Ol man i pasim ol rot, olsem na ol narapela 1,300 manmeri i no inap kam long kibung. Wanpela lain man i karamapim pes bilong ol, sampela em ol polisman, ol i kam long kibung na paitim planti brata sista, na kirapim paia long dispela ples ol i laik mekim kibung long en. Long ol narapela taim, ol man i strong tumas long lotu ol i paitim nogut tru ol brata bilong yumi long ol plang i gat ol nil long en.
Yumi pilim tru dispela kain pasin nogut ol i mekim, tasol yumi no kirap nogut long en. Spirit holi i kirapim aposel Pol long tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Ti. 3:12) Long taim bilong ol aposel, ol man i tok nogut na mekim pasin birua long ol Kristen, na ol i kilim i dai sampela. (Ap. 5:40; 12:2; 16:22-24; 19:9) Wankain samting i bin kamap tu insait long 100 yia i go pinis, na ol man bai mekim yet wankain pasin long taim bilong yumi tu. Tasol Jehova i tok: “I no gat wanpela bilong ol dispela samting bilong pait inap bagarapim yu.” (Ais. 54:17) Em i wanpela gutpela tok tru, a? Tru tumas, Jehova i save tingim tru yumi na long rot bilong profet bilong em, Sekaraia, em i tok: “Man i holim yupela em i holim kiau bilong ai bilong mi.” (Sek. 2:8, NW ) Ol birua bilong ol man i lotu long Jehova, ol i no inap win. Lotu i tru bai win!
Olsem: Long dispela kantri mipela i stori pinis long en, long sevis yia bilong 2001 namba bilong ol pablisa i go bikpela 2-pela taim, winim olgeta taim bipo. Em nau, ol brata bilong yumi i sanap strong, maski ol i kisim ol hevi, olsem ol brata long olgeta narapela hap tu i save mekim. Long sevis yia i go pinis, inap 5,066 manmeri i kisim baptais long olgeta wik bilong makim olsem ol i dediket pinis long Jehova. Ol dispela nupela man wantaim yumi ol narapela, i tingting strong long “sanap strong na bilip tru long olgeta laik bilong God.”—Kl. 4:12, NW.
Tingim tu ol samting i bin kamap long nau long kantri Grik. Maski Misin Grik Otodoks i bin birua tru long ol Witnes Bilong Jehova inap planti yia, nau gavman i orait long ol Witnes olsem wanpela “lotu ol man i save long en.” Pepa i kamapim dispela tok i tok moa olsem, haus Betel long kantri Grik em i “wanpela ples holi bilong ol man i ken lotu long God long en.” Mipela i amamas tu long tokim yupela olsem insait long sevis yia i go pinis, ol kot i pasim tok i helpim yumi long mekim lotu bilong yumi long Balgeria, Japan, Jemani, Kanada, Rasia, Romenia, na Yunaitet Stets. Yumi tenkyu tru long Jehova i opim rot bilong yumi ken mekim yet wok long ol dispela kantri!
Taim yumi tingim pasin bilong Jehova long helpim lain bilong em long dispela taim bilong las de, yumi inap save olsem em i nambawan gutpela Pren yumi inap kisim. Yumi amamas long yumi inap pas gut wantaim em, na yumi save olsem em i laikim yumi, skulim yumi, na stretim yumi. Tru, ol samting bilong traim bilip bai wok yet long painim yumi. Tasol pasin bilong bilip strong long Jehova bai strongim yumi. Jems i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.” (Jems 1:2, 3) Na tu, pasin bilong yumi long sanap strong na karim hevi i kamapim klia pasin bilong yumi long laikim tru Jehova, na dispela i givim bikpela amamas long yumi! Ol brata, yupela i ken bilip tru olsem Jehova bai helpim yumi olgeta wan wan. Sapos yumi stap gut long em, em bai helpim yumi long go insait long nupela taim. Em i laik bai yumi win.
Olsem na mipela i laik kirapim yupela ol brata na sista, ol yangpela na lapun, long tingim gut ol gutpela blesing bai kamap bihain. Gutpela sapos yumi gat wankain tingting olsem aposel Pol, em i tok: “Dispela gutpela sindaun na biknem bai i kamap ples klia long yumi bihain, mi ting em bai i winim tru dispela pen yumi save karim nau long dispela taim.” (Ro. 8:18) Bilip na wetim Jehova i helpim yupela taim traim i painim yupela, maski em i wanem kain traim. Sanap strong, na no ken les. Yupela bai i no inap bel hevi liklik long yupela i bin mekim olsem. Tok Bilong God i strongim yumi olsem: “Ol man i bihainim tru pasin bilong God, ol i stretpela man na ol bai i stap laip.”—Hab. 2:4.
Ol brata bilong yupela,
Gavening Bodi Bilong Ol Witnes Bilong Jehova