Wok Painia—Mi Inap Mekim?
1 Yu bin beten na skelim sapos yu inap mekim wok painia o nogat? Yumi bin dediketim yumi yet long Jehova, olsem na yumi gat wok long skelim, yumi inap mekim bikpela wok moa bilong autim gutnius bilong Kingdom, o nogat.
2 Mi Inap Mekim Wok Painia?: Bilong bekim dispela askim, yu mas skelim sindaun bilong yu na wok bilong skin yu mas mekim em Baibel i makim bilong yu. Planti brata na sista em ol i no gat wanpela samting i pasim ol, ol i bin senisim tingting bilong ol long samting ol i ting em i bikpela samting na ol i bin stretim ol samting bambai ol i ken insait long wok painia. Olsem wanem? Yu inap stretim ol samting long sindaun bilong yu bambai yu ken mekim wok painia?
3 Satan i save mekim wok long ol samting bilong dispela graun em i bosim, bilong pulim tingting bilong yumi i go nabaut long kain kain samting na i kirapim yumi long tingim yumi yet tasol. Sapos yumi wok strong long sakim ol pasin bilong dispela graun, Jehova bai helpim yumi long putim ol samting bilong Kingdom i stap namba wan na wok strong long mekim sampela wok moa bilong spirit. Sapos yu inap senisim sampela samting long sindaun bilong yu bambai yu inap mekim wok painia, i gutpela sapos yu mekim olsem, a?
4 Mi Inap Lukautim Mi Yet Long Ol Samting Bilong Skin?: Tru, bilong kisim ol samting bilong skin em ol man i ting ol i mas kisim, long Papua Niugini na long planti kantri ol i mas lusim sampela aua moa long olgeta wan wan wik long mekim wok bilong skin, winim bilong bipo. Tasol planti brata sista i bin mekim wok painia inap planti yia pinis, na Jehova i wok yet long lukautim ol. Bilong stap gut long wok painia, man i mas i gat bilip na pasin bilong givim samting long narapela. (Mt. 17:20) Gutpela tok i stap long Song 34:10 inap strongim yumi, olsem: “Ol manmeri i bihainim Bikpela ol i no save sot long ol gutpela samting.” Man i laik insait long wok painia, em i mas bilip strong olsem Jehova bai lukautim em. Jehova i save mekim olsem long ol gutpela painia long olgeta hap! (Sng. 37:25) Ol painia i tingim tok i stap long 2 Tesalonaika 3:8, 10, na 1 Timoti 5:8, na ol i no ting ol narapela i mas helpim ol long mani samting.
5 Ol brata sista i tingting long kamap painia, ol i mas mekim olsem Jisas i bin tok: “Sindaun pastaim na tingim gut pe.” (Lu. 14:28) Taim em i mekim olsem, em i bihainim gutpela tingting. Toktok wantaim ol painia i mekim gut wok inap sampela yia pinis. Askim ol long olsem wanem Jehova i bin helpim ol. Wasman sekit bilong yu em wanpela painia i gat bikpela save, na em bai amamas long givim sampela gutpela tingting long yu long olsem wanem yu inap mekim gut wok painia.
6 Taim man i putim em yet long han bilong Jehova, em bai pilim stret truim bilong tok promis bilong Jisas i stap long Matyu 6:33. Long wanpela kantri, wanpela painia i stap gut long wok bilong em i stori olsem: “Taim mi na poroman bilong mi i bin kamap long nupela ples wok bilong mipela olsem painia, mipela i gat liklik kaikai bilong gaden na bata tasol, na no gat mani. Mipela i kaikai dispela olgeta kaikai long nait na mipela i tok, ‘Em nau, no gat moa kaikai long tumora.’ Mipela beten long Jehova long dispela samting, na mipela i go slip. Long moningtaim wanpela Witnes bilong dispela hap i kam na i tok, ‘Mi beten askim Jehova long salim sampela painia i kam. Nau mi inap autim tok wantaim yupela long de olgeta. Tasol haus bilong mi i stap longwe long hap bilong bus, olsem na mi mas kaikai wantaim yupela long belo na mi bringim dispela kaikai bilong yumi tripela i ken kaikai.’ Em i bringim bikpela hap abus bilong bulmakau na planti kaikai bilong gaden.” Olsem na Jisas i mekim gut bel bilong yumi olsem yumi no ken ‘tingting planti long laip bilong yumi’! Na em i tok moa: “Sapos wanpela bilong yupela i wok long tingting planti long rot bilong i stap gut, ating dispela . . . bai i skruim liklik hap taim moa long laip bilong en?”—Mt. 6:25, 27.
7 Sapos yu pilim tru olsem yumi stap long taim bilong las de na klostu nau pasin nogut bilong dispela graun bai pinis, yu bai tingim ol samting bilong spirit na dispela bai kirapim yu long daunim sampela laik bilong yu bambai yu inap autim gutnius long olgeta taim rot i op. Taim yu skelim gen ol samting bilong skin yu mas kisim na putim dispela samting long han bilong Jehova, ating bai yu save olsem yu inap mekim wok painia. Na sapos yu mas lusim sampela samting bilong skin bilong yu ken mekim wok painia, bai yu amamas long kisim planti blesing i kam long Jehova.—Sng. 145:16.
This is a partial repeat of article in km 7/98 taken from km-E 2/78 “Pioneer Service—Is It for You?”