Litimapim Nem Bilong Jehova Long Pasin Bilong Yumi Long i Stap Klin
1 Lain Israel i narapela kain lain, long wanem, ol i mas i stap klin long ol samting bilong skin na spirit. (Wkp. 11:35, 36; 15:1-11; Ais. 52:11) Pasin bilong ol long i stap klin i litimapim nem bilong God, na i helpim skin bilong ol long i stap gut.
2 Long nau tu, pasin bilong i stap klin i wanpela mak bilong lain bilong Jehova. Tasol olsem wanem long yumi wan wan—yumi stap klin? Pasin bilong yumi long stap klin na stretim gut ol samting i kamapim klia olsem yumi pilim tru ol lo bilong Jehova.
3 Ating ol man bai i no laik harim tok bilong Kingdom, sapos yumi stori long wok bilong kamapim wanpela paradais long graun, tasol long haus bilong yumi yet ol samting i stap nabaut na yumi larim banis i bus na yumi no katim gras. Sapos long haus bilong yumi ol samting i stap nabaut na toilet samting i no klin na i gat smel nogut, yumi no ken tok yumi “bihainim gutpela klinpela pasin i stret wantaim dispela nupela taim em Kingdom bilong God bai bosim,” a?—om p. 130-131.
4 Sapos yumi gat ka em yumi save yusim bilong i go autim tok, orait olsem wanem? Insait na ausait bilong en i stap klin? Nogut em i doti na dispela i pasim ol man long harim tok yumi autim? Na olsem wanem long klos na bilas bilong yumi na bek bilong autim tok? Ol i klin na gutpela, na ol man i no inap toktok planti long dispela? I stret yumi waswas long olgeta de na wasim ol klos tu bambai skin na klos bilong yumi i ken stap klin.—w89 12/1 p. 17-19.
5 Olsem wanem sapos wanpela brata i slek na em i no mekim gut skin na klos o haus na banis samting bilong em, na dispela i bagarapim nem bilong kongrigesen? Ating em i lapun o skin i no strong na i gat wok long narapela i mas helpim em. Sapos olsem, orait em i gutpela pasin long wanpela i helpim em. Ating wanpela brata i gat hevi long i stap klin na em i no tingim dispela; gutpela tok narapela i mekim inap kirapim em long stretim dispela hevi. Sapos oltaim wanpela brata o sista i no stap klin, em i no inap holim bikpela wok insait long kongrigesen. Ol elda i mas was gut, nogut ol i kamapim sampela lo o tingting bilong ol yet tasol na ol i strong long ol brata i mas bihainim.
6 Lukim gut ol samting i stap long Haus Kingdom bilong yupela. Olsem wanem? Ol sia, plua, na ol banis i stap klin? Ol toilet i stap klin? Sapos longtaim pinis yumi lukim plua i doti o pen i raus long ol banis, ating bai yumi ting ol i orait tasol. Tasol taim ol nupela man i kam long namba wan taim, ating bai ol i lukim ol dispela samting na ol i no amamas long dispela. Yumi mas wok strong long lukautim gut Haus Kingdom bilong yumi na mekim em i luk gutpela, maski em i stap long bus o ples. Long taim bilong klinim na stretim ol samting bilong Haus Kingdom, yumi mas amamas long insait long dispela wok.
7 Maski yumi no mekim wanpela tok, yumi inap litimapim nem bilong God taim yumi stretim gut skin bilong yumi, haus, ka, na Haus Kingdom. Gutpela pasin yumi bihainim bai i no pundaunim wanpela man, nogat; em kamapim klia olsem lotu bilong yumi i klin na i stret.—1 Ko. 10:31, 32; Jems 1:27.
This is a repeat of article in km 8/98 and 4/94 taken from km-E 4/94 “Cleanliness Honors God.”