Papamama—Skulim Ol Gut
1 Wanpela as na Abraham i bin stap pren bilong God, em olsem God i save Abraham bai ‘tokim ol pikinini na ol lain tumbuna bilong en long ol i mas bihainim tok bilong Bikpela, na ol i mas bihainim gutpela na stretpela pasin tasol.’ (Stt. 18:19) Yu ting i gutpela ol papamama Kristen i bihainim wankain pasin long nau? Sapos yu wanpela papa o mama, yu wok long skulim ol gutpela pikinini bilong yu long wokabaut long rot bilong Jehova, na taim ol man i ‘askim ol long as bilong dispela gutpela samting ol i wetim i stap, ol i redi oltaim long bekim tok long ol na ol i bekim tok long tok isi na long gutpela pasin’?—1 Pi. 3:15, 16.
2 Tru, em gutpela long ol pikinini bilong yumi i save long ol sik na ol narapela hevi em pasin bilong kisim blut inap kamapim. Tasol bilong skulim ol pikinini long stretpela lo bilong God long blut em i no makim olsem yumi mas skulim ol long pret long blut, nogat. Olsem: Sapos wanpela jas i askim wanpela liklik pikinini meri long as na em i no laik kisim blut, na bekim bilong pikinini i kamapim olsem em i tingim blut i olsem samting nogut na em i pret long en, bai jas i ting olsem wanem long dispela? Em inap ting liklik meri hia i yangpela yet na em i pret tumas, wankain olsem em inap pret long ol dokta i katim apendiks bilong em na em bai krai na i no laik bai ol dokta i mekim olsem, maski papamama i ting operesen i gutpela bilong helpim em. Na tu, i no olsem blut em i samting nogut na long dispela as ol Kristen i no laik kisim, nogat; blut em dia tumas long ai bilong God bilong yumi na Man bilong givim laip long yumi. Ol pikinini bilong yumi i mas save long dispela, na ol i mas save tu long ol hevi blut inap kamapim. Dispela inap mekim na ol i pilim olsem bilip bilong yumi i gutpela tru.
3 Sapos yu gat ol pikinini, yu save tru tru olsem ol i wanbel long dispela samting na ol inap kamapim bilip bilong ol long pasin bilong kisim blut em Baibel i as bilong en? Ol i bilip tru olsem em laik bilong God long ol i no ken kisim blut? Ol i bilip strong olsem pasin bilong brukim lo bilong God inap mekim na Kristen i lus long kisim laip oltaim? Ol papamama i gat gutpela tingting ol bai toktok gen wantaim pikinini bilong ol long ol dispela samting, maski ol i yangpela tru o klostu ol bai kamap bikpela man o meri. Ol papamama i ken mekim traim wantaim ol pikinini na ol i ken kamapim ol askim em jas o bikman bilong haus sik inap askim ol long en. Papamama i no mekim olsem bilong yangpela i lain long kolim nating ol bekim long maus, nogat. Em i bikpela samting moa long ol i save long ol samting ol i bilip long en, na i gat wanem as na ol i bilip olsem. Tru, long taim bilong kot, papamama na ol narapela inap kamapim sampela tok long ol hevi em blut inap kamapim na kolim ol narapela kain marasin ol inap mekim wok long en. Tasol samting jas o bikman bilong haus sik i laik kisim save long en taim em i toktok wantaim pikinini bilong yumi em olsem: Pikinini i save gut long ol samting i laik painim em na ol samting em inap mekim, na tu, ol i laik save pikinini i gat tingting bilong em yet na strongpela bilip o nogat.—Skelim wantaim 2 King 5:1-4.
4 Yumi olgeta i mas pilim tru na pasim tok long bel long holimpas tingting bilong God long blut. Kamapim Tok Hait 1:5 i stori long Krais olsem em man i save “laikim yumi tru, na long blut bilong em yet em i bin lusim olgeta sin bilong yumi.” Yumi mas bilip tru long blut bilong Jisas, long dispela rot tasol sin bilong yumi bai tekewe olgeta. Rom 5:9 i tokaut klia: “Krais i bin dai na blut bilong en i kapsait na klinim yumi, na nau God i kolim yumi ol stretpela manmeri. Olsem na nau yumi save tru, bai em i helpim yumi moa yet, na bai yumi stap gut long taim God i mekim save long ol man bilong mekim sin.” Olsem na em i savepasin sapos yumi na ol pikinini bilong yumi i larim Jehova i skulim yumi long dispela samting, na yumi tingting strong long wokabaut long rot em i makim inap oltaim oltaim!
This article has been taken partly from w91-E 6/15 “Walk as Instructed by Jehovah,” par. 19-22.