Tok i Tru i Mekim Yumi i Stap Fri Olsem Wanem?
1 Wanpela taim, Jisas i tokim ol Juda i bilip long em olsem: “Yupela bai i save long tok tru, na tok tru bai i mekim yupela i kamap fri.” (Jo. 8:32) Em i tok long wanpela pasin bilong i stap fri em olgeta kain man inap kisim, maski ol i gat planti mani kago o nogat, o ol i bin i go long skul o ol i no skul. Na dispela pasin bilong i stap fri em i winim tru pasin bilong wanpela gavman long graun long larim ol man i stap fri long mekim ol samting i stret long mekim. Tok i tru em Jisas i skulim ol man long en bai helpim ol long i stap fri long kalabus bilong sin na indai. Olsem Jisas i tok, “olgeta man i save mekim sin, ol i stap wokboi nating bilong sin.” (Jo. 8:34) Yumi wetim tru dispela taim bai kamap na olgeta man i bihainim tok bai ‘lusim kalabus bilong bagarap na kamap fri bilong kisim glori bilong ol pikinini bilong God’!—Ro. 8:21, King Jems Nupela Testamen.
2 Tok i tru i stori long Jisas na wok bilong em insait long ol samting God i tingting pinis long mekim, dispela i as bilong dispela pasin bilong i stap fri. Dispela tok i tru i makim tu save yumi gat long pe bilong baim bek man em Jisas i bin givim bilong helpim yumi. (Ro. 3:24) Na long nau tu, taim yumi kisim tok i tru bilong Baibel na yumi bihainim, dispela i save helpim yumi long i stap fri long kalabus bilong pret, bel hevi, na ol kain kain pasin i save nogutim man.
3 Stap Fri Long Pasin Bilong Pret na Bel Hevi: I no gat wok long yumi bel hevi long ol samting i kamap long graun, long wanem, yumi save long as na ol pasin nogut i stap na yumi save olsem klostu nau bai ol i pinis olgeta. (Sng. 37:10, 11; 2 Ti. 3:1; KTH 12:12) Na tu, tok i tru i helpim yumi long i stap fri long ol tok giaman bilong samting i painim ol man i dai pinis. Yumi save olsem ol man i dai pinis ol i no inap nogutim yumi, na ol i no karim pen inap oltaim oltaim, na God i no mekim ol man i dai na bai em i ken kisim ol i go stap wantaim em long ples spirit, nogat.—Sav. 9:5; Ap. 24:15.
4 Dispela tok i tru i bin strongim bel bilong wanpela papa na mama taim pikinini bilong ol i dai. Mama bilong dispela pikinini i tok: “Mipela i lus long wanpela samting na mipela i no inap painim dispela samting inap long taim pikinini bilong mipela i kirap bek na mipela inap lukim em gen. Tasol mipela i save, bel hevi bilong mipela em bilong liklik taim tasol.”
5 Stap Fri Long Ol Pasin i Save Nogutim Man: Tok i tru bilong Baibel inap senisim tingting na pasin bilong man, na dispela i save helpim man long i stap fri long ol hevi bilong graun em man inap abrusim. (Ef. 4:20-24) Pasin bilong mekim tok tru tasol na pasin bilong wok strong bai helpim man long daunim pasin bilong i stap rabis. (Snd. 13:4) Pasin bilong daunim laik bilong yumi yet na laikim tru ol narapela, dispela i save strongim pasin bilong pas gut wantaim ol narapela. (Kl. 3:13, 14) Pasin bilong daun long lo Kristen long ol samting bilong wok bos, dispela i save daunim ol hevi i kamap insait long famili. (Ef. 5:33–6:1) Pasin bilong abrusim pasin bilong spak, pasin pamuk, smok, na ol drak nogut i save kalabusim man, dispela i save helpim skin bilong yumi long i stap gut.—Snd. 7:21-23; 23:29, 30; 2 Ko. 7:1.
6 Wanpela yangpela man i bin kalabus long kisim drak inap 9-pela yia na em i hatwok tru long lusim dispela kalabus. Wanpela taim em i bungim wanpela pablisa i autim tok long rot. Em i kisim ol nius, na pablisa i stretim rot bilong i go lukim em long haus. Pablisa i kirapim Baibel-stadi wantaim em. Tupela mun bihain dispela man i pinis olgeta long kisim drak, na bihain long em i stadi inap 8-pela mun pinis, em i kisim baptais. Brata na tambu meri bilong dispela man ol i lukim em i lusim kalabus bilong kisim drak, na dispela i kirapim ol long stadi long Baibel.
7 Helpim Ol Narapela Long i Stap Fri: Ol man em ol i bin i stap kalabus long ol tok giaman inap long laip olgeta bilong ol, ating ol bai hatwok long pilim tru pasin bilong i stap fri olsem Tok Bilong God i kamapim. Ating pablisa i mekim wok tisa em i mas redi gut tru bambai em inap putim tok i go daun long bel bilong ol. (2 Ti. 4:2, 5) Nau em i taim bilong yumi mas wok strong tru long “tokaut long ol man i stap long kalabus long ol i ken lusim kalabus na i go fri.” (Ais. 61:1) Pasin bilong i stap fri ol Kristen i kisim em i wanpela gutpela samting tru. Man i kisim dispela pasin em inap kisim laip oltaim.—1 Ti. 4:16.