Riviu Bilong Skul Tiokratik Bilong Autim tok
Bai yumi toktok long ol dispela askim long Skul Tiokratik Bilong Autim Tok long wik i kirap long Epril 28, 2003. Wasman skul bai mekim riviu inap 30 minit long ol tok i bin kamap insait long skul long wik i kirap long Mas 3 i go inap long Epril 28, 2003. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Wanem ol samting inap mekim na maus i hevi na toktok i no ron gut? [1, be p. 93] (1) I gat ol tok yu no save gut long en; (2) pasin bilong malolo liklik long planti hap; (3) sapos yu no redi gut; (4) yu no bungim gut ol tok yu laik mekim na bai narapela tok i bihainim stret narapela tok; (5) yu no save long planti tok; (6) yu kolim strong planti tok tumas; (7) yu no save long ol lo bilong kolim tok ples.
2. Tru o Giaman: Yumi no ken malolo, long wanem, dispela inap mekim na tingting bilong man inap wokabaut o i givim rot long ol man long katim tok bilong yu. Stori long dispela. Giaman. Pasin bilong malolo long taim i stret long malolo i save mekim ol bikpela tok i stap ples klia. Ol dispela kain malolo i soim olsem yu gat sampela tok bilong mekim i gutpela long ol man i ken harim na tingim, na tok yu mekim bai pas strong long tingting bilong ol man. [4, be p. 97-98]
3. Olsem wanem stretpela pasin bilong kolim strong tok i save helpim man i mekim tok o ritim tok? (Neh. 8:8) [6, be p. 101] Taim man bilong mekim tok o ritim tok i bihainim stretpela pasin bilong kolim strong tok, tok bai kamap klia moa na ol man bai putim gut yau long tok em i mekim na dispela tok inap kirapim ol long mekim samting. (Kain tok olsem em inap.)
4. Olsem wanem man inap kamapim stretpela pasin bilong kolim strong tok? [7, be p. 102-103] Man inap kamapim dispela pasin taim em i stadi gut long ol tok em i mas ritim, wok long makim ol bikpela tok insait long ol sentens em i mas strongim, luksave long wanem hap wanpela tingting i pinis na narapela tingting i kirap, na em i mas save long ol bikpela tok em i laik bai odiens i ken tingim. (Kain tok olsem em inap.)
5. Wanem ol nambawan bikpela tingting yu laik kamapim strong taim yu ritim long maus ol paragraf long wanpela Baibel-stadi o long wanpela miting bilong kongrigesen? [8, be p. 105] Yu mas kamapim strong ol bekim bilong ol askim bilong stadi na ol tingting i strongim ol liklik het-tok ol i raitim long strongpela rait. (Kain tok olsem em inap.)
TOK NAMBA 1
6. Ol papamama i ken mekim wanem na bai ol pikinini “i ken harim na i stap aninit long God . . . na bihainim gut olgeta tok bilong em” long ol miting Kristen? (Lo 31:12) [1, be p. 16] (1) Ol papamama i ken bringim ol long ol miting bilong kongrigesen, na ol kibung sekit na distrik. (2) Long haus, makim taim bilong ol pikinini long sindaun na stap isi na ritim wanpela buk o lukluk long ol piksa bilong sampela buk. (3) Sapos inap, ol papamama i ken givim ol buk yumi yusim long ol miting long ol liklik pikinini bilong ol na helpim ol long redim sampela tok bilong bekim na bai ol i ken insait long ol miting. (Kain tok olsem em inap.)
7. Paradais bilong spirit em i wanem samting? [2, w01 3/1 p. 8-10] Paradais bilong spirit em i wanpela samting we olgeta man “i save tru long Bikpela” na ol i kamapim ol pasin em spirit holi i as bilong en, na dispela i mekim na i helpim ol man long stap wanbel wantaim God na ol narapela. (Kain tok olsem em inap.)—Ais. 11:9; Ga. 5:22, 23.
8. Olsem wanem Sindaun 8:1-3 i soim olsem olgeta man inap kisim gutpela tingting na save bilong God? Olsem Kolosi 2:3 i tok, yumi inap painim we dispela gutpela tingting na save? [3, w01 3/15 p. 25, 28] I olsem gutpela tingting na save bilong God i “singautim yumi,” na i “sanap” long ol hap we ol man i save bung long en, olsem long ol dua bilong ol bikpela banis bilong taun. Jisas i olsem as tru bilong gutpela tingting na save i kam long God, olsem na bilong kamapim dispela gutpela tingting na save yumi mas save gut long Jisas. (Kain tok olsem em inap.)—Ap. 4:12.
9. Olsem wanem yumi ken kamapim nem bilong God? (Jo. 17:6) [5, be p. 273-275] Taim yumi toktok wantaim ol narapela yumi no laik kolim “God” na “Bikpela” tasol, nogat, yumi laik kamapim nem tru bilong God. Yumi ken soim ol dispela nem long Baibel yet na long ol narapela hap, olsem long ol rait i stap antap long sampela bikpela haus. Na tu, em i bikpela samting long stori long wok bos, samting em i tingting pinis long mekim, pasin na ol lo bilong dispela Man em dispela nem i makim. (Kain tok olsem em inap.)
10. Ol man i mas save long wanem ol bikpela tok bilong “dispela gutnius bilong kingdom”? (Mt. 24:14) [7, be p. 279-280] Ol man i mas save olsem long 1914, Jisas i kamap King bilong Kingdom bilong God. Bihain, ol i tromoi Satan wantaim ol ensel bilong en i go daun long graun. Nau yumi stap long taim bilong las de, na i no longtaim na Kingdom bilong God bai pinisim olgeta man i birua long wok bos bilong God, na em bai kamapim nupela stretpela graun. (Kain tok olsem em inap.)—Dan. 2:44; 7:13, 14; KTH 12:7-10; 21:2-4.
BAIBEL RITIM BILONG WIK
11. (a) Long taim bilong ol aposel, dispela “samting nogut tru” em Mak 13:14 i kolim, i makim wanem samting? Em i makim ami bilong Rom wantaim ol samting ol i karim i kain olsem plak o mak bilong ol. Ol dispela plak samting em samting bilong lotuim ol god giaman, na long ai bilong ol Juda em samting nogut tru. (Kain tok olsem em inap.) (b) Dispela tok “i sanap i stap long ples i tambu long en” i makim wanem samting? Em i makim samting i kamap taim ol ami bilong Rom i kam kirapim pait long Jerusalem na long tempel long 66 C.E. [2, w99 5/1 p. 15 par. 6]
12. Olsem wanem Gutnius bilong Luk i kamapim long ples klia olsem Jisas em i bilong lain bilong Devit na i stret em i kisim wok king bilong em? (Lu. 3:23-38) [3, w92 10/1 p. 9 par. 3] Luk i kolim ol tumbuna bilong Jisas, kirap long Maria mama bilong Jisas na i go bek long Devit. Matyu i kolim ol tumbuna bilong Jisas, kirap long Josep, em waspapa bilong Jisas na i go bek long Devit. (Kain tok olsem em inap.)
13. Wanem mining bilong tok Jisas i bin mekim long Luk 12:2? Ol Farisi i giaman long mekim gutpela pasin, tasol bihain pasin nogut bilong ol bai kamap ples klia. Bihain, ol disaipel bilong Jisas bai ol i no pret long kamapim pasin giaman bilong ol Farisi, maski laip bilong ol inap lus taim ol i mekim olsem. (Kain tok olsem em inap.)—Lu. 12:3-5. [6, gt 77]
14. Long tok piksa bilong Jisas long mani i lus, bilong wanem yumi kirap nogut long samting ol ensel i mekim? (Lu. 15:10) Pasin bilong ol i mas mekim wanem long yumi? Ol sinman bilong dispela tok piksa ol bai inap insait long Kingdom bilong God long heven. Bai ol i kisim bikpela wok na bikpela nem winim bilong ol ensel yet! Tasol ol ensel i no jeles long dispela samting, nogat, ol i amamas, long wanem, ol i save ol dispela man i winim pinis ol hevi bilong graun, olsem na bai ol inap mekim gut wok king na pris long heven. (Kain tok olsem em inap.) [7, gt 85]
15. Luk 22:29 i stori long wanem tupela kontrak? Tok bilong Jisas olsem “mi givim kingdom long yupela” i stori long kontrak bilong Kingdom, em Jisas i bin mekim wantaim ol disaipel bilong em. Tok bilong em olsem “Papa bilong mi em i givim kingdom long mi” i stori long kontrak Jehova i bin mekim wantaim Jisas long em i kamap wanpela pris wankain olsem Melkisedek, olsem Song 110:4 i stori long en. (Kain tok olsem em inap.) [9, w98 2/1 p. 17 par. 18; it-1-E p. 524]