Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Jun 30, 2003. Wasman skul bai mekim riviu inap 30 minit long ol tok i bin kamap insait long skul long wik i kirap long Me 5 i go inap long Jun 30, 2003. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Bilong wanem pasin bilong senisim nek em i bikpela samting taim yu mekim tok? Yu inap mekim olsem wanem? [2, be p. 111 blok; p. 112 blok] Taim yu mekim stret pasin bilong senisim nek, dispela i kirapim bel bilong ol man, na i kirapim ol long mekim samting, tasol sapos yu no senisim nek, ating ol man bai ting olsem yu no laikim stori yu kamapim. Yu ken mekim stret dispela pasin taim yu senisim strong bilong nek, senisim spit bilong toktok, na senisim krai bilong nek.
2. Maski wanpela brata i bilipim tok em i kamapim na em i laikim tru Jehova, wanem samting inap mekim na em i no givim bel long mekim tok? [5, be p. 115 par. 3-4; p. 116 par. 1] Sapos man i mekim tok i redim tasol ol tok em bai kamapim, tasol em i no redim bel bilong em na em i no pilim long bel ol tok em bai kamapim, orait ating dispela inap mekim na em i no givim bel long mekim tok. (Esra 7:10) Na tu, man i mas bilip tru olsem odiens i mas harim tok em i kamapim.
3. Wanem samting bai helpim brata long mekim tok long pasin i kamapim olsem em i pilim tru long bel? Bilong wanem dispela em i bikpela samting? [7, be p. 119 par. 1-4] Brata inap mekim tok long pasin i kamapim olsem em i pilim tru long bel taim em i gat laik tru long helpim odiens. Krai bilong nek na pes bilong em inap soim olsem em i tingim tru odiens, na dispela em i bikpela samting long putim tok i go daun long bel bilong ol man i harim tok.
4. Wanem samting bai makim pasin em man bilong mekim tok bai bihainim insait long tok, olsem em i pilim tru long bel, givim bel long mekim tok o em i bihainim narapela kain pasin olsem? [8, be p. 120 par. 2-5] Bikpela samting em wanem samting man bilong mekim tok i toktok long en. Em i strongpela tok bilong kotim man o em i tok bilong wanpela man i sori tru long narapela? Man bilong mekim tok i no ken tingim tasol ol tok na tingting em i laik kamapim, nogat, em i mas mekim tok long pasin i kamapim samting em i pilim long bel na i stret wantaim dispela tok. (Skelim wantaim Matyu 23 na Stat 44.)
5. Tru o Giaman: Pasin bilong wokim han na pes inap helpim tok yu mekim sapos odiens bilong yu i lukim yu, na em tasol. Stori long dispela. [9, be p. 121 par. 3] Giaman. Maski odiens inap lukim yu o nogat, sapos yu wokim han na mekim nais long pes, nek bilong yu bai kamapim olsem tok yu mekim em i bikpela samting, na em bai kamapim tingting bilong yu long samting yu stori long en.
TOK NAMBA 1
6. Wanem samting i helpim Josaia long makim stretpela rot long bihainim maski sindaun bilong em i nogut taim em i pikinini? (2 Sto. 34:1, 2) [2, w01 4/15 p. 26 par. 5–p. 27 par. 5; p. 28 par. 3] Wanpela gutpela samting em pasin bilong bubu bilong em Manase long tanim bel; em i putim yau long “ol tok bilong lo”; pasin bilong daunim em yet; em i daun tru long ol profet bilong Jehova na ol tok ol i autim; na em i strong long mekim laik bilong God. (2 Sto. 33:10-13; 34:19-33)
7. Tok bilong Sindaun 9:7, 8a i gat wanem mining? Olsem wanem yumi ken bihainim dispela tok taim yumi autim tok? [3, w01 5/15 p. 29 par. 4-5] Sapos man i bel nogut long tok i tru o em i laik tok bilas long en na daunim man i laik lainim em, orait maski traim long lainim kain man olsem. Taim yumi autim tok yumi laik helpim ol man i gat gutpela bel long kisim save long gutnius bilong Kingdom, tasol yumi mas was gut, nogut yumi tok pait nabaut wantaim ol man bilong tok bilas.
8. Taim Jehova i tokim ol Israel olsem, ‘Yu no ken lusim tingting,’ em i laik bai ol i mas tingim wanem samting? Yumi ken mekim wanem na bai yumi no lusim tingting? (Lo 4:9; 8:11) [5, be p. 20 par. 1-3] Ol Israel i no ken tingting tasol long ol samting bilong ol yet na ol i no tingim gut ol samting Jehova i bin mekim long ol na larim ol dispela samting i stiaim ol samting ol i mekim long olgeta de. Pasin bilong stadi na ritim Baibel long olgeta taim na insait long ol miting bilong kongrigesen na mekim wok autim tok inap mekim na bai tingting na pasin bilong Jehova i stiaim ol samting yumi mekim long olgeta de.
9. Olsem wanem tok Devit i mekim long Song 32:1, 5 na Song 51:10, 15 i soim olsem man i mekim bikpela rong tasol em i tanim bel tru, i no gat wok long pilim olsem em i nogut tasol na em i no inap mekim wanpela gutpela wok? [7, w01 6/1 p. 30 par. 1-3] Bel bilong Devit i stap isi taim em i autim sin bilong em, em i putim asua i go long em yet na em i no tokim Jehova olsem i gat as na em i mekim dispela rong, na em i no wok long putim asua i go long narapela. Em i tokaut olsem em i gat strongpela tingting long stap gut long wok bilong God, na em i laik bai Jehova i helpim em long stretim bel bilong em na mekim pasin i stret.
10. Yumi ken kisim wanem save long pasin bilong lukautim ol man i sot long samting taim yumi skelim tok bilong Pol long 1 Timoti 5:3-16? [8, w01 6/15 p. 11 par. 1] Em wok bilong kongrigesen long lukluk long ol man i stap rabis, na ol lapun meri man bilong ol i dai pinis; sapos ol wanblut bilong man i sot long ol samting ol inap helpim em, orait em wok bilong ol long mekim olsem; ol meri man bilong ol i dai pinis ol i mas inapim sampela mak bambai ol inap kisim helpim.
BAIBEL RITIM BILONG WIK
11. Jisas i stori long wanem samting taim em i toktok long “kamap nupela gen” long Jon 3:3? [1, w95 7/1 p. 9-10 par. 4-5] Jisas i stori long kamap nupela long holi spirit. Long dispela rot, ol man na meri inap kamap pikinini bilong God Jehova, maski ol i gat sin, na bihain ol inap kisim ol gutpela samting bilong heven, em bilong ol pikinini bilong God.
12. Jisas i mekim wanem wok long skul em i bin kisim? Pasin bilong Jisas long dispela i lainim yumi long wanem bikpela samting? (Jo. 7:15-18) [2, w96 2/1 p. 9-10 par. 4-7] God yet i bin skulim Jisas, na em i yusim dispela skul bilong litimapim nem bilong Jehova, bilong em yet nogat. Dispela i lainim yumi olsem, skul yumi kisim em bilong litimapim nem bilong Jehova, nem bilong yumi yet nogat.
13. Wanem as na Jon 7:53 i go 8:11 i no stap wantaim ol narapela ves bilong dispela hap long Baibel New World Translation? Klostu olgeta olpela Baibel i no gat ol dispela ves i stap long ol. Samting i stap ples klia i olsem: Ol dispela ves i no hap tru tru bilong Gutnius Jon i Raitim. Ol dispela ves i no hap tru bilong Baibel na spirit bilong God i no bin kamapim ol. [3, it-2-E p. 94 par. 5]
14. Olsem wanem Jisas i bin “kam bek gen long wankain pasin” olsem em i bin i go long heven? (Ap. 1:11) [6, w91 2/1 p. 11 par. 5] Ol disaipel bilong Jisas tasol i bin lukim em i go, na ol Witnes Bilong Jehova tasol i save em i kam bek pinis olsem spirit na em i stap, kirap long 1914.
15. Bilong wanem “ol manmeri i no i stap insait long lain bilong ol . . . i pret, olsem na ol i no save kam bung wantaim ol [disaipel],” olsem Aposel 5:13 i tok? Taim spirit bilong God i kamapim giaman bilong Ananaias na Safaira na God i kilim ol i dai, dispela i kamap olsem wanpela strongpela tok lukaut long ol man i laik mekim pasin giaman. Bihain long dispela, ol manmeri i gat tingting kranki long bel ol i pret long kam bung wantaim ol disaipel. [7, w91 2/1 p. 15 par. 22-23]