Yu Gat Magasin-Raun?

¹ Ol magasin-raun i gutpela rot tru bilong kirapim ol Baibel-stadi. Yu bin traim dispela? Taim yu go bek lukim man bilong tilim ol nupela nius long em, bai yu lukim olsem gutpela pasin pren bai kamap namel long yu na man bilong haus. Em i bikpela samting long go lukim ol man long magasin-raun! Yu mekim wanpela gobek taim yu go toktok gen wantaim wankain man. Planti yangpela i bin kirapim magasin-raun bilong ol yet na ol i save go bek lukim ol dispela man. Pasin bilong yangpela long wok wantaim man i bikpela pinis i gutpela moa na i winim pasin bilong ol yangpela yet i wok wantaim. Man i bikpela pinis i ken stori long man bilong haus olsem yangpela hia i lain long mekim wok autim tok.

² Kirapim Magasin-Raun: Olsem wanem yu inap kirapim magasin-raun? Long namba wan taim yu bungim man i kisim ol nius, stretim rot na bai yu ken i go lukim em gen. Raitim 5-pela samting long notbuk bilong autim tok. Ol dispela samting em: (1) nem bilong man bilong haus, (2) atres, (3) det yu bungim man, (4) det bilong nius yu tilim, (5) stori bilong nius yu toktok long en. Orait go bek lukim man taim yu kisim ol nupela nius.

³ Sampela narapela tok bilong tingim i olsem: Ol brata sista i gat magasin-raun ol i save tilim planti nius, maski kongrigesen i autim tok planti taim long ol teritori. Ol gutpela samting tru i bin kamap taim wanpela sista i autim tok long rot bilong tilim ol nius. Insait long 14 de em i kisim 40 man long magasin-raun bilong em. Narapela sista i go lukim ol man i laik harim tok, na em i kisim 80 man moa long magasin-raun bilong em.

⁴ Wok bilong tilim ol nius long ol bisnisman long teritori bilong yupela inap kamapim planti gutpela ekspiriens. Taim yupela i tingting long mekim wok bilong autim tok long ol stua, traim long mekim long taim i no gat planti man. Em i gutpela long autim tok long ol stua taim i no gat planti kastama i raun yet, long wanem, long dispela taim ol stuakipa i stap bel isi na ol i no bisi tumas. Mekim sotpela tok, kolim stret ol tok yu laik mekim, na bilas gut. Yu inap kamapim magasin-raun long bisnis teritori taim yu painim ol man i laik harim tok.

⁵ Sampela Tok Bilong Helpim Wok: Ol brata bilong yumi i ting ol dispela tok i helpim wok bilong autim tok long rot bilong ol nius: Ritim ol nius pastaim na kisim save long ol stori. Painim wanpela stori i toktok long wanpela hevi i stap long hap bilong yupela. Tingim wanpela stori em inap kirapim tingting bilong dispela 3-pela lain: ol man, ol meri, na ol yangpela. Soim olsem wanem nius i stret long man bilong haus na olsem wanem famili olgeta bai amamas long ritim nius. Senisim taim bilong tilim ol nius na bai yu inap bungim planti man moa long haus. Sampela kongrigesen i bin stretim rot bilong autim tok long apinun na ol pablisa bilong ol dispela kongrigesen i save tilim planti nius. Gutpela rot bilong tilim planti nius i olsem: Mekim sotpela tok na kamapim stret tok yu laik mekim. No ken toktok hariap tumas. Sapos man bilong haus i no laik harim, pasin bilong yu long toktok hariap bai i no kirapim tingting bilong em. Nogat. Toktok isi na kamapim olsem yu tingim man bilong haus. Ol pablisa i save tilim planti nius long ol man i tok ol i bisi. Long ol kain man olsem pablisa i ken tok: “Nogut mi kisim bikpela hap taim bilong toktok wantaim yu, ol nupela nius bilong mipela i kamapim tok mipela i laik autim.” Nau tilim tupela nius na opim rot long man bilong haus i ken givim kontribiusen bilong helpim wok bilong yumi long olgeta hap, sapos em i laik mekim olsem.

⁶ Wanpela sista i ting wanpela meri long magasin-raun bilong em i no save ritim Wastaua na Kirap! Sista i no laik tilim nating ol gutpela nius, olsem na em i beten long Jehova na tok, sapos meri i no ritim ol nius, em i no ken kisim. Taim sista i go bek lukim meri, man bilong dispela meri i tok: “Tenkyu tru long bringim oltaim ol dispela nius. Mi save ritim na mi laikim tru.” Gutpela sapos yumi tu i mekim gut wok bilong helpim ol man i gat gutpela bel long laikim tumas long kisim tok i tru bilong Baibel.​—⁠1 Pi. 2:⁠2.

This is a partial repeat taken from paragraphs 28-32 of article in km-E 3/84 “Magazines Point the Way to Life.”