Bilong Strongim Kongrigesen

¹ Planti taim oganaisesen bilong Jehova i bin kamapim olsem olgeta manmeri bilong God i mas kamap strong long ol samting bilong spirit. Bilong helpim ol long mekim olsem, olgeta wan wan elda i mas pilim olsem em i bikpela samting long stretim sediul na bai ol inap mekim wok bilong ol long lukautim ol manmeri bilong God, na redi long helpim ol long ol samting ol i sot long en, na mekim long pasin sori. Wasman bilong Buk-Stadi i gat wok long helpim ol pablisa long grup bilong em, tasol em i mekim wok tu olsem elda na wasman, olsem na em i mas tingting long helpim kongrigesen olgeta.​—⁠Ap. 20:28; 1 Pi. 5:2, 3.

² Taim ol elda i mekim visit bilong wasman, ol i no laik save tasol long wok pablisa i mekim long wok autim tok, nogat. Ol i laik save olsem pasin bilong ol brata long laikim Jehova i stap strong o nogat, na ol i laik strongim pasin bilong laikim narapela, na helpim ol long kisim amamas long wok autim tok na long go long ol miting. Taim elda i go long haus bilong wanpela brata, brata i no ken ting olsem sampela samting i no stret na elda i kam lukim em, nogat. Pol i tok em i laik go lukim ol brata bilong save olsem “ol i stap gut, o nogat.” (Ap. 15:36) Yes, ol elda, em ol i gutpela wasman, ol i gat laik tru long save olsem yu stap orait o nogat. Ol i laik givim sampela helpim long yu long ol samting bilong spirit, bilong strongim yu.

³ Taim ol elda i mekim visit bilong wasman long ol brata sista, ol i mekim long pasin i olsem wanpela man i go lukim gutpela pren o brata bilong skin. Pasin bilong laikim narapela i kirapim ol long mekim olsem, na ol i kam bilong lukim yu na toktok wantaim yu long ol samting ol i save amamas tru long toktok long en​—⁠em ol gutpela samting i stap long Tok Bilong God na pasin bilong Jehova long laikim tru yumi. Pol i bin go lukim ol brata bilong em, long wanem, em i laik helpim ol long ol samting bilong spirit bilong “strongim ol” na bai ‘dispela i ken strongim bel bilong olgeta wantaim.’ (Ro. 1:​11, 12) Pasin bilong lusim hap taim long ritim wanpela hap bilong Baibel wantaim (ating hap ol i bin makim bilong ritim long Skul Tiokratik Bilong Autim Tok) o wanpela stori long ol magasin, dispela inap strongim tru bel bilong man.

⁴ Sapos i gat sampela samting o wanpela askim yu tingting planti long en, tingim olsem ol elda long kongrigesen ol i stap bilong helpim yu. No ken surik long toktok wantaim ol long ol samting i wok long nogutim yu long ol samting bilong spirit. Taim elda i mekim visit bilong wasman, sampela taim em inap lukim olsem brata i gat pasin bilong toktok planti o em i laik tok baksait long ol narapela. Pasin bilong mekim gut wok long ol skripsa na kamapim ol gutpela tok, dispela bai helpim brata. Tasol visit bilong wasman i bilong mekim na bai brata i pilim olsem em i bin kisim nupela strong, na em i no ken pilim olsem elda i bin krosim em.

⁵ Elda inap mekim visit bilong wasman long wanem taim? Olgeta wan wan elda i mas makim wanem taim i gutpela long em i ken i go long haus bilong ol pablisa. Ating sampela inap mekim olsem bihain long wok autim tok. Ol samting long sindaun bilong ol wan wan elda i narapela narapela, na ol i gat planti wok bilong mekim, tasol pasin bilong tingim na laikim tru ol brata i save kirapim ol long makim taim bilong i go lukim olgeta long grup bilong ol. Olsem na yu ken amamas olsem sampela taim ol elda bai kam lukim yu. Sampela taim, ating ol elda inap mekim visit bilong wasman long yu long Haus Kingdom, o long taim em i wok wantaim yu long autim tok, o long ol narapela taim. Wasman sekit tu i save wok strong long mekim sampela visit bilong wasman taim em i kam lukim kongrigesen.

⁶ Yumi mas pilim tru dispela gutpela samting Jehova i bin putim, na amamas long ol gutpela blesing em visit bilong wasman inap kamapim. Wanpela visit bilong wasman i no inap mekim na bai pablisa i kamap strong kwik long ol samting bilong spirit, tasol taim ol elda i go lukim em inap sampela taim pinis, em nau dispela inap helpim gut pablisa. Taim olgeta wan wan insait long kongrigesen i wok long kamap strong moa long ol samting bilong spirit, kongrigesen olgeta bai stap gut.

This article is unique to PNG.