“SPIRIT BILONG GOD YET I BIN KAMAPIM OLGETA TOK I STAP LONG BUK BILONG GOD. NA DISPELA TOK EM I GUTPELA SAMTING TRU.”

Stadi Namba 3​—⁠Ol Det na Yia Samting Bilong Baibel

Pasin bilong makim ol yia long taim bilong Baibel na pasin bilong skelim yia bilong sampela bikpela samting Baibel i stori long en.

TAIM Jehova i givim driman long Daniel long ‘king bilong not’ na ‘king bilong saut,’ inap 3-pela taim samting ensel bilong Jehova i stori long “taim God i makim” o “de” God i makim. (Dan. 11⁠:​6, 27, 29, 35) I gat planti narapela skripsa tu i kamapim klia olsem Jehova em i Man bilong makim stret taim, na em i save kamapim ol samting em i tingting pinis long mekim long taim stret em i makim pinis. (Lu. 21⁠:24; 1 Te. 5⁠:​1, 2) God i putim sampela tok long Baibel na ol dispela tok i helpim yumi long save long ol de na yia bilong sampela bikpela samting Baibel i stori long en. Ol man i bin wok long kisim dispela save, na nau ol i gat bikpela save moa long dispela samting. Wok painimaut ol saveman i mekim i wok long givim sampela save moa long yumi na dispela i helpim yumi long save long yia stret bilong sampela bikpela samting Baibel i stori long en.​—⁠Snd. 4⁠:⁠18.

² Tupela Kain Pasin Bilong Kolim Namba. Long Stadi Namba 2 (namel pepa yumi bin kisim wantaim Wok Kingdom bilong Oktoba 2002) yumi bin stori long tupela kain pasin bilong kolim namba (paragraf 24 na 25). Yumi mas tingim dispela samting taim yumi laik skelim ol yia Baibel i makim na pasin bilong ol man bilong nau long makim ol yia. Olsem: Baibel i stori long “namba 37 yia” bilong King Jehoiakin bilong Juda i stap kalabus long Babilon. Dispela i no makim olsem em i bin i stap kalabus inap 37 yia olgeta. Nogat. Dispela i makim olsem em i bin i stap kalabus inap 36 yia olgeta na liklik hap taim moa (olsem sampela de o wik o mun bihain long taim namba 36 yia i pinis).​—⁠Jer. 52⁠:⁠31.

³ Ol Yia Bilong i Stap King na Yia Bilong Kamap King. Lain bilong Israel, Juda, Babilon na Persia, ol i bin raitim long buk ol stori bilong ol samting ol king o bikman bilong ol i bin mekim. Baibel i stori long ol dispela kain buk. Ol dispela lain i save raitim ol yia bilong man i stap king na ol i makim stret yia bilong ol samting i kamap long taim em i stap king. Baibel tu i bihainim dispela pasin. Planti taim Baibel i kolim nem bilong buk em Baibel i kisim stori long en, olsem “dispela buk ol i kolim, Ol Stori Bilong Solomon.” (1 Kin. 11⁠:41) Taim ol i makim wanpela man i kamap king, long yia em i kamap king i gat sampela mun i stap yet. Ol dispela mun i bilong wok king bilong man i stap king paslain long em, na ol i no kaunim ol dispela mun, olsem hap yia, insait long ol yia bilong em i stap king. Ol i save makim yia bilong i stap king i kirap long mun Nisan na i go inap long mun Nisan long yia antap.

⁴ Olsem: Solomon i bin kamap king sampela mun paslain long mun Nisan long yia 1037 B.C.E., taim Devit i stap laip yet. Bihain liklik, Devit i dai. (1 Kin. 1⁠:​39, 40; 2⁠:10) Tasol laspela yia bilong Devit i stap king i no pinis taim Solomon i kamap king. Nogat. Dispela namba 40 yia bilong Devit i stap king i pinis long mun Nisan long yia 1037 B.C.E. Olsem na taim Solomon i kamap king i gat sampela mun bilong dispela namba 40 yia bilong Devit ol i stap yet na ol Israel i no skruim dispela yia long ol yia bilong Solomon i stap king. Nogat. Ol i kolim olsem yia bilong Solomon i kamap king, long wanem, em inapim tasol laspela yia bilong papa bilong em Devit i stap king. Olsem na namba wan yia bilong Solomon i stap king i kirap long mun Nisan long yia 1037 B.C.E. (1 Kin. 2⁠:12) Baibel i tok, Solomon i stap king inap 40 yia olgeta. (1 Kin. 11⁠:42) Taim yumi save long dispela pasin bilong makim ol yia bilong man i stap king na yia bilong em i kamap king, dispela i helpim yumi long makim stret ol yia bilong ol samting Baibel i stori long en.a

[Futnot]