Nupela Program Bilong Kibung Sekit
1 Bikpela bilong yumi i bin tok profet olsem hevi bai painim ol disaipel bilong em. (Mt. 24:9) Yumi mas ting olsem wanem long ol hevi? Wanem samting bai helpim yumi long karim hevi? Program bilong kibung sekit bilong 2004 bai bekim ol dispela askim. As tok bilong kibung em “Amamas Long Samting Yumi Bilip na Wetim. Sanap Strong na Karim Hevi.”—Ro. 12:12.
2 Tupela Tok i Gat Fopela Hap: Namba wan tok i gat fopela hap, nem bilong en “Sanap Strong na Karim Kaikai,” em bai stori long ol rot we yumi save karim kaikai. Ol bai mekim inteviu wantaim sampela pablisa long olsem wanem ol i holim tingting olsem taim i sot pinis na ol i autim tok na skulim ol man. Ol papamama bai laik long putim gut yau long dispela hap, “Taim Jehova i Stretim Yumi.” Dispela tok bai stori long olsem wanem ol papamama i ken toktok gut wantaim ol pikinini bilong ol. Brata i mekim laspela hap bilong dispela tok i gat fopela hap bai stori long ol samting yumi mas mekim bambai ol samting bilong dispela graun i no ken karamapim yumi na yumi no karim kaikai.—Mk. 4:19.
3 Nem bilong narapela tok i gat fopela hap, em “Ran Strong Long Resis na No Ken Les.” Em bai stori long olsem wanem rot yumi bihainim i kain olsem wanpela resis. Bilong wanem yumi mas bihainim ol lo bilong dispela resis? Olsem wanem yumi inap lusim olgeta samting i laik pasim yumi na yumi no les long ran long dispela resis bilong kisim laip? Ol tok bilong Baibel ol bai kamapim bai helpim yumi olgeta long ran strong yet.
4 Pasin Bilong Sanap Strong i Mekim God i Orait Long Yumi: Ol tok em ol wasman raun bai mekim, ol dispela tok bai strongim bilip bilong ol man i harim na bihainim. Wanpela tok bilong wasman distrik em “Pasin Bilong Sanap Strong i Mekim na God i Orait Long Yumi.” Pablik-tok bai bekim ol dispela askim: Ol manmeri i mas bilip na wet long husat i helpim ol? Dispela i makim olsem ol i mas mekim wanem ol samting? Laspela tok, “Yupela Mas Sanap Strong na Bai Yupela i Kisim Laip na i Stap Gut,” em bai stori long olsem wanem Jisas i bin sanap strong taim ol man i mekim nogut long em na em i no bel nogut.
5 Kisim buk Skul Bilong Autim Tok na Wastaua bilong stadi long en long dispela wik i kam long kibung. Raitim sampela hap tok long notbuk samting na bai tingting bilong yu i no ken wokabaut, na bihain yu ken lukim ol dispela tok. Bihain bai i gat riviu bilong program bilong kibung long miting bilong kongrigesen.
6 Jehova yet i bin redim dispela bikpela kaikai bilong spirit. Kam na kaikai! Bai yumi singim ol song bilong amamas sapos yumi stap long program olgeta.—Ais. 65:14.