Sanap Strong na Winim Pait
“Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela.”—HIBRU 10:36.
1. Olgeta manmeri i mekim wok bilong Jehova long nau, bilong wanem ol i mas sanap strong?
OLGETA manmeri bilong dispela graun i stap aninit long strong bilong wanpela god giaman i bikhet long King tru bilong heven na graun. Dispela bos bilong graun yumi no inap lukim, em Satan. Em i wok strong tru long birua long Jehova na long pasim wok bilong Kingdom bilong Krais long kamapim klia olsem Jehova em i Nambawan Bikpela bilong heven na graun. Olsem na ol lain bilong dispela graun i birua oltaim long ol manmeri i dediket long God na helpim wok king bilong em. (Jon 15:18-20; 1 Jon 5:19) Yumi no inap abrusim dispela hevi, olsem na yumi olgeta wan wan i mas wok long sanap strong i go inap long taim pasin bilong dispela graun i pinis olgeta long Armagedon. Yumi mas sanap strong inap long las de bambai yumi inap i stap long lain bilong God, em ol i holimpas bilip na stap gut long God, na long dispela rot ol i winim pait na daunim strong bilong dispela graun. (1 Jon 5:4) Yumi mas mekim wanem bambai yumi inap sanap strong olsem?
2, 3. Olsem wanem God Jehova na Krais Jisas i gutpela piksa tru bilong pasin bilong karim gut hevi?
2 Wanpela samting yumi ken mekim, em olsem: Yumi ken bihainim pasin bilong tupela Man i gutpela piksa tru long pasin bilong karim gut hevi. Husat dispela tupela Man? Wanpela em Krais Jisas, “em i namba wan pikinini bilong God.” Krais Jisas i bin i stap gut long wok bilong God kirap long taim God i wokim em long wanpela taim bipo yumi no save long en na i kam inap long nau. Oltaim em i stap gut long wok bilong God, olsem na em i stap gutpela piksa bilong olgeta ensel na olgeta man i kamap bihain long em. (Kolosi 1:15, 16) Tasol nambawan piksa tru bilong pasin bilong karim gut hevi em God Jehova yet. Inap longtaim tru Em i karim ol hevi i kamap taim sampela long heven na long graun i bikhet long wok king bilong em, na em bai mekim olsem i go inap long taim em i kamapim klia tru olsem em yet i Nambawan Bikpela bilong heven na graun.
3 Dispela pasin bikhet i bin bagarapim tru nem bilong God na mekim em i belhat, tasol em i stap nambawan piksa tru bilong pasin bilong i stap isi na karim hevi. Maski Satan na ol narapela i bikhet tru long em na toknogutim em, em i karim dispela hevi. Em i daunim belhat bilong em na em i no kirap kwik long bekim rong bilong ol. Yumi pilim tru dispela pasin isi bilong em na marimari bilong em na yumi tenkyu long em. Sapos em i no bin karim gut hevi na mekim pasin marimari olsem, bai yumi no inap i stap laip liklik long graun. Tru tumas, God Jehova i bin karim gut hevi na long dispela rot em i litimapim tru nem bilong em!
4, 5. (a) Tok piksa bilong Pol long man bilong wokim sospen graun, olsem wanem dispela tok piksa i kamapim marimari bilong God na pasin bilong em long isi long ol man? (b) Olsem wanem marimari bilong God i no ken lus nating?
4 Aposel Pol i kamapim klia marimari bilong God na dispela pasin bilong em long isi long ol man. Pol i tok: “Man bilong wokim sospen em i ken kisim wanpela hap graun na long laik bilong em yet, em i ken wokim tupela sospen long en, wanpela naispela sospen bilong gutpela wok, na wanpela sospen nating bilong ol arapela kain wok. Ating dispela pasin i no stret, a? God tu i save mekim olsem. Em i laik kamapim ples klia belhat bilong em, bai olgeta man i ken save long bikpela strong bilong em. Ol sospen bilong kisim pe nogut ol i redi pinis long bagarap, tasol em i larim ol na em i wet longtaim long brukim ol. Long wanem, em i laik bai olgeta man i ken save long bikpela lait na strong bilong en, na long gutpela sindaun tru em i laik givim long ol sospen bilong kisim marimari. Bipo yet em i redim ol dispela sospen pinis bai em i ken givim gutpela sindaun na biknem long ol. Ol dispela sospen bilong kisim marimari, em yumi ol manmeri God i bin singautim. Na yumi no kam long lain bilong Juda tasol. Nogat. Yumi kam long ol arapela lain tu.”—Rom 9:21-24.
5 Dispela tok i kamapim klia olsem nau long dispela taim Jehova i karim hevi bambai em i ken kamapim laik bilong em, olsem na em i marimari long sampela man. Em i redim ol dispela man bilong kisim biknem oltaim long heven na dispela bai daunim wok nogut bilong nambawan birua bilong em, em Satan, na bilong olgeta wanwok bilong Satan. Sampela man i no bin kamap “sospen bilong kisim pe nogut”—ol i no bilong bagarap. Dispela gutpela samting i bin kamap long pasin isi bilong God I Gat Olgeta Strong. Marimari bilong em i no ken lus nating. Gutpela samting tru bai kamap long rot bilong marimari bilong em, olsem: (1) Bai i gat lain bilong Kingdom long heven ol i stap aninit long dispela Pikinini God i laikim tumas, em Krais Jisas, na (2) bai i gat ol manmeri i stap long paradais long graun, em God i kisim bek ol na ol i kamap gutpela olgeta. Olgeta dispela manmeri long heven na long graun inap kisim laip i stap oltaim.
Stap Strong Inap Long Las De
6. (a) Olsem wanem ol Kristen i no inap abrusim traim long sanap strong? (b) Hap tok Grik ol i tanim olsem “sanap strong,” planti taim em i save makim wanem kain pasin?
6 Em nau, yumi wetim gutpela samting tru i kamap, olsem na long olgeta taim yumi mas tingim tok bilong Jisas, em i tok: “Ol manmeri i stap strong inap long las de, God bai i kisim bek ol.” (Matyu 24:13) Taim yumi kirap long mekim wok disaipel bilong Krais, em bikpela samting long yumi mas wok strong, tasol bikpela samting tru em olsem: Yumi mas stap strong long dispela wok i go inap long pinis. Aposel Pol i kamapim gut dispela samting taim em i tok: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela.” (Hibru 10:36) Long dispela ves, hap tok Grik (hy·po·mo·neʹ) ol i tanim olsem “sanap strong” em i makim pasin bilong man i no pret na surik—em i karim hevi na sanap strong; maski wanem samting i laik pasim rot bilong em, maski ol man i mekim kain kain samting nogut long em, maski wanem kain traim o hevi i painim em, em i save sanap strong. Sapos yumi laik bai God i kisim bek yumi, hap wok bilong redi long dispela em olsem: Yumi mas winim traim na sanap strong.
7. Yumi no ken giamanim bel olsem wanem? Husat i stap gutpela piksa bilong helpim yumi long karim hevi na sanap strong?
7 Yumi no ken giamanim bel. Yumi no ken ting long helpim yumi yet na yumi laik bai traim i pinis kwik. Satan i bin sutim tok long wok king bilong God na long pasin bilong ol man long i stap gut long God, tasol God i no ting long helpim em yet. Bilong stretim gut dispela tok, em i bin karim hevi na ol samting nogut inap longtaim, maski em inap pinisim wantu tasol. Krais Jisas tu i stap olsem gutpela piksa long pasin bilong karim hevi. (1 Pita 2:21; lukim tu Rom 15:3-5.) Sapos yumi tingim gut dispela tupela gutpela piksa bilong yumi, bai yumi amamas long karim hevi na i stap strong inap long las de.—Hibru 12:2, 3.
Ol i Mas Mekim
8. Aposel Pol i bihainim wanem pasin em yumi olgeta i mas bihainim?
8 I no gat wanpela wokboi bilong God long bipo o long nau em inap abrusim wok bilong karim hevi na sanap strong bilong kamapim klia olsem em i stap gut long God. Olgeta i mas sanap strong na winim pait. Ol manmeri bilong kisim laip long heven, em ol i gat biknem long Baibel na ol i bin stap gut long God inap long ol i dai, olgeta i mas sanap strong long ol hevi bilong kamapim klia olsem ol i stap strong long bilip. I olsem dispela man bipo i stap Farisi, em Sol bilong Tarsus, i tokim ol Korin: “Tru, mi samting nating, tasol mi no aninit long ol dispela ‘namba wan aposel’ bilong yupela. Long taim mi stap namel long yupela mi bin mekim planti samting i soim olsem mi aposel tru. Mi bin sanap strong na karim ol hevi, na long dispela pasin ol kain kain mirakel na ol narapela strongpela wok i bin kamap namel long yupela, bilong soim olsem mi bin mekim wok bilong God.” (2 Korin 12:11, 12) Taim Pol i mekim wok bilong God, planti hevi i painim em, tasol em i laikim tru dispela wok, olsem na em i amamas long karim ol dispela hevi, na em i wok strong bambai ol man i no ken tok nogut long dispela wok.—2 Korin 6:3, 4, 9.
9. (a) Olsem wanem lain remnan i bin karim gut hevi? Wanem gutpela samting i bin kamap long dispela rot? (b) Wanem samting inap kirapim yumi long stap strong long wok bilong God?
9 Nau long taim bilong yumi, ol Kristen em God i makim ol na ol i bin mekim wok bilong em paslain liklik long taim bilong namba wan pait bilong olgeta hap, ol i save Taim Bilong Ol Narapela Lain i mas pinis long yia 1914. Olsem na planti ol i ting, long dispela yia bai ol i go antap na kisim prais bilong ol long heven. Tasol nogat. Nau yumi save, ol i bin i stap planti yia moa, na long dispela hap taim moa bilong laip bilong ol long graun, God Jehova i bin wok long skelim na stretim ol. (Sekaraia 13:9; Malakai 3:2, 3) Ol i sanap strong i go na dispela i helpim ol. Ol i wokboi bilong Jehova na ol i amamas long kamap lain bilong holim nem bilong em. (Aisaia 43:10-12; Aposel 15:14) God i lukautim ol long taim bilong tupela pait bilong olgeta hap na long planti liklik pait, na nau ol i amamas long lukim bikpela lain arapela sipsip, winim 4 milion, i helpim ol long autim gutpela tok bilong Kingdom. Ol i stap gutpela long ol samting bilong spirit na i olsem ol i stap long wanpela gutpela ples paradais. Dispela “paradais” bilong ol i go kamap long olgeta hap, inap long ol ailan i stap longwe longwe. God i bin mekim gut tru long yumi na yumi pilim moa yet, na dispela i kirapim yumi long sanap strong na i stap gut long wok bilong em i go inap long taim em i kamapim pinis ol samting em i laik mekim.
10. Oltaim yumi mas mekim wanem bambai yumi no ken slek liklik?
10 Yumi mas i stap strong bambai yumi inap kisim prais, olsem na oltaim yumi mas kisim ol tok bilong kirapim yumi long i stap strong. (1 Korin 15:58; Kolosi 1:23) Long olgeta taim i mas i gat samting bilong strongim yumi bambai yumi inap holimpas ol tok i tru na gutpela wok bilong autim tok, olsem Pol na Barnabas i bin strongim ol disaipel taim tupela i go bek lukim ol nupela kongrigesen i kamap long taim bilong ol aposel. (Aposel 14:21, 22) Yumi mas i gat strongpela tingting long holimpas tok i tru, na bai em i ken “i stap long yumi oltaim oltaim,” olsem aposel Jon i tok.—2 Jon 2.
Wet i Stap na No Ken Lusim Liklik Pasin Bilong Sanap Strong
11. I olsem God i mekim wanem kain pasin long ol wokboi bilong em? Olsem wanem dispela pasin i kamap klia long samting i painim Josep?
11 Traim bilong yumi i no inap pinis kwik. (Jems 1:2-4) Traim bilong ol wokboi bilong Jehova long bipo i no pinis kwik—ol i karim hevi longtaim. Pasin God i mekim long ol i olsem em i laik bai ol i mas wet! Wet! Wet! Tru, ol i wet na karim hevi longtaim, tasol ol i stap strong long bilip na dispela i bin helpim ol. Olsem Josep: Inap 13 yia em i karim hevi olsem wokboi nating na kalabusman, tasol dispela traim i helpim em long stretim sampela pasin bilong em.—Buk Song 105:17-19.
12, 13. (a) Abraham i mekim wanem na em i stap gutpela piksa bilong pasin bilong sanap strong long bilip? (b) Olsem wanem pasin bilong Abraham long bilip na sanap strong i olsem gutpela piksa bilong yumi ken bihainim?
12 Taim Abraham i winim pinis 75 krismas, God i tokim em long lusim Ur long Kaldia na i go long Graun Bilong Promis. Taim God i mekim kontrak o tok promis long Abraham na em i mekim tok tru antap bilong strongim dispela tok promis, Abraham i gat 125 krismas. God i mekim dispela tok promis long taim Abraham i kamapim pinis strongpela bilip bilong em, olsem em i redi long kilim i dai pikinini bilong em Aisak olsem ofa, tasol ensel bilong Jehova i pasim em na em i no mekim. (Stat 22:1-18) Abraham i stap olsem tripman long graun bilong narapela lain inap 50 yia. Em i wet i stap na karim hevi olsem inap longtaim, tasol em i no les. Em i stap strong long bilip i go inap long taim em i gat 175 krismas na em i dai. Long ol dispela planti planti yia Abraham i wok strong long autim tok bilong God Jehova, olsem profet bilong em.—Buk Song 105:9-15.
13 Baibel i stori long pasin bilong Abraham long bilip na sanap strong olsem gutpela piksa bilong olgeta wokboi bilong Jehova i ken bihainim. Sapos ol i laik kisim ol gutpela samting God i bin tok promis long givim long ol long rot bilong Krais Jisas, em Pikinini bilong Abraham, ol i mas sanap strong long bilip wankain olsem Abraham. (Hibru 11:8-10, 17-19) Baibel i stori olsem long Hibru 6:11-15 na i tok: “Mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi. Yupela i no ken les. Yupela i mas bihainim pasin bilong ol man i bilip tru na i no les kwik, na ol i kisim olgeta samting bipo God i tok long givim long ol pikinini bilong em. Bipo God i laik givim promis long Abraham. Na i no gat wanpela man em i bikpela na i winim God, inap long God i ken tok tru antap long nem bilong em. Olsem na God i tok tru antap long nem bilong em yet olsem, ‘Mi tok tru tumas, bai mi mekim gut tru long yu na bai mi mekim ol lain tumbuna pikinini bilong yu i kamap planti tru.’ Na Abraham i wet na em i no les kwik, na bihain em i kisim olgeta samting God i bin promis long givim em.”
14. Bilong wanem yumi no ken les na ting olsem yumi wet longtaim tumas na yumi no inap kisim tru prais?
14 Taim Bilong Ol Narapela Lain i pinis long yia 1914 na sampela manmeri bilong liklik lain em God i bin makim ol, ol i ting long dispela taim olgeta manmeri bilong dispela lain bai go antap na kisim biknem long heven. Tasol nogat, na nau 77 yia i kamap i go pinis. Liklik hap lain i stap yet long graun, em lain remnan, na ol i mas wet inap hamas yia moa na bai ol i kisim dispela prais bilong ol long heven, em yumi no save. Tasol yu ting yumi ken les na ting olsem em longtaim tumas na yumi no inap kisim tru prais? Nogat! Sapos yumi mekim olsem, dispela i no inap soim ol man Jehova em i Nambawan Bikpela o stretim bek nem bilong em. Taim em i givim prais long yumi na yumi kisim laip i stap oltaim, bai ol manmeri bilong dispela graun i no ting olsem em i mekim stretpela pasin. Maski lain remnan na ol poroman bilong ol, olsem ol sipsip, i mas wet inap hamas yia moa, ol i tingting strong long wet tasol inap long Jehova i kirap mekim ol samting long taim em yet i makim pinis. Ol i bihainim pasin bilong Abraham—ol i wet na ol i no les kwik.—Rom 8:23-25.
15. (a) Yumi gat wanem bikpela tingting? God i strongim yumi na yumi winim wanem ol traim na hevi na yumi sanap strong? (b) Wanem tok bilong Pol i stret long yumi long nau?
15 Olsem na bikpela tingting bilong yumi em olsem: Yumi mas sanap strong bai yumi ken bihainim laik bilong God. (Rom 2:6, 7) Bipo God i bin helpim yumi na yumi bin sanap strong long ol bikpela hevi tru, olsem long kalabus na long ol banis kalabus nogut. Em i helpim yumi na yumi winim pait na dispela i litimapim tru nem na laik bilong Em.a Em bai helpim yumi long i go yet, inap long traim bilong yumi i pinis. Tok bilong Pol long bipo i stret long yumi long nau, em i tok: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela.”—Hibru 10:36; Rom 8:37.
16. Bilong wanem yumi no ken ting yumi dediket long God bilong mekim wok bilong em inap liklik taim tasol o bilong givim hap bel tasol long en?
16 Jehova i gat wok yet em i laik bai yumi mekim namel long ol lain nogut bilong dispela graun, olsem na yumi laik mekim dispela wok i go inap long wok i pinis. (Jon 17:4) Taim yumi dediket long Jehova, yumi no tok yumi bai mekim wok bilong em liklik taim tasol, inap long Armagedon. Nogat. Yumi tok promis long mekim wok bilong em i go inap long olgeta taim bihain. Wok em God i laik bai yumi mekim i no ken pinis long Armagedon. Tasol i gat sampela wok em i laik bai yumi inapim paslain long Armagedon, na bai yumi inap lukim ol gutpela samting i kamap bihain long dispela bikpela pait. Bihain long Armagedon bai yumi inap mekim yet wok bilong God, na bai yumi inap kisim ol gutpela samting em i tok promis long givim long yumi na yumi bin wet longtaim long en.—Rom 8:32.
Pasin Bilong Givim Bel Long God i Helpim Yumi Long Sanap Strong
17, 18. (a) Taim hevi na traim i painim yumi, wanem samting inap helpim yumi long sanap strong na bai God i amamas long yumi? (b) Wanem samting inap helpim yumi long winim pait? Yumi no tok wanem long ol yia i stap yet?
17 Long taim bilong hevi na traim, ating sampela taim yumi askim olsem: ‘Olsem wanem mi inap karim hevi na sanap strong yet?’ Wanem bekim bilong dispela askim? Olsem: Yumi mas givim bel olgeta long God na laikim em tumas long tingting na laip na strong bilong yumi olgeta. “Man i save givim bel bilong en long ol arapela, em i no save kros kwik na bekim pasin nogut ol i mekim long em. Nogat. Em i save mekim gutpela pasin long olgeta man. Em i no save bel nogut long ol man i gat planti samting. Em i no save litimapim nem bilong em yet. Man i save givim bel bilong en long ol arapela, em i no save larim wanpela samting i daunim em. Nogat. Oltaim em i save bilip long God na wetim God i helpim em. Na long taim bilong hevi em i save sanap strong. Dispela pasin bilong givim bel bilong yumi long ol arapela, em i no inap [lus long mekim gutpela wok]. Nogat tru.” (1 Korin 13:4, 7, 8) Yumi mas givim bel long God na dispela i mas kirapim yumi long sanap strong; sapos nogat, pasin bilong yumi long sanap strong i no inap kamapim wanpela gutpela wok. Tasol sapos yumi karim ol hevi na sanap strong, long wanem, yumi givim bel long God, orait dispela pasin bilong yumi long sanap strong bai helpim yumi long givim bel moa yet long God. Jisas i laikim tumas God, em Papa bilong em, na dispela i helpim em long karim ol hevi na sanap strong. (Jon 14:30, 31; Hibru 12:2) Sapos yumi givim bel long God, em Papa bilong yumi, na yumi sanap strong, orait bai yumi inap sanap strong long olgeta hevi, a?
18 Yumi bin givim bel tru long God Jehova long dispela taim bilong planti hevi na traim, na dispela i bin helpim yumi long winim pait na daunim strong bilong dispela graun. Na Jehova bai wok yet long helpim yumi long rot bilong Krais Jisas bambai yumi inap sanap strong, maski hamas yia moa God bai larim dispela pasin nogut bilong nau i stap. (1 Pita 5:10) Mipela i no save mekim sampela tok bilong makim hamas yia moa yumi mas wet; mipela i no makim wanpela de o mun o yia. Em wok bilong God Jehova long makim taim bilong ol samting, em Man bilong mekim olsem.—Buk Song 31:15.
19, 20. (a) Yumi mas ting olsem wanem long olgeta wan wan de moa yumi karim hevi na sanap strong? (b) Yumi laik abrusim wanem pasin longlong? Bilong wanem yumi laik mekim olsem?
19 Tasol ol manmeri bilong dispela taim nau, em Jisas i tok bai ol i no dai yet na ‘pinis bilong dispela taim’ i kamap, ol dispela manmeri i go lapun tru nau. (Matyu 24:3, 32-35) Olsem na yumi no ken lusim tingting olsem olgeta wan wan de moa yumi karim hevi na sanap strong em wanpela de klostu moa long taim Satan wantaim lain bilong em i mas pinis na i no ken bagarapim moa dispela graun, na em wanpela de klostu moa long taim bilong Jehova long bagarapim “ol sospen bilong kisim pe nogut.” (Rom 9:22) I no longtaim na pasin bilong Jehova long isi long ol man bai i pinis na bai em i kamapim belhat bilong em na pinisim ol man na meri i givim baksait long em. Bai em i kamapim long ples klia olsem em i no orait liklik long pasin nogut ol i mekim, maski em i bin larim ol i stap longtaim liklik.
20 Sapos yumi no givim bel moa long God na yumi no wok strong moa long kisim prais em i laik givim long yumi long rot bilong Krais Jisas, yumi bihainim pasin longlong. Tasol yumi no laik mekim olsem. Yumi tingting strong long i stap gut long wok bilong autim tok bilong Jehova, olsem ol witnes bilong em, nau long dispela bikpela taim bilong em i laik kamapim klia olsem em i Nambawan Bikpela bilong heven na graun.
[Ol Futnot]
a Olsem: Wanpela meri (Christine Elizabeth King) i raitim buk na em i tok: “I gat wanpela lain tasol em gavman [bilong Hitler] i no inap daunim, em ol Witnes [Bilong Jehova]. Maski gavman i kilim i dai planti tausen, wok bilong ol [Witnes] i go moa, na long Me 1945 lotu bilong ol Witnes Bilong Jehova i stap yet, tasol dispela [gavman] i pinis. Lain Witnes i bin i go bikpela na ol i no bin lusim lo bilong ol liklik. Sampela man bilong dispela lotu ol i holimpas bilip na ol birua i kilim ol i dai; dispela lotu i winim pinis wanpela pait moa long bikpela pait bilong God Jehova.”—The Nazi State and the New Religions; Five Case Studies in Non-Conformity, pes 193.
Bai Yu Bekim Wanem Tok?
◻ Olsem wanem na yumi no inap abrusim traim long pasin bilong yumi long sanap strong?
◻ Yumi no ken giamanim bel olsem wanem?
◻ Sapos yumi no laik slek liklik, yumi mas mekim wanem?
◻ Yumi gat wanem bikpela tingting?
◻ Long taim bilong traim, wanem samting inap helpim yumi long sanap strong?
[Piksa long pes 11]
Lain bilong God i amamas long wetim Jehova, olsem ol dispela Witnes long Pot ov Spen, long Trinidad