Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Disemba 29, 2003. Wasman skul bai mekim riviu inap 30 minit long ol tok i bin kamap insait long skul long wik i kirap long Novemba 3 i go inap long Disemba 29, 2003. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Bilong wanem pasin bilong mekim wok long Baibel long taim bilong autim tok em i bikpela samting? [1, be p. 145 par. 2, blok] Tok bilong Baibel i gat bikpela strong bilong stiaim ol man i olsem sipsip, winim ol tok yumi yet inap mekim. Man i save tingim tru ol samting em i lukim long Baibel long ai bilong em yet.
2. Olsem wanem ol tok bilong ol ves i stap klostu long skripsa yu laik kamapim i ken stiaim ol tok yu mekim bilong kamapim dispela skripsa? [3, be p. 149 par. 1] Ol ves i stap klostu i kamapim klia husat i bin mekim tok bilong dispela skripsa yu kolim. Olsem: Devit i no bin raitim olgeta tok bilong Buk Song, na Solomon i no bin raitim olgeta tok bilong Buk Sindaun. Na tu, ol ves i stap klostu i kamapim klia dispela skripsa i toktok long husat, na i toktok long wanem samting, na wanem kain sindaun i stap taim man i raitim.
3. Bilong wanem em i bikpela samting long kamapim strong ol tok i stret long kamapim strong taim yu ritim wanpela skripsa bilong Baibel? Olsem wanem yu inap mekim olsem? [5, be p. 151 par. 3, blok] Taim yumi kamapim strong ol tok i stret long kamapim strong, tok yumi kamapim bai i kamap klia moa na i no hatwok long odiens i kisim. Taim yu skelim gut wanpela skripsa yu laik ritim, askim yu yet olsem: ‘Mi mas kamapim strong wanem ol tok bilong dispela skripsa na em i ken mekim gut wok bilong en?’
4. Olsem wanem yumi ken bihainim tok bilong Pol long “autim stret tok tru bilong God” taim yumi skulim ol narapela? Bilong wanem em i bikpela samting? (2 Ti. 2:15) [7, be p. 153 par. 2, blok] Bilong “autim stret tok tru bilong God,” mining bilong ol skripsa yumi kamapim i mas stret wantaim ol samting Baibel yet i lainim yumi long en. Dispela i makim olsem yumi mas tingim tok bilong ol ves i stap klostu, na yumi no ken kamapim mining bilong ol tok long tingting bilong yumi yet o kamapim tingting bilong ol man. Dispela em i bikpela samting tru, long wanem, God i laik bai olgeta manmeri i ken “save long as bilong tok tru.” (1 Ti. 2:3, 4)
5. Olsem wanem Pol i bin ‘toktok gut long ol tok i stap long buk bilong God’? (Ap. 17:2, 3) [9, be p. 155 par. 5–p. 156 par. 1] Pol i kamapim sampela stori long i stap na wok autim tok bilong Jisas, na em i soim olsem Ol Skripsa Hibru i bin tok profet long ol dispela samting, na bilong pinisim tok em i mekim strongpela tok. Em i kolim tok bilong ol skripsa, na em i kolim wanpela tok o wanpela hap tok na bihain kamapim insait bilong en.
TOK NAMBA 1
6. Taim yumi yusim nambawan tul bilong yumi—em Baibel—bilong redim tok, bilong wanem i gutpela yumi (1) skelim tok i stap klostu, (2) lukim ol narapela skripsa ol i raitim namel o daunbilo long pes na (3) yusim wanpela concordance bilong Baibel? [1, be p. 34 par. 3–p. 35 par. 2] (1) Taim yumi skelim ol ves i stap klostu, dispela i helpim yumi long save long mining bilong dispela skripsa na i givim yumi sampela save moa em yumi ken yusim bilong mekim tok i kamap gutpela moa. (2) Sampela skripsa ol i raitim namel o daunbilo long pes i save stori long ol truim bilong wanpela tok profet o long samting kontrak bilong Lo i makim; sampela narapela skripsa ol i raitim namel o daunbilo long pes inap stori long samting i wankain o long graun i olsem wanem o long samting i painim ol man em skripsa i stori long en. (3) Wanpela “concordance” bilong Baibel bai helpim yumi long painim ol skripsa i stori long tok yumi laik painim save long en na i helpim yumi long luksave long “wankain pasin” bilong tok i tru i stap long Tok Bilong God. (2 Ti. 1:13)
7. Olsem wanem yumi ken soim olsem yumi stap gut long narapela? Yumi mas stap gut long husat? [3, w01 10/1 p. 22-23] Pasin bilong stap gut long narapela em i olsem pasin bilong sori na mekim gutpela pasin long narapela. Sapos narapela i sori na mekim gutpela pasin long yumi, i stret yumi mas mekim wankain pasin long em tu. Jehova i laikim tru Devit, na dispela i kirapim Devit long lotuim Jehova na litimapim nem bilong Em. (Sng. 138:2) Bilong stap gut long Jehova, yumi mas stap gut long Tok bilong em na oganaisesen bilong em tu. Na yumi mas stap gut long poroman marit bilong yumi, ol famili na pren husat ol i wanbilip bilong yumi.
8. Olsem wanem yumi save olsem Jehova em i man bilong makim stret taim? (Dan. 11:35-40; Lu. 21:24) [4, si namel pepa bilong Wok Kingdom bilong Novemba 2003, Stadi Namba 3 par. 1] Taim Jehova i givim driman long Daniel long ‘king bilong not’ na ‘king bilong saut,’ inap 3-pela taim samting ensel bilong Jehova i stori long “taim God i makim.” I gat planti narapela skripsa tu i kamapim klia olsem Jehova em i man bilong makim stret taim, na em i save kamapim ol samting em i tingting pinis long mekim long taim stret em i makim pinis.
9. Yumi mas tingim wanem ol samting taim yumi skelim save yumi bai mekim wok long en long tok bilong yumi? [5, be p. 38] Yumi mas mekim wok long save i helpim tok bilong yumi. Na skelim gut olsem tok yumi mekim wok long en i stret long nupela save yumi kisim na i stret wantaim ol nupela buk bilong ol Witnes Bilong Jehova. Na yumi mas was gut taim yumi laik kisim save long ol buk samting bilong dispela graun, na tingim olsem Tok Bilong God em i tru na Jisas i gat bikpela wok insait long truim bilong ol samting God i laik mekim. (Jo. 17:17; Kl. 2:3) Yumi mas kamapim tingting bilong God. (Snd. 2:1-5)
10. Bilong wanem tok bilong Jisas long “taim bilong Noa” i stret nau long taim bilong yumi? (Mt. 24:37) [7, w01 11/15 p. 31 par. 3-4] Ol Kristen long nau tu ol i man bilong autim tok long stretpela pasin, na ol i wok strong long kirapim ol man long tanim bel. (2 Pi. 3:5-9) Noa i bihainim tok bilong Jehova, maski ol man i birua long em na em i gat planti hevi. Noa na famili bilong em i no save long wanem taim stret God bai kamapim Bikpela Tait, tasol pasin bilong bilip long tok bilong God i strongim Noa long ol dispela yia em i mekim bikpela wok tiokratik. (Hi. 11:7)
BAIBEL RITIM BILONG WIK
11. Olsem wanem pas Pol i salim long Filemon i soim olsem wok bilong ol Kristen em long helpim ol man long kamap Kristen, na i no long stretim ol hevi long sindaun bilong ol man? (Fm. 12) Pol i kolim Onesimus, em wanpela wokboi nating i ranawe, olsem “pikinini” bilong em na “brata tru” bilong em. (Fm 10, 16) Maski Onesimus i harim tok Pol i autim na em i kamap Kristen, tasol Pol i no tok em i kamap fri, nogat, Pol i salim em i go bek long hap we lo bilong Rom i tok i stret long em i stap aninit long bosman bilong em. [1, w98 1/15 p. 30-31; w62-E p. 653-556]
12. Olsem wanem pasin bilong “slek,” “lusim bilip,” “givim baksait long God,” i narapela narapela kain? (Hi. 2:1; 3:12; 6:6) [2, w99 7/15 p. 19 par. 12; w86-E 6/1 p. 14 par. 16-17; w80-E 12/1 p. 23 par. 8] Pasin bilong “slek” i olsem isi isi man i lusim tok i tru—ating sampela samting bilong skin i pulim em o em i poroman wantaim ol man nogut o em i askim nabaut long ol samting bilong Baibel em Baibel i no mekim sampela tok long en. Pasin bilong “lusim bilip” em i pasin nogut, i olsem pasin bilong sanap longwe, o pasin bilong tromoi bilip i tru. Pasin bilong “givim baksait long God” i olsem long laik bilong man yet em i sakim tok i tru na em i no inap kam bek insait long tok i tru, na Jehova na Jisas tasol inap save man i mekim dispela pasin o nogat.
13. Olsem wanem yumi ken abrusim pasin bilong mekim nating nating dispela tok, “sapos Bikpela i laik”? (Jems 4:15) [4, cj-E p. 171 par. 1-2] Yumi mas abrusim pasin bilong kolim dispela tok olgeta taim na bai ol man i ken litimapim nem bilong yumi o bilong kamapim eskius long ol samting yumi mekim. Long olgeta samting yumi mekim, olsem taim yumi bihainim tok bilong Baibel long lukautim famili bilong yumi, yumi mas tingim laik bilong God na long bel yumi mas i gat laik long bihainim.
14. Wanem mining bilong dispela tok “wetim na tingim gut de bilong Jehova i kamap”? Olsem wanem yumi ken mekim olsem? (2 Pi. 3:12, NW ) [5, w97 9/1 p. 19-20] Em i makim olsem yumi mas was i stap na wetim “dispela bikpela de bilong God I Gat Olgeta Strong i kotim ol manmeri” long Armagedon. (KTH 16:14) Yumi ken mekim olsem long rot bilong tingim ol tok “ol profet bilong God i bin autim” long Jisas i holim strong bilong bosim Kingdom na bilong kot bai painim ol man i givim baksait long God. Na tu, yumi mas tingim “lo bilong Bikpela, em Man bilong kisim bek yumi” na was i stap. (2 Pi. 3:2; Lu. 21:34-36)
15. Wanem ol tok i go long 7-pela kongrigesen em Kamapim Tok Hait sapta 2 na 3 i stori long en i bikpela samting long ol Kristen bilong nau? (KTH 2:4, 5, 10, 14, 20; 3:3, 10, 11, 17, 19) Bilong yumi ken winim strong bilong dispela graun, yumi mas no ken slek long ol samting bilong spirit o lusim pasin bilong laikim tok i tru. Yumi mas save olsem bai yumi kisim traim inap tru long yumi na yumi mas wok strong long stap gut long God long olgeta taim. Na tu, yumi mas sakim pasin pamuk na pasin bilong tromoi lotu i tru, na was i stap long ol samting bilong spirit na sanap strong, na no ken larim pasin bilong les o laikim tumas mani kago i pulim yumi. [7, re p. 34 par. 5-6; p. 38 par. 5; p. 44 par. 10-11; p. 49 par. 7; p. 56 par. 7; p. 64 par. 20; p. 68 par. 8]