Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Februeri 23, 2004. Wasman skul bai mekim riviu inap 30 minit long ol tok i bin kamap insait long skul long wik i kirap long Janueri 5 i go inap long Februeri 23, 2004. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Yumi ken mekim wanem bilong kamapim klia long odiens olsem tok yumi mekim em inap helpim ol tru? [2, be p. 158 par. 2-4] (1) Stat long kirap bilong tok, yumi ken mekim long pasin em man i harim tok i ken pilim olsem em yet i insait long dispela tok. (2) Yumi mas mekim ol tok bilong man i ken bihainim long kirap bilong tok i go inap long pinis bilong tok, no ken kamapim long pinis bilong tok tasol. (3) Taim yu stori long olsem wanem man i ken bihainim wanpela tok yu bin kamapim, yu mas mekim long pasin i save strongim odiens na i kirapim ol long “laikim ol arapela na mekim ol gutpela pasin long ol.”—Hi. 10:24.
2. Bilong wanem yumi mas makim gut ol wan wan tok yumi bai kolim? [4, be p. 160 par. 1 na namba tu blok] Ol wan wan tok i gat strong na inap daunim man o strongim man. (Snd. 12:18, 25) Ol tok yumi makim bilong kolim inap stiaim tingting ol man i kisim long tok yumi kamapim, olsem na yumi mas wok long painim ol tok i “swit long yau bilong ol man.”—Sav. 12:10.
3. Bilong mekim tok i gutpela, wanem wanpela bikpela samting em 1 Korin 14:9 i kolim? Olsem wanem yumi ken bihainim dispela stiatok taim yumi skulim ol man? [5, be p. 161 pars. 1-4] Ol man i harim tok bilong yumi i no ken hatwok long kisim mining bilong tok yumi mekim. Taim yumi skelim gut na kamapim ol tok i no hatwok long ol man i kisim, na yumi kolim ol sotpela sentens, dispela kain tok i isi long kisim mining bilong en. Taim yumi mekim ol tok em ol man inap kisim mining bilong en, yumi soim olsem yumi tingim ol man i harim tok bilong yumi na i no hatwok long ol i tingim.
4. Taim yumi lukim ol tok i stap long Matyu 5:3-12 na Mak 10:17-21, wanem wanpela gutpela pasin bilong Jisas long skulim ol man em yumi ken bihainim? [6, be p. 162 par. 4] Wok tisa bilong Jisas em i gutpela tru, em i mekim ol tok i no hatwok long man i kisim. Yumi ken bihainim pasin bilong Bikpela Tisa na kolim ol sotpela tok i kamapim tingting bilong yumi. Yumi mas kolim ol tok i no hatwok long man i kisim na i no ol tok i hatwok long ol man i kisim gut. Taim yumi no kolim planti tok tumas, dispela bai mekim na i no hatwok long ol man i kisim na holim long tingting stretpela save.
5. Long wok bilong yumi long autim tok na long taim yumi bekim tok long ol miting Kristen, bilong wanem yumi mas kolim ol tok i gat strong na i kamapim olsem yumi pilim tru long bel? (Mt. 23:37, 38) [7, be p. 163 par. 3–p. 164 par. 1] Taim yumi mekim ol tok i kamapim gut tru sampela tingting na ol tok i kirapim ol man long lukim ol samting long tingting bilong ol, dispela bai helpim ol long putim gut yau long tok yumi mekim na helpim ol long pilim olsem ol dispela samting i kamap long ol. Ol tok yumi makim gut na kamapim inap mekim na man bai pilim tru long bel, na kirapim man i bel hevi tru long wetim gutpela samting, na kirapim em long i gat laik long i stap laip na long laikim tru Man Bilong Wokim em.
TOK NAMBA 1
6. Tim bilong tok i makim wanem samting? Olsem wanem pasin bilong tingim tim bilong tok bai helpim yu taim yu makim na stretim ol tok yu bai mekim? [1, be p. 39 par. 6–p. 40 par. 1] Wanpela tok tasol i no inap makim tim bilong tok, nogat, tim bilong tok i mas stret wantaim as tingting yu laik kamapim na i makim pasin yu bai bihainim bilong stori long dispela tok. Taim yumi skelim gut olgeta wan wan bikpela tok long tim bilong tok na yumi wok long painim sampela save long ol buk na nius samting, yumi mas tingim tim bilong tok, dispela bai helpim yumi long stretim gut tok na dispela tok i ken helpim ol man.
7. (a) I stap klin long ol samting bilong spirit i makim wanem samting? Bilong wanem em i bikpela samting tru long i stap klin long ol samting bilong spirit? Stap klin long ol samting bilong spirit i makim olsem yumi mas lotu tru long God na yumi stap longwe long lotu giaman na yumi no insait liklik long ol pasin bilong lotu giaman o bungim wantaim pasin bilong lotu tru. Em i bikpela samting, long wanem, dispela bai helpim yumi long kisim laip oltaim. (2 Ko. 6:17; KTH 18:4) (b) Olsem wanem ol Kristen i ken abrusim pasin i no stret i stap nau long dispela graun? [2, w02 2/1 p. 5-6] Man inap kamapim klia olsem em i orait long ol pasin i no stret long ol samting em i mekim bilong painim amamas na long bilas bilong em. Ol Kristen i mas abrusim ol samting bilong amamas i brukim ol stretpela lo bilong Baibel. Na tu, ol Kristen i no ken werim ol klos i pas na i no haitim gut skin, dispela inap pulim ai bilong ol narapela, ol i mas bilas long pasin i kamapim klia stretpela pasin.
8. Wanem ol stiatok bilong Baibel i bikpela samting moa? [3, w02 2/15 p. 5 par. 1, 3, 4, 6] Ol bikpela stiatok bilong Baibel i stori long pasin bilong yumi long pas gut wantaim Jehova. Wanpela bikpela tok i tru i stap long Baibel em, Jehova em i Man Bilong Wokim yumi, em i God i Gat Olgeta Strong, na em i God Antap Tru. (Sng. 83:18) Dispela i kamapim klia olsem em i mas i stap nambawan bikpela samting i stiaim yumi.—1 Ko. 10:31.
9. Pasin bilong pilim hevi bilong narapela i makim wanem samting? Olsem wanem Jisas i bin mekim dispela pasin? [4, w02 4/15 p. 25 par. 3-4] Pasin bilong pilim bel hevi bilong narapela i makim olsem yu pilim bel hevi bilong em long bel bilong yu yet. Taim Jisas i oraitim wanpela man em i yaupas na tang bilong en i hevi, na em i no inap toktok gut, Jisas i kisim em i go longwe long ol narapela na em i oraitim em, ating em i mekim olsem bilong dispela mirakel i no ken mekim yaupas i sem o pret. (Mk. 7:32-35) Jisas i pilim pen na hevi bilong wanpela meri wanpis em ol i laik planim pikinini man bilong em, meri i gat dispela wanpela pikinini tasol. Olsem na Jisas i yusim strong bilong em i stret wantaim laik bilong God na em i kirapim bek dispela yangpela man. (Lu. 7:11-16) Long nau Jisas i stap Hetpris na em i save “sori long yumi.”—Hi. 4:15.
10. Olsem wanem tok i stap long Sindaun 11:11 i makim ol lain bilong Jehova insait long ol kongrigesen? [7, w02 5/15 p. 27 par. 1-3] Jehova i blesim ol kongrigesen i kain olsem taun, em long ol dispela kongrigesen ol man i save tingim ol samting bilong spirit ol i stiaim ol narapela na ol i litimapim nem bilong Jehova. Yumi no ken putim yau long tok ol man i sutim bilong daunim narapela na tok baksait, em ol dispela kain tok i save bagarapim kongrigesen, yumi mas wok strong long helpim pasin bilong bel isi na pasin wanbel i kamap strong long kongrigesen.
BAIBEL RITIM BILONG WIK
11. Dispela “diwai bilong givim laip” em Stat 2:9 i stori long en i makim wanem samting? Dispela diwai i makim strongpela tok promis bilong God olsem em bai givim laip oltaim long ol man em bai larim ol i kaikai pikinini bilong en. Tasol bihain, Adam na Iv i mekim sin, olsem na i stret God i rausim tupela long gaden Iden na pasim rot bilong tupela i no ken go bek insait long gaden.—Stt. 3:22-24. [1, it-2-E p. 247 par. 4; w99 4/15 p. 7-8]
12. Bilong wanem meri bilong Lot i dai? (Stt. 19:26) [4, w91 1/1 p. 20 par. 10] Pasin em i mekim i kamapim klia olsem, tingting bilong em i pas tumas long gutpela haus bilong em long Sodom na ol narapela gutpela samting bilong skin em i holim winim pasin bilong em long givim bel tru long God.—Lu. 17:31, 32.
13. Long stori i stap long Stat sapta 24, ol dispela lain (a) Abraham, (b) Aisak, (c) wokboi bilong Abraham, em Elieser, (d) tenpela kamel, na (e) Rebeka, ol i makim husat? (a) Abraham i makim Jehova; (b) Aisak i makim Pikinini Sipsip Bilong God, em Jisas Krais; (c) Elieser i makim holi spirit; (d) dispela tenpela kamel i makim Tok Bilong God em i gutpela olgeta na em inap olgeta; na (e) Rebeka i makim meri bilong Pikinini Sipsip, dispela lain bilong marit long Krais, namba bilong ol em 144,000. [5, w90 3/1 p. 28-29]
14. Yu ting God i makim pinis ol samting i mas painim Jekop na Iso? (Stt. 25:23) Taim tupela i stap yet long bel bilong mama, Jehova inap save long pasin bilong tupela. Ating em i tingim dispela na tokaut long ol samting bai painim tupela. (Sng. 139:16) Tasol i no gat liklik hap tok olsem God i makim pinis samting i mas painim tupela inap long olgeta taim bihain o olgeta wan wan samting i mas painim ol. [6, rs p. 321 par. 1]
15. Long wanem rot Resel i stap gutpela piksa long pasin bilong wok strong tru na Jehova i blesim em? (Stt. 30:1-8) [7, w02 8/1 p. 29-30] Resel i tingim tru ol samting bilong lain bilong em. Em i save long tok promis bilong Jehova long blesim Jekop. Susa bilong em Lea, namba wan meri bilong Jekop, em i karim fopela pikinini man, tasol Resel i no karim pikinini. (Stt. 29:31-35) Resel i no save tingim tasol hevi bilong em yet, nogat, em i wok long beten long Jehova na em i kirap mekim wok i stret long ol beten bilong em.