2004 “Wokabaut Wantaim God” Kibung Distrik Bilong Ol Witnes Bilong Jehova

¹ Wanem samting i mekim na yu amamas tru long ol kibung distrik bilong yumi i save kamap long olgeta yia? Ol tok i strongim bel na drama em “wokboi i gat gutpela tingting” i bin redim? (Mt. 24:​45-47) Ol nupela buk samting i gat gutpela kaikai bilong spirit? Ol brata na sista i kamapim ekspiriens bilong ol long olsem wanem Baibel i bin helpim laip bilong ol i kamap gutpela moa? Ol ripot long wok bilong autim tok bilong Kingdom i go bikpela long sampela kantri? Pasin bilong bung wantaim ol wanbilip i gat kain kain krismas? Yes, long ol dispela na planti narapela as yumi save amamas na wet long ol kibung bilong yumi!

² Go Long Olgeta Tripela De: Long rot bilong Moses, Jehova i tok: “Singautim olgeta man . . . bai olgeta i ken kam na harim dispela tok.” (Lo 31:12) Long rot bilong wokboi i gat gutpela tingting, Jehova i bin redim gutpela program bilong skulim yumi long olgeta wan wan de bilong kibung. Em i skulim yumi bilong ‘yumi ken stap gut,’ olsem na yumi laik stap long kibung bilong kisim olgeta gutpela tok bilong em. (Ais. 48:17) Tasol long las yia long sampela “Givim Biknem Long God” Kibung Distrik, namba bilong ol man i bung long Fraide i daunbilo tru long namba i bung long Sarere na Sande. Dispela i makim olsem bikpela lain brata i lus long harim planti gutpela tok i bin kamap long kibung! Na tu, ol i lus long bung wantaim ol wanbilip.

³ Ating sampela i ting nogut bos i pinisim ol long wok na long dispela as ol i no kam long kibung long Fraide long las yia. Tasol planti Witnes i lukim olsem bos bilong ol i amamas long wok gut wantaim ol long dispela samting sapos ol brata i askim pastaim tru long kisim de malolo bilong go long kibung. Yu no ken ting bos bilong yu i no inap givim de malolo long yu, na yu no ken ting sapos yu lusim wanpela de bilong kibung, dispela i no bikpela samting. Wanpela bos i pilim tru pasin bilong wanpela painia sista long strong long i go long olgeta miting bilong kongrigesen na kibung, olsem na bos tu i go long kibung long wanpela de!

⁴ Long gutpela pasin wantaim bilip, redi long soim bos bilong yu ol skripsa i kamapim as na kibung em i bikpela hap bilong pasin bilong yu long mekim lotu. (Hi. 10:​24, 25) Beten long Jehova na askim bos bilong yu, bihainim pasin bilong Nehemia long no ken pret. (Neh. 1:11; 2:⁠4) Na tu, paslain tru long kibung i kamap, em i gutpela pasin long tokim sampela long famili husat i no wanbilip long yu bai go long kibung.

⁵ Bilip tru long ol tok promis bilong Jehova, olsem em bai lukautim yu long ol samting bilong skin sapos yu putim ol samting bilong spirit i stap namba wan long laip bilong yu.​—⁠Mt 6:33; Hi. 13:​5, 6.

⁶ Stretim Gut Ol Samting: Mipela i luksave olsem long sampela kibung distrik long kantri bilong yumi, wanpela o tupela tasol bilong famili i save kam long kibung. Yupela ol papa, stretim gut ol samting long nau na bai ol meri pikinini bilong yupela inap kisim gutpela kaikai bilong spirit wantaim yupela long “Wokabaut Wantaim God” Kibung Distrik long Disemba. (Lu. 2:​41-44) Ol pikinini inap tingim pasin bilong go wantaim papamama bilong ol long ol kibung distrik long olgeta yia. Ol kain raun olsem i opim rot tu long famili i ken painim gutpela amamas. Yupela i no ken ting olsem kibung bai kamap planti mun bihain, olsem na yupela i ken stretim ol samting long bihain. Nau em i taim bilong stretim ol samting bilong yupela i ken stap long kibung.

⁷ Bungim Mani: Nau em taim bilong mekim ol samting bilong bungim mani bilong go long kibung. Tru, ating long nau i hatwok long painim mani bilong go long sampela kibung distrik. Yupela inap mekim wanem? Sampela famili i save lukautim ol kakaruk em ol inap salim paslain long kibung. Sampela i save planim pinat na salim. Sampela ol i kisim pis, o ol i planim kaikai bilong gaden em ol inap salim. Tasol bikpela samting em olsem: Kirap nau long mekim ol samting bilong winim mak bilong go long “Wokabaut Wantaim God” Kibung Distrik na beten askim Jehova long blesim hatwok bilong yupela.​—⁠1 Jo. 5:⁠14.

⁸ Pilim Tru: Pasin bilong pilim “ol samting i bikpela samting tru” i nambawan samting i kirapim yumi long stretim ol samting na bai yumi ken kisim ol gutpela samting i kam long Jehova.​—⁠Fl. 1:​10, 11, NW; Sng. 27:⁠4.

⁹ Long dispela kantri, sampela i mas wokabaut o raun longwe tru long PMV o sip samting bilong go long kibung, tasol ol i no laik lusim wanpela kibung. Long las yia, fopela bikpela man na sikspela pikinini i lusim Popondetta na wokabaut long Kokoda Trel i kam long “Givim Biknem Long God” Kibung Distrik long Pot Mosbi. Ol i slip long ol ples i stap long dispela rot na ol i tingting long wokabaut i go bek bihain long kibung. Sampela narapela brata na sista na yangpela i mekim wankain hatwok na ol i wokabaut tripela de long hap saut bilong Wes Nu Briten bilong go long kibung distrik long Kimbe. Ol dispela bratasista i olsem planti gutpela brata bilong yumi long Afrika. Wanpela lapun brata i gat 73 krismas long Ripablik Demokratik Bilong Kongo (bipo Saier) em i wokabaut inap 450 kilomita bilong go long kibung. Long 16 de bihain em i kamap long kibung, lek bilong em i solap, tasol em i amamas long em i stap long kibung. Bihain long kibung, em i amamas tru na kisim strong long spirit, na em i wokabaut i go bek long ples. Em i bin mekim olsem inap planti yia pinis!

¹⁰ Bai Yu Stap Long Kibung?: Wanpela Witnes bilong longtaim em i tok: “Sapos yu no go long namba wan de bilong kibung, yu lus long kisim planti samting!” Bilong wanem em i ting olsem? Long wanem, namba wan de em i kirap bilong bikpela kaikai bilong spirit em oganaisesen bilong Jehova i bin redim long yumi. (Ais. 25:⁠6) Taim yumi stap long kibung long namba wan de bilong en, dispela i soim olsem yumi wanbel wantaim tok bilong man bilong raitim song, em i tok: “ ‘Goan, yumi go long haus bilong Bikpela.’ Ol i tok olsem na mi belgut tru.”​—⁠Sng. 122:⁠1.

¹¹ Long wanpela bung bilong lain bilong Jehova i bin kamap 2,500 yia bipo, Esra na ol Livai i ritim Tok Bilong God na kamapim mining bilong en long ol manmeri i bung. Wanem samting i kamap? Nehemia 8:12 i tok, “ol manmeri i go long haus bilong ol na ol i amamas . . . Nau ol i save gut long as bilong lo bilong God.” Yumi amamas tru long lain wokboi God i bin makim i bihainim pasin bilong Esra na ol Livai, ol i yusim Baibel, kamapim mining bilong en, na i soim olsem wanem yumi ken bihainim tok bilong en long laip bilong yumi. Taim ol i mekim olsem, dispela lain wokboi i kamapim pasin bilong Jehova long laikim na tingim tru olgeta man long lain bilong Em. Pasim tok long bel long yu bai go long olgeta tripela de bilong “Wokabaut Wantaim God” Kibung Distrik!

This article has been taken partly from km-E 12/03 “2004 ‘Walk With God’ District Convention of Jehovah’s Witnesses”